Futbol üzrə ölkə çempionatının 1-ci liqasında çıxış edən “Şamaxı”nın “Karvan”a məğlub olması (2:4) Vüqar Əsgərlinin istefasına səbəb oldu.

“Football-plus.az” olaraq, mütəxəssislə söhbətdə gedişinə qədər başverənlər və sornakı planlar haqda danışdıq.

- Mövsümə uğurlu başlasaz da, son oyunlarda geriləmə müşahidə olunurdu. Bu nə ilə bağlı idi?
- Oyun tərzimizə əsasən, düşünürəm ki, daha çox xal qazanmalıydıq. Çünki matçların çoxunda açıq-aşkar üstünlük çıxış etmişik. Lakin bəzi səhvlərə görə ya məğlub olurduq, ya da heç-heçə edirdik. Bəlkə də rahatlıq var idi. Həmişə uşaqlara konsentrasiyanı itirməyin bizə baha başa gələcəyini deyirdim. “Karvan”la oyunda qalib gəlsək, ya 1-ci, ya da 2-ci pilləyə yüksələcəkdik. Amma qapımız önündə təhlükəli vəziyyət olmadan 0:2 uduzuruq. İlk qolu künc zərbəsindən, ikincini penaltidən buraxdıq. Tempi artıran kimi hesabı bərabərləşdirsək də, eyni ssenari yaşandı. Diqqət dağınıqlığı üzündən qapımıza penalti təyin edildi. Çatışmazlıqlara baxmayaraq, komandam gözəl hücum futbolu oynayırdı.

- Ötən mövsümə nisbətən bu dəfə ev oyunlarına gələn azarkeş sayı xeyli azalıb...
- Bu məsələyə fərqli baxış bucaqlarından baxmaq lazımdı. İzləyici sayı həm rəqibin kimliyindən, həm də oyunun vaxtından asılı olur. Məncə, kifayət qədər daimi tərəfdarlarımız var ki, məşqləri belə izləməyə gəlirlər.

- Sizcə, “Şamaxı”nın legionersiz komanda formalaşdırma layihəsi nə dərəcədə uğurlu alınır? Ümumiyyətlə, ölkə futbolunun indiki reallıqlarında bu ideyanın məntiqi əsası var?
- Təbii ki, çox çətin prosesdi, lakin yetərincə məntiqlidi. Bəlkə də kobud səslənəcək, amma ötən mövsüm heç kimin maraq göstərmədiyi futbolçularla diqqəti çəkdik, ölkəmizə yeni futbolçular qazandırdıq. İnkişaf istəyiriksə, kimsə əlini daşın altına qoymalıdı. Məntiqli olsa da, olmasa da...

- “Şamaxı” yadınızda necə qalacaq?
- Həm bölgədən, həm də klubdan ən xoş xatirələrlə ayrıldım. Rəhbərlikdən tutmuş azarkeşlərə qədər hər kəsə təşəkkür edirəm.

- Karyeranızın gələcəyi haqda nə düşünürsüz?
- Uyğun təklif olanda yenidə iş başına qayıdacam.

KƏNAN BAHADIR