“Əvvəlcə onu deyim ki, son vaxtlar haqlı-haqsız bir çox media nümayəndəsi bizi çox qınayır, tənqid edir. Həmçinin siz də son yazınızda “Difai Ağsu”nun məğlubiyyətdən zövq aldığını vurğulamısız. Bəlkə kənardan elə görünür. Amma komandanın içində olan biri kimi deyim ki, gənc, təcrübəsiz futbolçulara sahib olmağımıza baxmayaraq, meydanda fədailər kimi savaşırıq. Çempionatın startından 2-3 tur sonra hakim haqsızlığı haqda danışmışdım. Hətta xüsusi vurğulamışdım ki, tək bizə yox, bütün komandalara qarşı referilərin qərəzli olmasını istəmirik. İstər “İrəvan”la son çempionat, İstərsə də “Karvan”la kubok oyununda hakim ədalətsizliyinə məruz qaldıq. Bizim futbolçuya qarşı rəqibin cərimə meydançasında aşkar kobudluq olur, hakimin fiti susur. Amma başa-baş mübarizə zamanı rəqib futbolçu yerdə qalanda futbolçumuz Seymur Rəhimov ikinci sarını almaqla qovulur. Elə kubok matçında da futbolçularımızdan Nazim Bağırov, Valeh Qəhramanlı və Seymur Rəhimova qarşı haqsızlıq oldu. Nazimə top uğrunda mübarizə zamanı, Valeh isə rəqibin cərimə meydançasına soxulandan sonra ayağına təmas olur. Amma hər iki halda referi futbolçumuza sarı vərəqə verdi. Halbuki Valehə qarşı aşkar kobudluq vardı. Epizodun videoyazısına diqqətlə baxanda görürsən ki, Valehin ayağına təmas var. Amma hakim bunu simulyasiya kimi qeydə alır və oyunçumuza sarı verir. Seymur isə təhlükəni uzaqlaşdırandan sonra rəqib futbolçu Kinqsə ayağı dəyir. Referi bunu rəqibə aşkar zərbə kimi qiymətləndirməklə birbaşa qırmızı verir. Amma oxşar hadisələr bizə qarşı olanda ədalət təmsilçiləri tolerant mövqe tutur. Elə “İrəvan”la qarşılaşdada rəqib futbolçu dirsəklə qapıçımızın baş nahiyəsinə zərbə endirdi, nəticədə qaşı partladı. Həmin vaxt dəyişiklik limitini bitirdiyimizdən Prikrotsovu əvəz edə bilmədik. Başından zədə alan qolkiperimiz fədakarlıq edərək qapıda dayandı. Təbii ki, 2 dəqiqəyə 2 qol buraxdıq. İndi sual olunur: qapıçımıza aşkar kobudluq olanda niyə hakimin fiti susur? Haqqımız yeyilir, bir çox media nümayəndələri, o cümlədən də siz, ancaq bizi qınayır, tənqid atəşinə tutursuz. Təbii ki, heç bir jurnalistə ağıl vermək niyyətimiz yoxdu. Əksinə, xoşdu ki, “Difai Ağsu”yla maraqlanır, bizi tənqid edir, səhvlərimizi deyirsiz. Amma sizdən çox xahiş edirəm: bizi məğlubiyyətdən zövq almaqda, meydana boşuna çıxmaqda suçlamayın. Bununla həm haqqımıza girir, həm də futbolçularmızın meydanda mübarizə əzmini heçə endirirsiz”.