“Əsas mənim yox, baş məşqçimizin yeni transferlərdən razı qalmasıdı” – kamerunlu gətirdi, belə dedi
1-ci liqada uğursuz uğursuz çıxışla yadda qalan və turnir cədvəlinin dibində olan "Difai Ağsu" heyətinə üç futbolçu cəlb edib.
Komanda iki yerli, bir əcnəbi futbolçuyla güclənib. Söhbət Kamil Hüseynov, İlham Allahverdiyev və kamerunlu Kriatian Kamtadan gedir. Ağsu təmsilçisinin rəhbərliyi çempionatın əvvəlində ancaq yerli futbolçularla mübarizə aparacaqlarını demişdi. İndi niyə legionerə ehtiyac duyuldu? Həm bu sual ətrafında, həm yeni transferlərlərlə bağlı klub prezidenti Asəf Məlikov "Football-plus.az" saytına danışdı:
"Güclənməyə ehtiyacımız vardı. Kamil ilə İlham kubok oyununda şans qazanmışdılar. Ən son qoşulan kamerunlu oldu. O, hücum xəttində yer alacaq. Əsas mənim yox, baş məşqçimizin yeni transferlərdən razı qalmasıdı. Onun təşəbbüsü, istəyi ilə onları heyətimizə qatdıq. Düşünürəm ki, hər üç futbolçu komandamıza fayda verəcək".
Asəf bəy yeni transferlər olub-olmayacağına da aydınlıq gətirdi:
"Əlavə transferlər barədə indidən nəsə demək tezdi. Baş məşqçimiz ehtiyac duyarsa, bunu həyata keçirməyə çalışacağıq. Hazırda qarşıdakı oyunlara köklənmişik. Məqsədimiz yaxşı oyun sərgiləməklə qələbə qazanmaqdı".
ABDULLA İSMAYILOĞLU
Digər xəbərlər
