Rusiyanın ötən ilin fevralında Ukrayna torpaqlarını işğal etmək məqsədi ilə başlatdığı müharibə dünyanı ikiyə parçaladığı kimi, idman dünyasında da böyük çaxnaşma yaradıb.

"Football-plus.az" xəbər verir ki, Beynəlxalq Olimpiya Komitəsi (BOK) haqlı olaraq, gələn il, yəni 26 iyul – 11 avqust aralığında Parisdə keçiriləcək Olimpiya Oyunlarına Rusiya və Belarusdan olan idmançıları buraxmaq istəmir. Daha dəqiqi, bu iki ölkədən olan idmançıların neytral statusu ilə Olimpiadaya qatılmasının mümkünlüyü variantını irəli sürüb. Rusiya idmanına rəhbərlik edənlər isə eynən ötən əsrin 80-ci illərində - “soyuq müharibə” dövründə olduğu kimi, dünya idmanını ikiyə parçalamaq fikrinə düşüb. Gələn il sentyabrın 15-29-u aralığında Moskva və Yekaterinburda, həmçinin Minskdə keçirilməsi nəzərdə tutulan Ümumdünya Dostluq Oyunları ilə bağlı ideyanı başqa cür qiymətləndirmək çətindi. Həmin Oyunlara təxminən 100 ölkədən idmançıların dəvət olunması nəzərdə tutulur, ciddi mükafat fondu (1-ci yeri tutanlar üçün 40 min dollar) müəyyənləşdirilib. Hələ ki Oyunların proqramına 27 idman növü salınıb, bunlardan 22-si olimpiya, 5-i qeyri-olimpiya növüdü.

BOK-un Milli Olimpiya Komitələri ilə əlaqələr üzrə departamentinin direktoru Ceyms Makleod bütün dövlətlərin olimpiya qurumlarına Rusiyada keçiriləcək Dostluq Oyunlarında iştirakdan imtina etməyi məsləhət görüb:

Makleoddan əvvəl isə BOK prezidenti Tomas Bax dövlətlərin siyasi xarakterli turnirlər təşkil etmək niyyətini “qamçılamışdı”. Onun fikrincə, buna görə idman federasiyalarının muxtariyyəti təhlükə altına düşür. Dostluq Oyunlarının təşkilat komitəsinin baş direktoru Aleksey Sorokin isə Baxa belə cavab verib: “Turnirin Olimpiadaya alternativ olmaq hədəfi yoxdu, bu, sadəcə, kommersiya yarışıdı”.

Bu arada Bax rəhbərlik etdiyi qurumun hərbi münaqişələrin sayının artmasına görə Paris Olimpiadasını təxirə salmaq variantını nəzərdən keçirmədiyini də bildirib: