Turun mərkəzi oyununda “Mançester Yunayted”i qəbul edən “Liverpul” qolsuz heç-heçə ilə kifayətləndi. Baxmayaraq ki, “qırmızılar” bütün oyun komponentlərində aşkar üstün idi. Onlar oyun vaxtının 69,4 faizində topa nəzarət etdi, qapıya 34, “çərçivə”yə 8 (rəqibdə 6-1) zərbə vurdu, künc zərbələrinin nisbəti 12-0 oldu. Bununla belə, MY-nin müdafiəsini yara bilmədilər.

"Football-plus.az" xəbər verir ki, başqa maraqlı nəticələr də var. “Kristal Pelas”la oyunda 2 top üstünlüyünü əldən verən “Mançester Siti” tədricən tituldan uzaqlaşmaqdadı. Həftəiçi ÇL-də “Srvena Zvezda”ya qarşı ehtiyat heyətlə oynayan “şəhərlilər” dərhal təşəbbüsə yiyələndi və hissənin ortalarında hesab açıldı. Qriliş sağ “6-lığ”a dəqiq zərbə vurdu. Fasilədən dərhal sonra fərq artdı. Lüis rəqibin cərimə meydançasındakı qarışıqlıqdan yararlandı və premyer-liqada qol hesabını açdı. Demək olar ki, Edersonu narahat etməyən “qartallar”ın mümkün geridönüşü ilə bağlı heç bir əlamət yox idi. Ancaq “Siti” sonda iki qol buraxdı. Mateta 76-cı dəqiqədə fərqi artırdı, uzatma dəqiqələrində isə onun qazandığı penaltini Olise qola çevirdi. Son 6 turda 5-ci dəfə xal itirən “şəhərlilər”in konkret bu oyunda qələbəyə layiq olduğunu etiraf etməliyik. Təbii ki, onların xal itkisindən əsas rəqibləri yararlandı. “Aston Villa” “Brentford”la səfər oyununda əzmkar qələbə qazandı. Bu oyunda hər şey birmingemlilərin məğlubiyyətinə aparırdı. Ancaq 71-ci dəqiqədə - hesab meydan sahiblərinin xeyrinə olarkən Mi meydandan qovulmaqla komandasını çətin vəziyyətə saldı. “Aston Villa” sayca üstünlüyünü tezliklə maddiləşdirdi.

Turnir cədvəlinin zirvəsində yenidən “Arsenal” qərarlaşıb. “Topçular” aşkar üstün təsir bağışladığı oyunda qolları 2-ci hissədə vurdu. 2-ci qolun müəllifi Haverts son oyunlarda yüksəl məhsuldarlıq göstərir. Almaniyalı yarımmüdafiəçi bütün turnirlər çərçivəsində son 7 oyunda 4 qol vurub. Halbuki əvvəlki 19 oyunda yalnız 1 qolla yadda qalmışdı.

Londonun digər nəhəngləri – “Tottenhem” və “Çelsi” turnir cədvəlinin aşağı hissəsində qərarlaşan komandalar – “Nottingem Forst” və “Şeffild Yunayted” ilə oyunlarda çətinlik çəkmədi. Turu darmadağınla başa vuran “Nyukasl” və “Vest Hem” cədvəldə uyğun olaraq 6-cı və 8-ci yerə yüksəldi.

Hesabından 10 xal silinən “Everton” necə qəzəblənibsə, qarşısına çıxanı əzib keçir. Liverpul təmsilçisi hesabat turunda “Bernli”ni məğlub etməklə ardıcıl 4-cü qələbəsini qazandı. Xal cəzası olmasaydı, “göylər” indi 10-cu pillədə qərarlaşardı.

