“Mançester Siti”nin satışı ilə bağlı tarixçə sona çatmağa yaxındı.

“Football-plus.az” xəbər verir ki, insayder Fabritsio Romano bugünlərdə klubu almağa əsas iddialılardan şeyx Cassimin bu alverdən uzaqlaşdığını bildirib. Tələm-tələsik MY-dən qurtulmağa çalışan Qleyzer ailəsi qətərli bankirin 7 milyard dollarlıq təkliflindən imtina edib. Nəticədə bu məşhur və populyar klubu almağa yeganə iddiaçı kimi Cim Retkliff qalıb. Amerikadan olan rəhbərliyin əleyhinə indiyə qədər çoxlu aksiya təşkil edən azarkeşlər indi çox ümidlidi ki, ingiltərələri biznesmenin şərtləri Qleyzerləri razı salacaq. Bu ehtimal yetərincə yüksəkdi.

Əsas favorit deyildi
Ötən ilin noyabrında azarkeşlərin təzyiqi qarşısında təslim olan Qleyzerlər klubu satmağa hazır olduğunu elan etdi. Lap əvvəldən müştəri qismində şeyx Cassim ilə Cim Retkliff önə çıxdı. Qətərlilər bütün bu özünəməxsus yarış boyunca favorit sayılırdı, hətta Mbappeni “Old Trafford”a gətirəcəklərini vəd edirdilər. Ancaq sonradan sövdələşmə ləngidi. Qleyzer ailəsi şeyxlə qiymətlə bağlı razılığa gələ bilmədi, Retkliffin təklifi isə MY-nin minoritar səhmdarlarını qane etmədi. Nəinki klubun fanatları, “qırmızı şeytanlar”ın əfsanəsi Qari Nevill də çaşıb qaldı: “Qleyzerlərin heç nə satmadığı və ya heç nə etmədiyi ilə bağlı söhbətlərə inanmıram. Onlar nəsə etməlidi. Onların pulu qurtarıb, maliyyə durumu baxımından isə çarəsizdilər. Onlara investisiya lazımdı. Bundan başqa, kluba da daxildən neqativ təsir göstərirlər. Onlar üçün futbol, sadəcə, oyundu, düşünürlər ki, oyuncaqları var! Dünyanın ən nəhəng klublarından birinin sahibləri axmaq oyun oynayırlar”.

Bu ilin sentyabrında “Mançester Yunayted”in satışı ilə bağlı söhbət dayandı – bu xəbərin fonunda klub 500 milyon dollar ucuzlaşdı. Bunun ardından Qleyzerlər ən əsas aktivlərinə görə minumum 10 milyard qazanmaq fikrinə düşdü. Şeyx Cassim sonuncu təklifini irəli sürdü. 7 milyardlıq təklifə də “yox” cavabı alandan sonra yarışdan çıxdı. Belədə Retkliff əsas namizəd oldu.

Tədricən “həzm”
Sahibkar hələ sentyabrda klubu almaqla bağlı təklifini dəyişdi ki, sövdələşmə birdəfəlik pozulmasın. İngiltərəli əvvəlcə səhmlərin 69 faizini almağa, Amerikadan olan ailəyə isə minoritar paket saxlamağa çalışırdı, ancaq Qlyzerlər bu varianta heç baxmaq istəmədi. Nəhayət, oktyabrda bu iş ölü nöqtədən tərpəndi: belə bir informasiya peyda oldu ki, Retkliffin sahibi olduğu “Ineos” neft-kimya şirkəti minoritar səhm paketinə yiyələnmək, 2026-cı ilə qədər isə klubu tam almaq istəyir. İngiltərəli jurnalistlərə inansaq, Retkliff klub səhmlərinin 25 faizini 1,4 milyard funta alacaq. Biznesmenin bu təklifi Qleyzerləri MY-ni satmağa inandırdı.

