2023-də ulduzu parlayan futbolçulardan biri də Elvin Cəfərquliyevdi.

“Qarabağ”ın 23 yaşlı müdafiəçisinin “Futbol+”in ümummilli sorğusunda 3-cü yeri tutması da təsadüfi deyil. onunla əlaqə saxlayıb, bəzi aktual suallara cavab tapmağa çalışdım.

- Elvin, hazırda “Qarabağ”ın və yığmanın aparıcı oyunçularından sayılırsan. İlin futbolçusunü müəyyənləşdirmək üçün keçirdiyimiz sorğuda 3-cü yeri tutdun. Hətta ilin futbolçusu seçilən Bəhlul Mustafazadə məhz sənə səs verdi. İlk “üçlük”də olacağınızı gözləyirdinmi? Bu il sorğunun qalibi ola bilərsənmi?
- Baxmayaraq ki, üçüncü seçilmişəm, buna görə sevinirəm. Bəhlula təşəkkür edirəm ki, məni ora layiq görüb. Onun adına da çox sevinirəm. Çünki buna layiq idi. Mən öz işimi görürəm, əlimdən gələnin ən yaxşısını edirəm ki, hər il daha da yaxşı olum. Məni ora kim layiq görübsə, hamısına təşəkkürümü bildirirəm. Adımın ən yaxşılar arasında olacağını hardasa təxmin eləmişdim.

- Gələcək karyeranla bağlı nə düşünürsən?
- Bildiyiniz kimi, mən “Qarabağ”ın futbolçusuyam. İndiki durumda bütün fikrim bu komandanın yanındadı.

- Qış fasiləsində sənə başqa ölkələrin və ya öz klublarımızdan təkliflər olubmu?
- Bu məsələlərlə menecerim maraqlanır. Bu haqda belə danışığımız olmayıb. Hansısa ciddi təklif olsa, mənim də xəbərim olardı. Elə bir danışıq hələ ki yoxdu.

- Bəs legioner həyatı yaşamaq barədə düşünürsənmi?
- Əlbəttə, düşünürəm. Niyə də olmasın?! Burda ilk növbədə gərək komandam razı olsun. Sonra mənim razılığım gəlir. Ancaq indi bütün fikrim “Qarabağ”ladı.

- Sol cinah müdafiəçiləri arasında kumirin varmı?
- Əlbəttə, Avropada oynayan bir çox sol cinah müdafiəçisinə baxıram. Ən çox sevdiyim Xordi Albadı. Alexandro Baldeni də bəyənirəm, çox sürətli futbolçudu. Hətta Alfonso Deyvisi də bu siyahıya əlavə edərdim.

- “Qarabağ”la bir çox uğurlara imza atmısan, lakin millidə bu uğurlar görünmür. Nəyə görə belədi? Yığmada hansı çatışmazlıqlar var?
- Nə çatır, nə çatmır - bunu deyə bilmərəm. Mən öz oyunuma baxmalıyam. Çox istərdim ki, millidə də uğurlu nəticələrə imza ataq. İnanıram ki, bir gün bu da olacaq.

- Bir çox mütəxəssis Azərbaycanın indiki yığmasını tarixin ən güclü yığması adlandırır. Bu barədə nə düşünürsən?
- Mən də bu fikirlə razıyam. Hər mövqedə yaxşı oyunçularımız var. Düzdü, nəticələrə baxsaq, bir o qədər ürəkaçan deyil. Amma bu heyətlə yaxşı nəticələr qazana bilərik.

- Bildiyin kimi, hazırda yığmanın vakant baş məşqçi postunun yeni sahibini müəyyənləşdirmək üçün İşçi Qrup yaradılıb. Bir çox mütəxəssislər milli komandanın yerli məşqçilərdən birinə tapşırılmasının tərəfdarıdı. Sən nə düşünürsən? Namizədin varmı?
- Bu barədə çox danışmaq istəmirəm. Kim gəlir-gəlsin, amma doğru seçim olsun.

- Avropa Liqasında “Braqa” ilə qarşılaşacaqsız. Rəqibin oyunlarını izləyibsənmi?
- Bildiyiniz kimi, yenicə yığışmışıq. Hələ ki “Braqa”nı təhlil etməmişik.

- “Qarabağ” güclənir, əsas rəqibləriniz kimi görünən “Neftçi” ilə “Sabah” isə bu yolda ciddi addımlar atmır. Bu məqam sizdə arxayınlıq yaratmayacaq ki?
- Xeyr. Biz hər bir oyuna eyni motivasiya ilə çıxırıq. Çempionatımız elədi ki, hansısa komanadaya qarşı hazırlıqsız çıxsan, xal itirə bilərsən.

- Çoxu düşünür ki, artıq çempionluğun taleyi həll olunub. Sən də bu fikirlə razısan, yoxsa ikinci yarıda hansısa komandalardan ciddi müqavimət gözləyirsən?
- Xeyr, razı deyiləm. Hələ ki bizi çox qarşılaşma gözləyir. Bilmək olmaz nə olacaq. Ona görə də ikinci yarıya ciddi hazırlaşırıq.

- “Qarabağ”ın üç cəbhədə - çempionatda, ölkə kubokunda və Avropa Liqasında - mübarizə aparması çətin deyilmi?
- Çətinlik olur, amma komandada təcrübəli futbolçular çoxdu. Hər cəbhədə də maksimum nəticə qazanmağa çalışacağıq.

KAMAL SƏFƏR