Ukrayna ilə Rusiya arasındakı amansız müharibə ötən ilin fevralından bəri davam edir.

Bu səbəbdən iki ölkənin U-21 yığmaları arasındakı oyun İspaniyada keçirildi. Mursiyadakı görüşə Samir Əliyev 5-li müdafiə sistemi ilə çıxmışdı. Məşqçinin Qurbanı sol cinahda arxa xətt oyunçusu kimi sınaması maraqlı məqamlardan idi. Ukraynanın təhlükəli hücumları da məhz bu cinahdan qurulurdu. Nominal meydan sahibləri ilk 10 dəqiqədə iki real qol şansını əldən qaçırdı. Yığmamız toparlanmağa çalışsa da, meydanın mərkəzini keçməkdə çətinlik çəkirdi. Komandamızın heyətində Fəridlə Veysəl nəsə etməyə cəhd göstərirdi. Lakin ukraynanılar buna imkan vermirdi. Rəqib isə yaratdıqları qol imkanlarını sağa-sola xərcləməklə məşğul idi. 36-cı dəqiqədə ukraynalılar qol istəyinə çatdı. Cərimə meydanı daxilində Abdulla Voloşinə qarşı qaydanı pozdu. Gürcüstanlı hakim 11 metrilik cərimə zərbəsi təyin etdi. Brajko hesabı açdı.

Qoldan sonra yığmamızın toparlanacağını düşünürdük. Lakin Ukrayna millisi daha da canfəşanlıq göstərməyə başladı. Bütün cəhdlərə baxmayaraq, ilk hissədə başqa qol vurulmadı.
Baş məşqçilər ikinci hissəyə eyni heyətlə başladı. Samir Əliyevin komandası fasilədən sonra meydanın mərkəzini keçməyə başladı. Lakin ukraynanılar Azərbaycan yığmasının qol vəziyyəti yaratmasına imkan vermirdi. Ukraynanılar isə yenə əllərinə düşən şansları sağa-sola xərcləməklə məşğul idi. Samir Əliyev hesabı bərabərləşdirmək üçün bəzi dəyişiklər etsə də, işə yaramadı. Beləliklə, matç 1:0 hesabı ilə nominal meydan sahiblərinin xeyrinə başa çatdı.
Bu qrupda noyabrın 17-18-də və 21-də daha dörd oyun keçirilib: Ukrayna – Lüksemburq 4:0, Serbiya – İngiltərə 0:3, Serbiya – Lüksemburq 2:0, İngiltərə - Şimali İrlandiya 3:0.

Yığmamız gələn il martın 22-də evdə İngiltərə, 26-da isə Ukrayna ilə qarşılaşacaq.

1. Ukrayna 5 5 0 0 12-2 15
2. İngiltərə 5 4 0 1 20-4 12
3. Serbiya 5 3 0 2 7-13 9
4. Azərbaycan 4 1 0 3 3-6 3
5. Lüksemburq 6 1 0 5 3-15 3
6. Ş.İrlandiya 5 1 0 4 2-7 3

Reaksiyalar
Unay Melqosa: "İki-üç topumuz tirdən qayıtdı. Qolları vura bilmədik və özümüzü narahat rahat hiss etməyə başladıq. İlk hissənin son dəqiqələrində bizə penalti qazanmaq qismət oldu. Zərbəni dəqiq yerinə yetirdik. İkinci hissədəki, heç şübhəsiz, ən yaxşı oyunumuz deyildi. Bəzən belə qarşılaşmalar olur, amma bunun qarşısını almağa çalışırıq. Rəqib müdafiənin çox dərinliyində mövqe tutmuşdu. Bizi gözləyirdi və biz də bunu qəbul etmişdik. Onlar başqa cür davranmadı. Hesabdan razıyam, oyunumuzdan isə qətiyyən".

Samir Əliyev: "Futbolçular çox nizam-intizamlı oynadılar, yaxşı mübarizə apardılar. Düzdü, ilk dəqiqələrdə uşaqlarda müəyyən həyəcan var idi. Ukrayna ilk 15-20 dəqiqədə çox sürətli futbol oynadı. Amma tədricən o tempə uyğunlaşdıq. İkinci hissədə daha yaxşı oynadıq, qol epizodlarına girdik. Rəqibin fasilədən sonra qol vəziyyətləri, demək olar, olmadı. Məğlubiyyətə baxmayaraq, futbolçularımdan heç bir narazılığım yoxdu. Uşaqlar güclü rəqibə qarşı, doğrudan da, çox yaxşı mübarizə apardılar. Kobud səhvdən qol buraxmadıq. Sadəcə, ani diqqətsizlik idi. Futbolçu özü də bilmədən penalti oldu. Yəni oyun epizodudu, matçda olan bir şeydi".