“Başqa ölkələrin birində təcrübə keçmək istəyirəm”
Noyabrın 24-də - evdə “Karvan”a məğlubiyyətdən dərhal sonra Vüqar Əsgərlinin “Şamaxı”nın baş məşqçi postundan istefa verdiyini bilirsiz. Artıq onun yerini Ramiz Məmmədov tutub.
“Şirlər” yeni məşqçi ilə ölkə kubokunda 2-ci təsnifat mərhələsini adlamağı (“Zaqatala” – 1:0) da bacarıb. Bəs Vüqar bəy indi hardadı, məşqçi karyerasını necə davam etdirmək fikrindədi? Bu sualları səbəbkara ünvanladıq:
“Hazırda işləmirəm. Fürsətdən istifadə edib ailəmə vaxt ayırıram və işimlə bağlı onlayn seminarlara qoşuluram. Müəyyən danışıqlar aparıram, başqa ölkələrin birində təcrübə keçmək istəyirəm. Hədəfim gələcəkdə məqçi kimi işləyib yeni uğurlar qazanmaqdı”.
Əsgərli istefa qərarının nə dərəcə doğru olması ilə bağlı sualımıza da cavab verdi, eyni zamanda sabiq komandasının kubokda mübarizəni davam etdirmək perspektivinə də toxundu.
Xatırladaq ki, “Şamaxı” bir oyundan ibarət 1/8 final mərhələsində səfərdə “Səbail”lə qarşılaşacaq:
“Hər qərarın özünə görə yanlış və doğru tərəfi var. Kiməsə görə yanlış, kiməsə görə doğrudu. İstefa vermək tam öz qərarımdı. Bu gün də “Şamaxı” rəhbərliyi ilə çox gözəl münasibətim var. Onlara uğurlar arzulayıram. Komandanın növbəti mərhələyə keçdiyini bilirəm. Təəssüf ki, “Zaqatala” ilə oyuna baxmamışam. Komandanın indiki durumunu oyuna baxmadığım üçün dəyərləndirə bilməyəcəyəm. “Səbail”lə duel bir oyundan ibarət olacaq. Bu futboldu, hər şey ola bilər”.
MİRKAMAL KAZIMZADƏ
Digər xəbərlər
