Bazar günü “Neftçi Arena”da möhtəşəm ab-hava var idi. Düzdü, matçı 4600 nəfər izləyirdi. Bu, derbi oyunları üçün aşağı göstəricidi. Lakin buna da şükür etməliyik. Hava da futbol oynamaq, futbola baxmaq üçün ideal idi. Düzdü, ot örtüyündə bəzi problemlər var idi. Bütün bunların fonunda 18.30-da oyun start götürdü.

Əslində “Neftçi”nin ilk “11-liy”i açıqlananda futbol ictimaiyyəti təəccüblənmişdi. Çünki kapitan Emin Mahmudov əsas həyətdə yox idi. Kenni və Lebonun da yoxluğu təəccübü bir qədər də artırmışdı. Bütün bunlara baxmayaraq, flaqman oyuna sürətli başladı. 14-cü və 16-cı dəqiqələrdə Mirzov ardıcıl iki epizodda qola yaxın oldu. İlk məqamda Yusif etibarlı oynadı. İkincidə isə rusiyalının zərbəsi dəqiq alınmadı. Təbii ki, “Sabah” ancaq müdafiə olunmurdu. Kollektivin ən fəal oyunçusu Namik idi. Vinger sabiq komandasını cəzalandırmağa çalışırdı. 23-cü dəqiqədə milli üzvünün uzaqdan zərbəsininin qarşısını Brkiç ala bildi. İlk hissədə diqqətçəkən hücumlardan birini də “Neftçi” yaratdı. Qaranın ötürməsindən sonra Ozobiç qapıya paralel zərbə endirdi. Lakin Yusif yenə etibarlı oynadı.

Ümumiyyətlə, fasiləyə kimi ərazi üstünlüyü “ağ-qaralar”da idi. Lakin Adrian Mutunun komandasının canfəşanlığı işə yaramadı. İlk hissə qolsuz başa çatdı.

Fasilədən sonra isə ssenari dəyişdi. Düzdü, “bayquşlar” dəyişiklik etməmişdi. Lakin oyun planında Masazır klubu “ağ-qaralar”ı üstələyirdi. 48-ci dəqiqədə “tələbələr” hesabı açmağa yaxın oldu. Parrisin künc zərbəsindən ötürdüyü topu Çakla başla qapıya göndərdi. Lakin “dəri kürə” dirəkdən qayıtdı. 52-ci dəqiqədə isə “Sabah” qol vurdu. Sekidikanın ötürməsini Letiç qapıya göndərdi. Onun zərbəsi hər iki dirəyə dəyərək tora daxil oldu. Lakin yan xətt hakiminin bayrağı qalxdı. Hücum zamanı Sekidika oyundankənar vəziyyətdə imiş. Beləliklə, qol qeydə alınmadı. 66-cı dəqiqədə “Sabah” yenə təhlükəli vəziyyət yaratdı. Yenə sol cinahda şou göstərən Sekidika qapı önünə ötürmə etdi. Namikin başla zərbəsinin qarşısını Brkiç çətinliklə ala bildi.

Son 10 dəqiqədə hər iki komanda hücuma atıldı. Artıq meydanda açıq futbol gedirdi. Mutu Emin, Kenni və Lebonu mübarizəyə atmışdı. 87-ci dəqiqədə bu “üçlüy”ün qurduğu hücum təhlükəli alındı. Emin uzun reyd edərək Lebona ötürmə verdi. Vinger bir qədər topu özündə saxladıqdan sonra Kennini gördü. İsraillinin zərbəsi isə az fərqlə qapının üstündən keçdi.

Oyunun son dəqiqələri “Sabah”ın üstünlüyü şəraitində keçdi. Ardıcıl 2 epizodda Volkov və Amin qol vurmağa yaxın oldu. Lakin hər iki futbolçunun zərbəsi qeyri-dəqiq alındı. 90+3-cü dəqiqədə “Sabah” istəyinə çatdı. Letiç qeyri-adi ötürmə ilə rəqibi məyus etdi. Düzdü, Rəvan Həmzəzadə əvvəlcə oyundankənar vəziyyət qeydə aldı. Lakin VAR-dakı hakimlər 3 dəqiqə epizodu dəyərləndirdikdən sonra referi mərkəzi göstərdi. “Neftçi”nin hesabı bərabərləşdirmək üçün nə gücü qalmışdı, nə də vaxtı. Beləliklə, gərgin və maraqlı keçən derbidə “Sabah” qəbələ qazandı.

Gözdən qaçmadı
* “Neftçi” matça gələn azarkeşlərinə bayraq hədiyyə edirdi.
* Cəzalı Murad Musayev qarşılaşmanı media sektorunu yanındakı tribunadan izləyirdi.
* Emin Mahmudov meydana çıxanda kapitan sarğısı Brkiçdə idi. Lakin xorvatiyalı qolkiper buna məhəl qoymadı. Sona kimi sarğı Brkiçdə qaldı.
* Elvin Camalov meydandan çıxanda kapitanlıq sarğısını Amin Seydiyevin qoluna taxmaq istəyirdi. Lakin müdafiəçi əli ilə Aleksey İsayevi göstərdi. Elvin də sarğını millimizin üzvünə verdi.
* Oyun bitəndən sonra Emin Mahmudov əsəbi idi. O, rəqibin oyunçularından kimləsə mübahisə etmək istəyirdi. Lakin “Sabah”ın tərcüməçisi Emini qucaqlayaraq stadiondan çıxartdı.

İLKİN SULTANLI