“Real” Arda Gülerə görə baş həkimini qovdu
“Real”da gündəm yenə də Arda Gülərdi.
"Football-plus.az" xəbər verir ki, yayda “20+10” milyon avroya “Fənərbaxça”dan transfer edilən gənc türkiyəli ulduzun durumu artıq tragikomik hal almaqdadı. Zədələrdən qurtula bilməyən bu futbolçu heç cür Madrid nəhəngində debüt edə bilmir.
Arda əvvəlcə dizindən menisk əməliyyatı keçirərək 59 gün komandadan ayrı qaldı və 7 oyun qaçırdı. Ardından meydana çıxmaq fürsəti yaxalamadan əzələsini dartaraq bu dəfə 33 günlüyə sıradan çıxdı və daha 7 oyun qaçırdı. Sonra vəziyyət yavaş-yavaş düzəlmək üzrə idi. Ardanın adı hətta La Liqada “Rayo Valyekano” və Çempionlar Liqasında “Braqa” ilə oyunlarda iştirak ərizəsinə də salındı. Amma Karlo Ançelotti bu futbolçuya şans vermədi. Sonradan bunun səbəbi bəlli oldu və yeni faktlar üzə çıxdı. Təəssüf ki, Türkiyə futbolunun yeni ümidi “Real”da 3-cü dəfə zədələndi! Bu dəfə onun zədəsinin nə ilə bağlı olduğu bilinməsə də, təxminən 1 ay və ya 5-6 həftə oynaya bilməyəcəyi proqnozlaşdırılır. Ardanın başına gələnlərdən sonra “Real”da radikal bir addım atıldı. Belə ki, 2017-dən bu yana klubun baş həkimi vəzifəsini icra edən Niko Mihiçlə yollar ayrıldı! Əslində rəhbərlik artıq neçə müddətdi bu həkimin işindən narazı idi. Ötən mövsümdən bu yana Benzema, Alaba, Sebalyos kimi futbolçular bir neçə dəfə eyni zədəni yaşamışdılar. Arda Gülərin yaşadığı problemlər isə rəhbərliyin fikrini qətiləşdirdi. Bu arada “Marca” nəşrində 18 yaşlı futbolçu ilə bağlı yeni faktlar ortaya atılıb. Sən demə, Ardanın budəfəki ağrıları “Braqa” ilə oyundan əvvəlki məşqdə başlayıbmış. Normal şərtlərdə onun adı həmin oyunun iştirak ərizəsinə salınmamalıydı. Amma baş məşqçi Karlo Ançelotti məsuliyyəti üzərinə götürərək Ardanın həm komanda ilə qaynayıb-qarışması, həm də “Santyaqo Bernabeu”nun ab-havasını hiss etməsi üçün adını iştirak ərizəsinə salıbmış. Yəni Ançelotti bu futbolçunun meydana çıxa bilməyəcəyini əvvəlcədən bilirdi. Təsadüfi deyil ki, final fitindən sonra Ardaya ən birinci məhz Ançelotti təsəlli verərək ona sarıldı. Elə paltardəyişmə otağında da komanda yoldaşlarının göz yaşlarını saxlaya bilməyən gənc oyunçuya dəstək verdiyi bildirilir. “Marca”da Ardanın durumu ilə bağlı dərc olunan yazıda bunlar qeyd olunub:
“Burda işin psixoloji tərəfi çox önəmlidi. Komanda Ardanın üzərindən təzyiqi götürmək, eləcə də təqvimə baxmaq əvəzinə problemin kökünü tapmaq istəyir. İki dəfə hər şey türk oyunçunun yüksəlişə keçəcəyinə işarə edirdi. Amma hər şey alt-üst oldu. İndi klub bu durumun ona zərər verməsinin qarşısını almaq istəyir. Böyük gələcək vəd edən 18 yaşındakı bir gənci xilas etmək lazımdı. Artıq bunun üçün plan da qurulub. Onun qayıdışı üçün heç bir konkret tarix yoxdu və açıqlanmayacaq. İndi əsas məqsəd nəyin yanlış getdiyini tapmaq və Ardanın depressiyaya düşməsinin qarşısını almaqdı. Ançelotti Arda ilə mümkün olduğu qədər yaxından maraqlanır. “Braqa” ilə matçda hər kəs onun yanında olduğunu göstərdi. Halbuki onun oynayacaq durumda olmadığını bilirdilər. Ançelotti oyundan sonra futbolçusuna yaxınlaşaraq onu lazım olduğu qədər gözləyəcəyini göstərdi. Türkə olan güvən tamdı. Orqanizmi hələ inkişaf prosesindədi. Plan belədi: sıfır təzyiq və dünyanın bütün xoşbəxtliyini ona aşılamaq. Artıq onunla bağlı əsas ümidlər 2024-cü ilə qaldı”.
Digər xəbərlər