17-ci tur
Arsenal – Brayton 2:0
Jezus, 53. Haverts, 87. (60257)
Arsenal: Rayya, Zinçenko (Kivyor, 90+3), Qabriel, Saliba, Uayt, Edeqor, Rays, Haverts (Smit-Rou, 89), Martinelli (Trossar, 82), Jezus (Nketia, 81), Saka (Nelson, 89).
Liverpul – Mançester Yunayted 0:0
(57158)
Liverpul: Alisson, Simikas, Van Diyk, Konate, Aleksander-Arnold, Soboslai (Qomes, 62), Endo, Qravenberx (Qakpo, 61), Dias (Cons, 78), Nunyes (Elliott, 78), Salah.
MY: Onana, Şou, Varan, Evans, Dalot, Maynu (Mejbri, 82), Maktominey, Amrabat, Qarnaço (Reşford, 71), Heylunn, Antoni (Pelyistri, 82).
Mançester Siti – Kristal Pelas 2:2
Qriliş, 24. Lüis, 54 – Mateta, 76. Olise, 90+5-p.
MS: Ederson, Qvardiol, Ake, Diaş, Uoker, Rodri, Lüis (Stounz, 90+7), Qriliş, Foden, B.Silva, Alvares.
Nottingem Forest – Tottenhem 0:2
Rişarlison, 45+2. Kulusevski, 65. (29296)
Tottenhem: Vikario, Udoci, Devis, Romero, Porro, Sarr, Bissuma, Son Hın Min (Emerson, 88), Kulusevki, Conson (Skipp, 32), Rişarlison (Heybyerq, 72).
Çelsi – Şeffild Yunayted 2:0
Palmer, 54. Cekson, 61. (39599)
Çelsi: Petroviç, Koluill, Badyaşil, Silva, Disasi, Kaysedo, Qallaher, Mudrik (Fernandes, 69), Palmer (Maatsen, 90+4), Sterlinq (Broya, 75), Cekson (Hüsto, 90+4).
Nyukasl – Fulhem 3:0
Mayli, 57. Almiron, 64. Bern, 82. (52055)
Bernli – Everton 0:2
Onana, 19. Kin, 25. (21413)
Brentford – Aston Villa 1:2
Lüis-Potter, 45 – Moreno, 77. Uotkins, 85. (17034)
Vest Hem – Vulverhempton 3:0
Kudus, 22; 32. Bouen, 74. (62455)
“Bornmut” – “Luton” oyunu qonaqların müdafiəçisi Tom Lokyer 2-ci hissədə huşunu itirdiyinə görə təxirə salınıb və yenidən keçiriləcək (bu haqda başqa yazıda oxuya bilərsiz).
1. Arsenal 17 12 3 2 35-15 39
2. Liverpul 17 11 5 1 36-15 38
3. Aston Villa 17 12 2 3 37-21 38
4. Mançester S. 17 10 4 3 40-20 34
5. Tottenhem 17 10 3 4 35-23 33
6. Nyukasl 17 9 2 6 36-21 29
7. Mançester Y. 17 9 1 7 18-21 28
8. Vest Hem 17 8 3 6 29-30 27
9. Brayton 17 7 5 5 33-30 26
10. Çelsi 17 6 4 7 28-26 22
11. Fulhem 17 6 3 8 26-29 21
12. Brentford 17 5 4 8 24-24 19
13. Vulverhempton 17 5 4 8 21-29 19
14. Bornmut 16 5 4 7 21-30 19
15. Kristal Pelas 17 4 5 8 17-25 17
16. Everton (-10) 17 8 2 7 22-20 16
17. Nottingem F. 17 3 5 9 17-30 14
18. Luton 16 2 3 11 17-32 9
19. Bernli 17 2 2 13 16-36 8
20. Şeffild Y. 17 2 2 13 12-43 8
Bombardirlər: Holann (MS) – 14, Salah (Liverpul) - 11, Son Hın Min (Tottenhem), Bouen (Vest Hem) – 10.
Növbəti turun oyunları dekabrın 21-24-ü aralığında keçiriləcək: Kristal Pelas – Brayton, Aston Villa – Şeffild Yunayted, Vest Hem – Mançester Yunayted, Luton – Nyukasl, Nottingem Forest – Bornmut, Tottenhem – Everton, Fulhem – Bernli, Liverpul – Arsenal, Vulverhemton – Çelsi, Mançester Siti – Brentford.

