2021-ci il mayın 2-də “Mançester Yunayted” azarkeşləri “Liverpul”la çempionat oyununun axarını pozdular. Onlar Qleyzerlərin darıxdırıcı idarəçiliyindən bezərək “Old Trafford”u ələ keçirdilər və komandaların meydana çıxmasına imkan vermədilər.

İngiltərə premyer-liqasının tarixində ilk dəfə oyun fanatların başıpozluqluğu üzündən ləğv olundu. “Qırmızı şeytanlar”ın azarkeşləri amerikalı sahiblərə etiraz edirdilər. MY onların vaxtında hətta İngiltərədə belə top-klubların siyahısından çıxıb – mankunianlar son 10 ildə yalnız 5 dəfə finişə ilk “4-lük”də çatıblar və bir dəfə də çempion olmayıblar. Həmin gün aksiyadan sonra MY-nin əfsanəvi veteranı Qari Nevill yerə-göyə sığmırdı:

Məhz bu yay “qırmızı şeytanlar”, nəhayət, azarkeşlərin nifrət etdiyi bosslardan qurtula bilər – amerikalılar özləri də nəzarətdən çıxan oyuncaqdan bezib. Qleyzerlər klubu satmağa hazırdı, ancaq pul qazanmağa da ümid edirlər. Onlar 2005-də MY-ni 790 milyon funta alıbsa, indi danışıqlarda start nöqtəsi kimi 6 milyard götürülüb.

Klubun yeni sahibi ya şeyx Cassim olacaq, ya da biznesmen Cim Retkliff. Hər ikisi inanılmaz xərclərə hazırdı: Qleyzerlərin tələb etdiyi pulu ödəməyə, klubun borclarını ödəmək üçün daha 1 milyard ayırmağa, yeniyetmə Kriştiano Ronaldonun İngiltərəyə qədəm qoyduğu gündən bəri heç dəyişməyən məşq bazasını və “Old Trafford”u yenidən qurmağa. Ancaq amerikalılarla danışıqlar uzanır ki, bu da həm komandaya təsir göstərir, həm də fanatları və baş məşqçini qəzəbləndirir.

Danışıqlar nə vaxtdan davam edir?

Qleyzerlər ötən ilin noyabrında MY-ni satmağa hazır olduğunu elan etdi: alıcılar sırasında ingiltərəli milyarder Cim Retkliffin, şeyx Cassimin, Səudiyyə Ərəbistanından olan bir şirkətin, “Apple” korporasiyasının və başqa namizədlərin adı çəkilidi. Ancaq naz-qəmzəli amerakılar dərhal əksər potensial alıcıların marağını yox etdi:



Səbirli Cassim Qleyzerlərə artıq 5 təklif göndərib. “The Guardian”a inansaq, qətərli danışıqların uzanmasından çox məyusdu və alveri davam etdirmək istəmir. Bankir nə qədər qiyməti aşağı salmaq istəsə də, inadkar amerikalılar axır ki çoxdan gözlədikləri 6 milyard dollar tıklifini aldılar. Elə britaniyalı da göstərilən məbləği təklif etdi.

Bununla belə, Qleyzerlər sövdələşməyə hələ də “hə” demir. Belədə Cassim va-bank gedib: lazımi pulu təklif edib və cavab üçün son müddət kimi iyunun 9-nu müəyyənləşdirib. Qətərli anlayır ki, sövdələşməni yubatmaq olmaz. Yay “transfer pəncərəsi” artıq çoxdan möhtəşəm keçidlərlə göz qamaşdırır, bitməyən sövdləşmə halında isə mankunianlar yeni transferlər üçün hansı büdcə ayıracağını müəyyənləşdirə bilməz.

Danışıqlar artıq 8 aydı davam edir, premyer-liqada yeni mövsümün startına isə cəmi 7 həftə qalır. “Reuters”in yaydığı informasiyaya görə, Qleyzerlər, ümumiyyətlə, sövdələşməni bitirməyə tələsmirlər. Daha çox pul qazanmaq niyyəti ilə Cassim və Retkliff arasında bazarlığı davam etdirirlər. Şeyxin təklifini daha çox bəyənən amerikalılar üstəlik britaniyalı biznesmenə də təzyiq göstərirlər. “Times” iyunun ortasında xəbər yaydı ki, prosesin başa çatması üçün hələ üç ay da tələb olunur. Hadisələrin axarı onu göstərir ki, klub 2023/24 mövsümünə də köhnə sahiblərlə başlayacaq, yenilər isə transferlərə pul xərcləmək imkanı tapmayacaqlar.

