Qəzetimizin ötən sayında “Difai Ağsu”nun uğursuz çıxışı ilə bağlı klub prezidenti Asəf Məlikovun açıqlaması yer alıb.

Ağsu təmsilçisinin rəhbəri uğursuzluğun başlıca səbəbi kimi hakimlərin onun komandasına münasibətdə qərəzli mövqe sərgiləməsini israrla vurğulayır. Təbii ki, Asəf bəyin etirazını, narazılığını, fəryadını laqeydliklə qarşılamaq doğru deyil. Əsas da meydanda idarəçiliklə bağlı ciddi nöqsanlar var. Bunu heç kim danmır. Odu ki, Asəf cənablarını tənqid etdiyimiz qədər dərdinə də şərikik. Bəlkə bu ölkədə “Futbol+” qədər də hakim səhvlərini qınayan, qabardan ikinci idman mediası qurumu yoxdu. Amma hakimlərin səhvlərinin, qərəzinin olması o demək deyil ki, komanda 10 oyuna cəmi 1 xal toplasın, futbolçusu da üç dəfə meydandan qovulsun. Əvvəlki yazımda qeyd etdiyim fikri bir daha vurğulayıram: kimsənin “Difai Ağsu”nun mükafatçılar sırasında yer almasıyla bağlı gözləntisi yoxdu.

Ölkə kubokunun 2-ci təsnifat mərhələsinin həftəiçi keçirilən oyunları məhsuldarlığı ilə seçildi. 2-ci liqa təmsilçilərinin çoxu darmadağına üzülsə də, maraqlı, mübarizəli oyunlar da gördük. Ən azı yarımpeşəkar liqanın klubları elita komandalarına qarşı oyunlara xüsusi motivasiya ilə çıxmaqla müəyyən təcrübə qazandılar. Uzunçuluğa yol vermədən “Kəpəz” – “Baku Sportinq” oyunu haqda danışmaq istəyirəm. 2-ci liqanın təmsilçisi 90 dəqiqə ərzində “sarı-göylər”ə başağrısı oldu. Qonaqların qapıçısı Cəfər Əlizadə isə matçın əsas vaxtında alınmaz qalaya çevrildi. Premyer-liqa klubu yalnız 30 dəqiqəlik əlavə vaxtda onun qapısına iki dəfə yol tapdı ki, bu da müdafiəçilərin kobud səhvlərinin nəticəsi idi. Qısası, yarımpeşəkar komandanın qolkiperi həmin gün peşəkarlığıyla bir çox elita təmsilçilərinin “çərçivə qoruyucuları”na nümunə oldu. 1-ci liqada çempionluğa iddialı “Qaradağ Lökbatan” 2-ci liqadan “Şahdağ Qusar”ı çətinliklə məğlub edə bildi. Karyerasını bitirəndən sonra futboldan küsən, taksi sürməklə çörəkpulu qazanan Ramazan Abbasovu uzun fasilədən sonra iş başında gördük. 40 yaşlı veteran futbolçu “Araz-Naxçıvan”la oyunda komandasının yeganə qolunu vurdu. Həqiqətən də 2-ci liqanın təsis edilməsi ilə bölgələrdə yeni klubların yaradılmasının və ya bərpasının ilk cücərtilərini gördük. Bu sistemi qorusaq və inkişaf etdirsək, ölkə futbolu bataqlıqdan çıxa bilər.

Hörmətli, əziz Asəf bəy, mübarizlik “Baku Sportinq” kimi olur. Meydanda döyüşmək Cəfər Əlizadə nümunəsidi, irəli atılmaq qoca Ramazan Abbasov timsalında olur. Bununla sizi və komandanızı asanlıqla təslim olmaqda ittiham etmir, aşağılamıram. Sadəcə, hazırkı mübarizəniz dəlikləri bol olan qayığın okeanda üzməsinə bənzəyir. Heyətiniz var gücüylə avar çəkib irəliləməyi hədəfləyir. Lakin qayıq üzdükcə dəliklərdən axan su əvvəlcə onun sürətini azaldır, sonra isə batırmağa doğru aparır. Belədə onsuz da avar çəkməkdən əldən düşmüş zavallı heyət qayığı dolmuş sudan, daha doğrusu, daşdan azad etməyə çalışır. Bu mənzərə yerində saymaq deməkdi.

Poqon yoldaşım, gəncliyini müharibədə keçirən dəyərli Asəf bəy, sizə münasibətdə haqsızlıqlar var, bunu danmırıq. Jurnalistliyimi qoyum bir kənara, insan, zabit kimi sizinlə əl-ələ verib, çiyin-çiyinə haqqınız tapdalanan məqamlarda mübarizəyə qoşulmağa hazıram. Amma və lakin bunun üçün gərək okenadakı “Difai Ağsu” qayığınız sahilə yetişsin. Bunun üçün qayıqdakı dəlikləri təmir edib suya baş vurmaq lazımdı. Gəlin, unutmayaq ki, müdafiəçilər nə qədər çarpışsa, vuruşsa, misilsiz qəhrəmanlıqlar göstərsələr də, bir qalanın daxilində xəyanətkarlar və ya tkilinin harasındasa çatlar, dağıntı varsa, düşmən bundan istifadə edərək fəth planını həyata keçirəcək.” Ağsu təmsilçisində xəyanətkarlar yer alıb” demirəm. Amma divarlarının möhkəmliyi baxımından fəsadların olması şübhə doğurmur. Təbii ki, bunu aradan qaldırmaq da sizə qalır, Asəf bəy.

Amerikalı, filoof, psixoloq Cim Ran deyir: “Nailiyyət gündəlik əməl etdiyimiz sadə qanunlardı. Uğursuzluq isə gündəlik təkrarladığımız bir neçə səhvdi...”.

ABDULLA İSMAYILOĞLU