Premyer-liqada 17-ci turun “Bornmut” – “Luton” oyunu 65-ci dəqiqədə dayandırıldı.

Qonaqların kapitanı Tom Lokyer heç bir təmas olmadan yerə yıxıldı və durmadı. Futbolçunu xərəkdə meydandan çıxardılar. Bir neçə dəqiqə sonra onun özünə gəldiyini xəbər verdilər. “Bornmut” azarkeşləri də bir neçə dəqiqə Lokyerin adını səsləndirdi. Komandalar oyunu təxirə salmağı razılaşdırdılar.

Tom hazırda xəstəxanadı, vəziyyəti sabitdi və müayinə olunur. İş ondadı ki, uelsli müdafiəçi bu aqibətlə heç də ilk dəfə üzləşmir. Çempionşipin mayda keçirilən pley-offunda da heç bir kənar təsir olmadan ürəyi getmiş, 12-ci dəqiqədə əvəzlənmişdi. Onda Tomu “Uembli”dən dərhal xəstəxənaya çatdırılar. Düzdü, oyun başa çatanda artıq özünə gəlmişdi, hətta xəstəxana palatasında komandasının premyer-liqaya vəsiqə qazanmasını qeyd edirdi. Həmin vaxt futbolçuya ürək ritminin pozuntusu diaqnozu qoyuldu. 29 yaşlı müdafiəçi iyunda əməliyyat olundu. Problem bununla da bitməliydi.

Tom Kardiffdə dünyaya gəlib, 11 yaşında “Kardiff Siti”nin akademiyasına qəbul olunub, ardından “Bristol Siti”yə yollanıb. 2019-da “Çarlton”da, 2020-də isə “Luton”da çıxış etməyə başlayıb. Məhz bu komandada özünü parlaq şəkildə göstərib, AÇ-yə, DÇ-yə yollanıb, nəhayət, bu yay premyer-liqaya vəsiqə qazanıb. İyunda “Luton”la müqavilə müddəti bitsə də, klub ona yeni anlaşma təklif edib. Üstəlik kapitan sarğısı da uelsli müdafiəfiəçiyə verilib. Premyer-liqanın cari mövsümündə 17 turun 15-də start heyətində oynayıb. Ancaq “Bornmut”la oyunda yaşananlardan sonra bir daha yaşıl meydana dönməsi çətin görünür...