MY Qleyzerlərə görə transfer kampaniyasını boşa verir

Premyer-liqanın top-klubları böyük entuziazmla “transfer bazarı”na girişib və artıq bir neçə qaynar sövdələşməni sənədləşdiriblər. MS “Çelsi”dən Mateo Kovaçiçi götürüb, londonlular özləri Kristofer Nkunkuya imza atdırıb, Kay Havertsi “Arsenal”a göndərib, “Liverpul” Aleksis Makallisterlə güclənib. Hətta “Tottenhem” də, demək olar ki, 100 milyon avro xərcləyib – “mahmızlar” Pedro Porro ilə Deyan Kuluşevskinin tamhüquqlu transferini həyata keçirib, həmçinin “Empoli”dən qapıçı Qulyelmo Vikarionu “qamarlayıb”.

“Qırmızı şeytanlar” 2022/23 mövsümündə əldə olunan tərəqqinin və Çempionlar Liqasına dönüşün fonunda “transfer pəncərəsi”ni böyük entuziazmla gözləyirdilər. Ancaq hələ ki mankunianların bank hesabında yeganə maliyyə hərəkətlənməsi 20 yaşlı Zidan İkbalın “Utrext”ə 1 milyon avroya satılması zamanı baş verib. Ambisiyalı planlardan danışan MY-nin çalışdırıcısı hələ ki heç kimi almayıb. Əvəzində belə görünür ki, iki potensial debütantı əldən veriblər – Kim Min Çje, çox güman, “Bavariya”nın yolunu tutacaq, Yurrien Timber “Arsenal”a keçidin biraddımlığındadı. “Old Trafford” yeni bossu gözləməkdəykən başqa transfer hədəfləri də əldən çıxır: Deklan Rays “Arsenal”la “Mançester Siti” arasında seçim edir, Moyzes Kaysedo artıq “Çelsi” ilə müqaviləni razılaşdırıb.

“Mirror”un informasiyasına görə, Erik ten Haq başverənlərə görə dəliyə dönüb. Qleyzerlər klub satılana qədər kimisə almaq fikrindən uzaqdılar ki, yersiz xərcdən, yeni sahibə maraqlı olmayacaq futbolçuları almaq riskindən qaçsınlar. Hərçənd niderlandlı mütəxəssis hələ yazda deyirdi ki, titul uğrunda mübarizə aparmaq üçün MY-yə top səviyyəli yenilər lazımdı:



“Qırmızı şeytanlar” mövsümlərarası dövrün əsas hədəflərini əldən verur. Hərçənd elə həmin Cassimin çox ambisiyalı planları var idi. İnsayder Fabritsio Romano xəbər verir ki, şeyxin əsas hədəfi Kilian Mbappedi. Ancaq Qleyzerlərin astagəlliyi üzündən MY nəinki fransalı ulduzdan, daha aşağı səviyyəli futbolçuların da xidmətindən məhrum ola bilər.

Azarkeşlər nə deyir?

MY fanatları amerikalıları klubu daha tez satmağa sövq etmək üçün üzərində “Glazersout” yazılan ənənəvi plakatlarla müntəzəm etiraz aksiyalarına çıxırlar. Komandanın yeni formasının təqdimat günündə - iyunun 27-də fan-şopun önünə toplaşan azarkeşlər dükanın çalışmasına imkan verməyib. 1958 birliyinin təmsilçiləri səhər saat 9.45-də fan-şopun önünə toplaşıb, 10.00-da isə ora bağlanıb.

Ancaq azarkeşlərin narazılığı, etiraz aksiyaları Qleyzerlərin heç tükünə də təsir etmir. Amerikalılar artıq çoxdan təhqirlərə və klubu tərk etmək çağırışlarına öyrəşib. Ümumiyyətlə, “Old Trafford” klubun sahiblərinə nifrətin qalasına çevrilib. Amerikalılar MY-ni ələ keçirdiyi ilk gündən fanatları qıcıqlandırıblar – onlardan ən radikal olanlar 2005-də hətta alternativ “Yunayted of Mançester” klubunu da yaradıblar. Bu müddətdə sahiblərin davranışı qətiyyən dəyişməyib – onlar əvvəlki xəsisliyi qoruyurlar və sanki “qırmızı şeytanlar”ın tərəqqisində maraqlı deyillər. Qleyzerlərin praktiki cəhətdən istənilən hərəkəti MY fanatlarını özündən çıxarır. Düzdü, amerikalılar yüzminlərlə fanatın çoxdankı arzusunu gerçəkləşdirməyə - klubu satmağa çox yaxındı. Amma bu proses bir qədər də uzansa, 2023/24 mövsümü də boşa verilsə, onların qəzəbinin hansı səviyyəyə qalxacağını təsəvvür etmək belə çətindi.

ORXAN