“Bornmut”da baş məşqçi istefası qaçılmaz olub. Skott Parker istefaya göndərilib.

"Football-plus.az" xəbər verir ki, klubun rəsmi saytının məlumatında 41 yaşlı mütəxəssislə müqaviləyə xitam verildiyi bildirilib. Parker ötən ilin yayında “Bornmut”la 3 illik sözləşmə imzalamışdı. Komanda son mövsümdə onun başçılığı altında çempionşipdən premyer-liqaya yüksəlmişdi. “Bornmut” yeni mövsümə “Aston Villa” üzərində qələbə (2:0) ilə başlasa da, premyer-liqanın son üç oyununda xal qazana bilməyib. Parkerin istefasına 4-cü turda “Liverpul”a 0:9 hesablı məğlubiyyət səbəb olub.

Qeyd edək ki, o, premyer-liqada son 18 ildə avqust ayında istefaya göndərilən ilk məşqçidi. 2004/05 mövsümündə Bobbi Robson “Nyukasl”dan, Pol Starrok isə “Sauthempton”dan qovulmuşdu. Ümumiyyətlə, bu liqada avqustda işini itirənlərin sayı 6-ya bərabərdi. Daha əvvəl Ruud Qullit, Kenni Dalqliş (hər ikisi “Nyukasl”) və Piter Rid (Mançester Siti) də bu ay vəzifəsindən ayrılıblar.