Turun rəqəmi
57158 – “Liverpul” son 60 il üçün “Enfild”də azarkeş sayı üzrə rekord müəyyənləşdirdi. “Qırmızılar”ın ev oyununu 57158 tamaşaçı izlədi ki, bu da 1963-cü ildə “Bernli” ilə İngiltərə kuboku çərçivəsində keçirilən oyundan bəri ən yüksək göstəricidi. Mersiasaydıların çempionatda çıxış etdiyi bütün dövr ərzində isə azarkeş sayı baxımından 3-cü ən yüksək göstərici qeydə alındı.

Turun ulduzu
Koul Palmer (Çelsi) – “Şeffild Yunayted”in qapısına vurulan hər iki qolda birbaşa iştirak edən futbolçunu turun ən yaxşısı seçdik. 2-ci hissənin əvvəlində hesabı açdı, bir neçə dəqiqə sonra isə Ceksona məhsuldar ötürmə verdi. Qalan vaxt ərzində hesabına daha iki məhsuldar hərəkət əlavə edə bilərdi. Ancaq onun ötürməsindən sonra Broya inanılmaz imkanı boşa verdi, daha bir cərimə zərbəsinin qarşısını isə qapıçı Foderingem aldı.

Turun sitatı
Vircil van Diyk, “Liverpul”un müdafiəçisi: “Bu oyunda yalnız bir komanda qələbə qazanmağa çalışdı. Əlbəttə, hər oyunu qazanmaq istəyirik, bu üzdən nəticəyə görə məyusuq. Bəzən düzgün qərar verə bilmədik. İrəli hərəkəti davam etdirəcəyik. Amcaq bu oyunun nəticəsi məyus etdi, ona görə ki, bütün aspektlərdə rəqibdən yaxşıydıq. Rəqib 1 xala görə sevinir, biz isə məyusuq. Aydın məsələdi ki, rəqib yaxşı vəziyyətdə deyil, ancaq biz bu oyunda qalib gəlməliydik”.

Faktlar
* MS premyer-liqada ardıcıl 3 ev oyununda qələbə qazana bilməyib. “Şəhərlilər” “Kristal Pelas”a qədər “Liverpul” (1:1) və “Tottenhem” (3:3) ilə heç-heçə etmişdi. MS 2016-nın payızından bəri ilk dəfə ardıcıl 3 ev oyununda qələbəyə həsrətdi. Onda Qvardiolanın rəhbərliyi altında ilk mövsümünü keçirən komanda “Everton”, “Sauthempton” və “Midlsbro” ilə oyunlardan eyni hesablı (1:1) heç-heçə ilə ayrılmışdı. “Siti” həmin mövsümdə 3-cü yeri tutdu.
* Sterlinq premyer-liqada “qol+ötürmə” göstəricisində Ouenlə Berqkampa çatdı. “Çelsi”nin vingeri “Şeffild Yunayted”lə oyunda məhsuldar ötürmə verməklə xal hesabını 181-ə (120 qol, 60 ötürmə) çatdırdı. Sterlinq Ouen (150+31) və Berqkamp (87+94) ilə 16-cı yeri bölüşür. Bu göstəricidə rekordçu Şirerdi – 324 (260+64). 15-ci yerdə isə Hasselbeynk qərarlaşıb – 186 (128+58).
* Mayli “Nyukasl”ın premyer-liqadakı ən “gənc” qolunun müəllifi oldu. Xavbek “Fulhem”lə oyunda fərqlənəndə 17 yaş 229 günlük idi. Mayli həmçinin 2009-da MY-nin heyətində 17 yaş 226 günlüyündə fərqlənən Makedadan sonra 2-ci göstəriciyə malikdi.
* Onana “Liverpul”la oyunda 8 seyv etdi. 8 seyv 2019-cu ilin yanvarından bəri MY-nin qapıçıları üçün “quru” oyunlarda ən yüksək göstəricidi. Onda De Xea “Tottenhem”lə oyunda (1:0) 11 seyv etmişdi. Cari mövsümdə 6 oyunda qapısını toxunulmaz saxlayan Onana bu göstəricidə liderliyi Pikfordla (Everton) bölüşür.
* MY premyer-liqada “Liverpul”a qarşı keçirdiyi son 11 oyunun yalnız birində qələbə qazanıb (2022-nin avqustunda “Old Trafford”da 2:1). Qalan 10 oyunun 4-ü heç-heçə bitib, 6-da MY məğlub olub. Premyer-liqanın cari mövsümündə ilk dəfə heç-heçə edən “qırmızı şeytanlar” 2018-in dekabrından bəri “Enfild”də qol vura bilmir. Onda Joze Mourinyonun çalışdırdığı komanda 1:3 uduzmuş, yeganə qolu Linqard vurmuşdu. Mankunianları “Liverpul”la səfərdə qolsuz seriyası 5 tam oyunu əhatə edir, artıq 507 dəqiqəyə çatıb.

Oyundan sonra
Pep Qvardiola, MS-nin baş məşqçisi: “Qələbəni haqq etmədik. Bu, bəxtsizlik deyil, hər şey haqlıdı. Rəqibə iki xal verdik. Belə penalti bağışlayırsansa, deməli, bu nəticəni haqq edirsən. Yaratdığımız və qol buraxdığımız epizodlara baxın. Mövsümün gedişində həmişə eyni vəziyyətdi – oyunların nəticələrini həll edə bilmirik”.
Mikel Arteta, “Arsenal”ın baş məşqçisi: “Qeyri-adi oyundu. Əvvəldən sona qədər çox yaxşı komandaya qarşı necə oynadığımızı görmək xoş idi. Bu oyunda qələbəyə tam layiq idik. İlk yarıda 15 zərbəmiz oldu. Dəqiqlik çatmadı”.
Yürgen Klopp, “Liverpul”un baş məşqçisi: “Komandamın ifasında çoxlu yaxşı element gördüm. Xoşuma gəlməyən yeganə cəhət nəticədi. Qol vurmalıydıq. Bəzi məqamlarda tələsdik, ancaq intensivliyimiz və debütdə göstərdiyimiz oyun çox xoşuma gəldi. Hər kəs nə etmək istədiyimizi gördü. Rəqibə irəli qaçmağa imkan vermədil. “Mançester Yunayted” üzərindəki belə aşkar dominantlığımızı xatırlamıram – hətta 7:0 qalib gəldiyimiz oyunda da rəqib daha fəal idi. İndi hesab 0:0-dı. Yəqin rəqib özünü bizdən daha yaxşı hiss edir. Ancaq bu 1 xalı qəbul edir və irəli baxırıq. Bu, məhz mən gözlədiyim oyun idi. “Mançester”in müdafiəsi təmiz və ehtiraslı oynadı. Qol vurursansa, oyunun dinamikası dəyişir, rəqib bir qədər açılır, riskə yol verməyə başlayır. Ancaq bu baş vermədi, rəqib müdafiə olundu və hesab 0:0 qaldı”.
Erik ten Haq, MY-nin baş məşqçisi: “Sözsüz, oyunumuzda çoxlu müsbət aspekt var idi. Hesab edirəm ki, komandamız çox yaxşı oyun göstərdi. Oyun üçün planımız işlədi. Futbolçular birlikdə yaxşı hərəkət etdi, təkbətək mübarizələrdə təslim olmadı. Komandamı yalnız topa nəzarətə görə tənqid edə bilərəm. Hansısa məqamlarda iki-üç artıq ötürmə versəydik, rəqibə daha çox problem yarada bilərdik. Ancaq bu, yalnız fərqləndirməli olduğum bir elementdi. Ümumilikdə ciddi qol vəziyyətlərindən birini reallaşdırsaydıq, qalib gələ bilərdik. “Liverpul” çox yaxşı, çox hərəkət edən hücumameyilli komandadı. Onlarla oyunda çox intizamlı müdafiə olunmaq lazım gəlir. Komandam böyük komplimenti haqq edir – ruh, ehtiras və istək göstərdik”.