23 (7) qapıya ("çərçivə"yə) zərbə 1 (0)
9 künc zərbəsi 0
2 ofsayd 0
13 qayda pozuntusu 7
2 (0) sarı (qırmızı) vərəqə 3 (1)
72 topa sahibolma (faizlə) 28

İsveç üzərində möhtəşəm qələbədən sonra ümidlənmişdik. Düşünürdük ki, yığmamız Belçika səfərindən xal ala bilər. Ən azı döyüşərək məğlub olar, Bakıya biabırçı hesabla dönməz. Lakin unutduğumuz bir məqam var idi. Bu komandanı Canni de Byazi çalışdırırdı.

Oyundan öncə yaşananlara şahidlik etdiz. Himnimiz səslənmədi. AFFA rəhbərliyinin etirazından sonra işlər qaydasına düşdü. Lukakunun canfəşanlığından hiss olunurdu ki, Azərbaycan millisindən Bakıdakı oyunun acığını çıxmaq istəyirlər. Xatırlayırsızsa, paytaxtdakı matçda belçikalılar minimal hesabla qələbə qazanmışdı.

Bəhlul Mustafazadə ilə Ramil Şeydayevin cəzalı olması italiyalı mütəxəssisi çətin duruma şalmışdı. Baş məşqçi meydana 4-5-1 taktiki sxemi ilə çıxmışdı. Antonla Rahili mərkəz müdafiəçisi kimi oynadan De Byazi Toralla Mahirdən sol və sağ vinger rolunda yararlanırdı.

Meydan sahibləri ilk dəqiqələrdən hücuma atıldı. Yığmamız bu təzyiqin nəticəsində oyun nizam-intizamını itirdi. Müdafiədəki boşluqlar açıq-aşkar hiss olunurdu. 17-ci dəqiqədə Lukaku baş zərbəsi ilə hesabı açdı. Komandamız toparlanmağa çalışırdı ki, Eddi bu cəhddin üstündən xətt çəkdi. “Neftçi”nin oyunçusu cəmi 4 dəqiqə ərzində iki yersiz sarı vərəqə alaraq meydandan qovuldu. Bundan sonra yığmamızın ifasında oyuna aid nəsə görmədik. Belçika qarşısındakı rəqibin aciz durumda olduğunu görərək 26, 30, 37-ci dəqiqələrdə daha 3 qol vurdu. Bu qolların hamısının da müəllifi eyni adam idi. Lukaku müdafiədəki boşluqlardan istifadə edərək pokerini rəsmiləşdirdi. Fasiləyə kimi Şahruddinin seyvləri olmasaydı, fərq daha biabırçı həddə çatacaqdı.

İtaliyalı mütəxəssis ikinci hissəyə üç dəyişikliklə başladı. Yarımmüdafiənin dayağındakı boşluğu doldurmaq üçün Alekseyin yerinə Coşqun meydana çıxdı. İlk hissədə heç nə ilə yadda qalmayan Mahir yerini gənc Nərimana verdi. Elvini isə Qismət əvəzlədi. Belə olan təqdirdə Toral sol, “Zirə”nin kapitanı isə sağ cinah müdafiəçisi kimi çıxış edirdi. De Byazi müdafiə xəttini gücləndirərək rəqibi əks-hücumlarda yaxalamaq istəyirdi. İlk hissədə qoldan doyan belçikalılar artıq, sadəcə, vaxt keçirməklə məşğul idi. Düzdü, rəqibin var qüvvə ilə irəli atıldığı anlar da olurdu. Lakin şanslar sağa-sola xərclənirdi. 90-cı dəqiqədə “Arsenal”ın üzvü Trossar komandasının 5-ci qolunu vurdu. Əlavə olunan dəqiqələrdə meydan sahibləri fərqlənə bilmədi.

Statistikaya nəzər yetirdikdə komandamızın bu oyunda heç bir şansının olmadığı açıq-aşkar görünür. Təsəvvür edin ki, nə “çərçivə”yə gedən zərbəmiz var, nə də korner yerinə yetirmişik. İsveç üzərində qələbədən sonra özünü qəhrəman kimi sırımağa çalışan italiyalının məşqçilik bacarığı ortadadı.
Bu biabırçı məğlubiyyətlə Azərbaycan millisinin AÇ-2024-ün seçmə mərhələsindəki mübarizəsi başa çatdı. Komandamız tsklı 7 xalla başa vurdu. Baş məşqçi Canni de Byazi olmasaydı, bu qrupda daha çox xal yığa bilərdik. Ümid edirik ki, AFFA İcraiyyə Komitəsi doğru qərar verər və növbəti seçmələrə onsuz başlayarıq.

İLKİN SULTANLI