Region Liqasının iştirakçıları yeni mövsümə hazırdı
Nəhayət, Region Liqasında yeni mövsümün startıyla bağlı qərar verildi.
"Football-plus.az" xəbər verir ki, noyabrın 25-də turnir start götürəcək. Bəs çempionatın bu qədər gecikməsi komandaların planlarına təsir edibmi? Bu sualı aydınlaşdırmaq üçün Region Liqasının bəzi təmsilçilərinə müraciət etdik.
Rəhman Salmanov ("Göyəzən"in təsisçisi və rəhbəri):
"Biz ənənələri, yetərli təcrübəsi olan komandayıq. Hazırkı heyətimiz də neçə ildi dəyişmir. Yəni futbolçular həm harmoniya, həm də təcrübə baxımıdan bir-birini tamamlayır. Odu ki, çempionatın gec başlaması bizi narahat etmir".
Taleh Gülməmmədov ("Qobustan"ın vitse-prezidenti):
"Komanda olaraq, məşqləri davam etdiririk. Bir neçə hazırlıq matçında da qüvvəmizi sınamışıq. Çempionatın gec startı bizə təsir etməyib. Hər şey qaydasındadı".
Fəxrəddin Mürvətov ("Neftçala" məşqçisi):
“Çempionatın gecikməsinə görə üzgünük. Çünki yubandıqca bir çox problem üzə çıxır. Əsas da hava şəraitinə görə. Artıq qışa doğru getdiyimizdən ilk turları soyuq havada keçirəcəyik. Amça müsbət məqam odu ki, komanda şəklində hazırlaşmağa daha çox vaxtımız oldu. Bundan maksimum yararlanmağa çalışdıq. Çempionata hazırıq".
Tural Cəlilov ("Şimal"ın baş məşqçisi):
"Müəyyən səbəblərə görə çempionat yubandı. Bu da komandamızın oyun praktikasına təsirsiz ötüşmədi. Belə ki, oyun təcrübəsizliyinə gətirib çıxardı. Şükürlər olsun ki, yubanmanı nəzərə alıb bir neçə yoxlama oyunu keçirə bildik. Ümumi götürəndə turnirə hazırıq və startı səbirsizliklə gözləyirik".
ABDULLA İSMAYILOĞLU
Digər xəbərlər
