Çərşənbə axşamı İngiltərə Liqa kubokunda 1/4 finalın üç oyunu keçirildi.

“Football-plus.az” xəbər verir ki, təbii ki, “Çelsi” – “Nyukasl” oyunu daha böyük maraq doğururdu. “Sağsağanlar” Mançesterin hər iki təmsilçisinin ardından “zadəganlar”ı da turnirdən uzaqlaşdırmağa çox yaxın idi. Oyunun əvvəlində Qallaherin zərbəsi qapı çatına tuş gəldisə, 16-cı dəqiqədə Uilson Badyaşilin kobud səhvindən yararlanıb hesabı açdı. Eddi Haunun komandası ardından hesabı qorumaq üçün oynayıb. Ona görə ki, yorulub və ehtiyat qüvvə baxımından da əziyyət çəkir. Qonaqlar fasiləyə qədər dözdü, əslində fasilədən sonra da təzyiq qarşısında tab gətirdilər. “Çelsi” müntəzəm təhlükəli vəziyyətlər yaratsa da, gah Dubravka komandasını xilas edir, gah zərbələr qapıdan aralı keçir, gah da müdafiəçilər qapıçının köməyinə gəlirdi. Maurisio Poçettino çıxış yolunu əvəzetmələri sıralamaqda gördü və bu addım işə taradı. Sonradan oyuna qoşulan Mudrik uzatma dəqiqələrində Trippyerin səhvindən yararlana bildi. Əlavə vaxt olsaydı, yəqin ki, “Nyukasl” dözməzdi, ancaq Liqa kubokunda heç-heçə bitən oyundan dərhal sonra penalti seriyası başlayır. “Çelsi”nin oyunçuları ilk 4 zərbənin hamısını dəqiq yerinə yetirdisə, qonaqlardan Trippyer topu yandan vurdu, Riçi isə qapıçı ilə dueldən məğlub ayrıldı. “Zadəganlar” bu turniri qazanmağa qadirdi, “Nyukasl” isə səbirsizliklə “transfer pəncəsəri”nin açılmasını gözləyir. Bu oyunda da daha iki-üç futbolçu sıradan çıxdı.

“Everton” – “Fulhem” oyununun nəticəsini də penalti seriyası müəyyənləşdirdi. Zərbələri daha dəqiq yerinə yetirən “bağbanlar” yarımfinalda oynamaq hüququ qazandı. “Fulhem”in buna qədər ən yaxşı nəticəsi 1975-ci ildə ölkə kubokunun və 2010-cu ildə Avropa Liqasının finalına vəsiqə olub. Komanda həmçinin 2002-ci ildə İntertoto Kubokunun üç qalibindən biri olmaqla UEFA kubokuna vəsiqə qazanıb.
1/4 finalın daha bir cütündə aşağı dəstə klubları qarşılaşdı. Çempionşipdə oynayan “Midlsbro” D-3 təmsilçisi “Portveyl”i darmadağın etdi.

1/4 final
Çelsi - Nyukasl 1:1, p. – 4:2
Mudrik, 90+2 – Uilson, 16.
Çelsi: Petroviç, Disasi (Maatsen, 78), Silva, Badyaşil, Koluill (Hüsto, 46), Kaysedo, Qallaher, Fernandes (Broya, 32), Palmer, Sterlinq (Mudrik, 78), Cekson (Nkunku, 69).
Nyukasl: Dubravka, Kraft (Trippyer, 46), Lassells, Botman (Bern, 46), Livramento, Mayli, Gimarayns, Lonqstaff, Almiron, Qordon (Riçi, 52), Uilson.
Everton - Fulhem 1:1, p. – 6:7
Betu, 82 – Kin, 41-öz qapısına.
Everton: Pikford, Patterson, Tarkovski, Kin, Brentueyt, Quye, Harrison (Qruneveld, 72), Qarner, Onana, Maknil, Kalvert-Lüin (Betu, 61).
Fulhem: Leno, Tete, Adarabioyo, Bassi, Robinson, Rid (Pereyra, 77), Uilson (De Kordova-Rid, 77), Palyinya, Villian (Kerni, 62), İvobi (Diop, 87), Muniz (Vinisius, 87).
Portveyl (D-3) - Midlsbro (D-2) 0:3
Hauson, 11. Rocers, 23. Kruks, 53.
Liverpul - Vest Hem 5:1
Soboslai, 28. Cons, 56; 85. Qakpo, 71. Salah, 82 – Bouen, 77.

Oyundan sonra
Maurisio Poçettino, “Çelsi”nin baş məşqçisi: “Düşünürəm ki, bu, həqiqətən yaxşı oyun idi. Qol buraxdığımız epizodda səhvə yol verdik. Futbolçularıma demişəm ki, həmişə sona qədər qələbəyə inansınlar. Bəzən futbolda bir qədər də bəxt lazımdı və o bizim üzümüzə güldü. Oyunçularıma kompliment demək istəyirəm, onlar özlərini fantastik göstərdilər. Liqa kubokunda yarımfinala çıxmağımız yaxşı nəticədi. Fanatlar və klub bunu haqq edib. Bizim üçün böyük motivasiyadı. Püşkatmanın nəticəsini gözləyirik. Fernandesi 32-ci dəqiqədə əvəz etməyimə gəlincə, oyuna qədər də özünü yaxşı hiss etmirdi, oyun başlayandan sonra yaxşılaşmadı. Əvəzlənməsini özü xahiş etdi. Koluillin fasilədə əvəzlənməsi isə taktiki mülahizələr üzündən idi. O, hissənin sonuna yaxın yorulmuşdu. Növbəti oyuna hazır olacaq.