“Qarabağ”ın “Səbail”lə qarşılaşmansı zamanı Respublika stadionunun media sektorunda Etibar Tağıyevlə rastlaşdım.

Etibar bəy AFFA-nın mətbuat xidmətinin əməkdaşıdı. Həm də bir tovuzlu kimi doğma rayonunun komandası çox sevir. Onunla “Turan Tovuz” barədə danışdıq. Həmin ərəfədə mən də magistral yolla üzü Qazaxa tərəf getmişdim, Tovuz stadionunda quraşdırılan projektorların parıltısı uzaqdan diqqətimi cəlb etmişdi. Bu məqamı həmsöhbətimin də diqqətinə çatdırdım, “maşallah olsun” dedik. Görənlər təsdiqləyər, projektorlar uzaqdan diqqəti elə cəlb edir ki, sanki rayon mərkəzinin ən hündür nöqtəsidi. Elə bu məqam da projektorların küləyin təsirinə daha çox məruz qalmasını şərtləndirib, onları küləkdən qoruyan heç nə olmayıb.

Tovuzda güclü küləyin əsməsi və nəticədə şəhər stadionuna bu yaxınlarda quraşdırılan projektor dirəklərindən birinin aşması gündəmi əməlli-başlı silkələdi. Bir andaca sosial şəbəkələrdə bu hadisə müzakirə olunmağa başladı, idman mediası da dərhal iki düşərgəyə bölündü. Həmişə olduğu kimi. Birinci qrup fürsəti əldən buraxmayıb, “Turan Tovuz”un sponsoru, eyni zamanda da “Hünər Qrup”un rəhbəri Ehtiram Quliyevi yamanlamağa başladı. Həmin mövqeni sərgiləyənlər hesab edirdilər ki, Ehtiram bəy klub rəhbəri kimi projektorun aşmasına görə məsuliyyət daşıyır. Zamanında projektorun dirəyinin keyfiyyəti yoxlanılmayıb, yaxud da klub rəhbərliyinin etimad göstərdiyi şirkət başdansovdu iş görüb. Nəticədə ortaya belə təhlükəli durum çıxıb. Digər qrup isə Quliyevə “toz qondurmaq” fikrində deyildi. Bildirirdilər ki, projektorun aşması təbiət hadisəsidi. Gəncədə qurulan şam ağacının aşmasıyla bağlı görüntülərin də çox keçmədən ortaya çıxması həmin qrupun dəlillərini gücləndirmiş oldu.

Bəli, çox şükür ki, Tovuzdakı hadisə itkisiz ötüşdü. Allah göstərməsin, aşan projektor boşluğa yox, dolu tribunalara yönəlsəydi, faciə qaçılmaz olacaqdı. Azarkeşlərdən, yaxud da futbolçulardan kimsə aşan dəmir dirəyin altında qalsaydı, ordan sağ çıxmaq şansı yox idi. Deməli, Allahın özü bəndələrinin halına acıdı, istəmədi ki, Peşəkar Futbol Liqasının əməkdaşlarının avtomobil qəzasına düşməsindən sonra üzülən ürəklərimiz daha bir acı xəbərdən sarsılsın. Amma həmin avtomobil qəzasında olduğu kimi, budəfəki hadisədə də insan amili, daha doğrusu məsuliyyətsizlik var idi. Xankəndində yollanan PFL əməkdaşlarını sutkanın qaranlıq vaxtı nabələd yola vurmamaq olardı. Eləcə də “Bakı” Futbol Klubunun bazasından söküldüyü deyilən dirəklərin küləyə davamlılığı, uzun müddət istifadəsiz qalan projektorların keyfiyyəti əvvəlcədən yoxlanılmalıydı.
Bir klub rəhbəri kimi Ehtiram bəyi məhz bu məqama görə qınamaq olar. Bildiyimiz qədəriylə cənab Quliyev özü də tikinti şirkətinə rəhbərlik edir. Rusların “SNİP” dediyi, tikintinin norma və qaydalarından xəbərsiz olmamış deyil. Azərbaycanda hər zonanın özünəməsxus havası, nəmişlik faizi, hətta fərqli sürətlə əsən spesifik küləkləri var. Hamımız yaxşı bilirik ki, Gəncə-Qazax bölgəsi özünün qasırğaları, güclü küləkləri ilə məşhurdu. Bütün bu hava şəraiti və təbii hadisələr illərdi müşahidə olunur, xüsusi statistik xəritələrdə əks olunur. Həmin o xəritələrdə hər bir rayonun illik yağıntı miqdarını, küləyin sürətini, havadakı nəmişliyin miqdarını öyrənmək mümkündü. Bunların da əsasında tikinti zamanı layihələr hazırlanır, mümkün bədbəxt hadisələrin qarşısını almaq üçün tədbirlər görülür. Zamanında gücü küləyi, Tovuzdakı mümkün qasırğaları nəzərə alıb, Bakıdan gətirilən projektor dirəklərinin nümunələrini müvafiq laboratoriyalara göndərmək lazım idi. Onda dəmir parçalarının küləyə davamlılığının miqyası da müəyyənləşdirilə bilərdi.
Mən illərini inşaat sektoruna vermiş Ehtiram bəyə ağıl öyrətmək fikrində deyiləm. Heç onu ittiham da etmirəm. Yazılarımın birində də qeyd etdiyim kimi, cənab Quliyevin 44 günlük müharibə dövründə də, ondan sonra da etdiyi fədakarlıqların əksəriyyətindən xəbərdaram. Həm bu fədakarlıqları, həm də “Turan Tovuz” üçün çəkilən xərci yüksək qiymətləndirirəm. Kim bilir, bəlkə də Ehtiram bəyin etdiyi xeyir əməllərin qarşılığında Tovuz stadionunda faciə yaşanmadı, ulu Tanrı bizi insan itkisindən, futbolsevərlərin zərər görməsindən qorudu. “Başına gələn başmaqçı olar” deyib atalarımız. Bizim də belə hadisədən müəyyən dərslər çıxarmağımız vacibdi. Ümid edək ki, güclü küləklər bundan sonra futbol qarşılaşmalarını yarıdan kəsməyəcək, azarkeşləri və futbolçuları həyəcanlandırmayacaq.

AMAL ABUŞOV