Monteneqronun Budva şəhərində keçirilən şahmat üzrə Avropa çempionatı başa çatıb.

"Football-plus.az" xəbər verir ki, kişilərdən ibarət yığma uğursuzluq yaşayıb.

İlk 5 turda yalnız iki qələbə qazanan milli 6-cı turda Yunanıstana (2,5:1,5) uduzub. Növbəti oyunda Moldova ilə heç-heçə edən şahmatçılarımız 8-ci turda Belçika üzərində qələbə qazanıb – 3:1. İddiası qalmayan yığma son görüşdə İtaliya ilə heç-heçə edib – 2:2. Turnirin reytinq favoritinin sonda 20-ci yeri tutması acınacaqlı mənzərədi.

Qızlarımız 6-cı turda Bolqarıstana (1,5:2,5) uduzub. Növbəti iki tur isə bizimkilər üçün uğurlu alınıb. Belə ki, yığma əvvəlcə İngiltərəyə (3:1), ardından Yunanıstana (2,5:1:5) qalib gəlib. Dünən qədər 13 xalla 2-ci pillədə qərarlaşan yığma son turda qələbə qazansaydı, qitə çempionu ola bilərdi. Lakin bunun üçün həm də lider Bolqarıstan (14 xal) Gürcüstana uduzmalıydı. Komandamız işinin öhdəsindən gəlib, yəni Serbiyanı 3:1 hesabıyla məğlub edib. Ancaq Bolqarıstan da Gürcüstana qalib gəlib. Hər halda, qadınlardan ibarət yığma 2-ci yeri tutmaqla tarixində ən yaxşı nəticəni göstərib. Qadın şahmatçılarımız buna qədər üç dəfə (1992, 2019, 2021) “bürünc” qazanmışdı.