“Çelsi”nin sahibi ola bilərdi
Retkliff Mançester ətrafında dünyaya gəlib və uşaqlıqdan “qırmızı şeytanlar”a azarkeşlik edib. Ancaq Londona köçəndən sonra “Çelsi”ni almağa çalışıb, sadəcə, danışıqlar uğursuzluqla nəticələnib. Görüşlərin birində fanatlar ondan soruşub ki, niyə Mançester klubunu almaqla bağlı təklif irəli sürmür? Retkliff isə belə cavab verib: “Həyatım boyunca “Mançester Yunayted”ə azarkeşlik edirəm... Ancaq “Yunayted” Qleyzerlərə məxsusdu. Mən Coel və Avram ilə görüşmüşəm, ancaq onlar klubu satmaq istəmir. Əlimi yanıma salıb otura və ümid edə bilmərəm ki, nə vaxtsa “Mançester Yunayted”i almaq mümkün olacaq”.

Belə şans yaranan kimi biznesmen dərhal səhnəyə çıxdı və sevimli klubu almaq üçün əlindən gələni etdi.

Azarkeşlər nə gözləsin?
Hazırda “qırmızı şeytanlar”ın ev arenası 74310 azarkeş qəbul edir. Retkliff stadionu 90 min yerliyə qədər genişləndirmək niyyətindədi. Yeri gəlmişkən, “Old Trafford”un yenidən qurulması haqda söhbətlər çoxdan gəzir, ancaq Qleyzerlərin belə layihə üçün pulu yoxdu. “Ineos” şirkəti isə bunun üçün əlavə vəsait ayıracaq.

“The Athletic”ə inansaq, Retkliff uzun müddətə “Mançester Yunayted”in himayədarı olmaq və bu yolda ortaya mütərəqqi baxış qoymaq fikrindədi. İngiltərəli hakimiyyəti ələ keçirən kimi 100 gün ərzində bütün strukturu yoxlayacaq. Eyni mənzərəni Todd Boeli “Çelsi”yə gələndə də görmüşük. Retkliff “Mançester Yunayted”in idman biznesinə tam nəzarət edəcək. O, yeni baş məşqçini, idman direktorunu və başqa vəzifə sahiblərini seçə biləcək. Çox güman, klubda əməlli-başlı “təmizlik” prosesi həyata keçiriləcək.

Ancaq baş məşqçis Erik ten Haqın narahat olmasına dəyməz: onun kreslosu hələ ki silkələnmir. ESPN xəbər verir ki, Retkliff niderlandlı mütəxəssisin işindən həddən ziyadə razıdı.

Baş direktor Riçard Arnoldla idman direktoru Con Mertonun problemləri başlaya bilər. Hələ 2019-cu ildə Cim onların işindən narazı idi: “Bu iki şəxs Fred kimi oyunçuların transferinə artıq pul ödəməklə mənasız xərclər edirlər. “Lill” və “Sauthempton” kimi gənc istedadları tapmağa çalışmırlar. “Yunayted” gənc oyunçulara pul qoymağı dayandırıb. Klubun kursunu dəyişiblər”.

Retkliff MY-ni Qleyzerlərdən tam azad edəcək. Belə görünür ki, indi fanatların ən böyük arzusu budu. Onların nifrət tarixçəsinin təməli 2005-ə gedib çıxır. Məhz onda Malkolm Qleyzer MY-ni tam ələ keçirərək bu qurumu açıq tipli səhmdar cəmiyyətdən özəl şirkətə çevirdi. Elə onda ilk etiraz dalğası başladı. Sonradan idarəçiliklə bağlı qəribə qərarlar, transfer bazarında iflas, Superliqanın yaradılması əhvalatı da baş verdi.

İlk illərdə Qleyzerləri fanatların qəzəbindən dahi Aleks Ferqyuson qurtarırdı. Komanda onun rəhbərliyi altında 2007, 2008, 2009, 2011 və 2013-cü illərdə çempion oldu, 2008-də Çempionlar Liqasını qazandı, 2009-da və 2011-də bu turnirin finalında oynadı. Bu titullar yığını olmasaydı, Amerikadan olan ailə Mançesteri daha erkən tərk edə bilərdi. Amma indi dəyişiklik dalğası heç vaxt olmadığı qədər yaxındı.