"Bu məqamlar göstərdi ki, “Neftçi” keyfiyyətli komandadı" - Ferdi Druyif
“Çox çətin oyun alındı. 90 dəqiqədə matçın taleyini həll edəcəyimizi düşünürdük. Lakin bu alınmadı. Məqsədimiz rəqibi tez cəzalandırmaq idi. Lakin “Neftçi” yaxşı müdafiə olunurdu. Düzdü, ilk hissədə iki zərbəmiz dirəkdən döndü. Fasilədən sonra isə bizə lazım olan qolu vurduq. Meydana daxil olanda düşünürdüm ki, qol vuracam. Lakin bunun son dəqiqələrdə baş verəcəyini düşünmürdüm. Sevinirəm ki, komandamın mərhələ keçməsinə səbəb oldum”.
Bu sözləri isə "Football-plus.az"a açıqlamasında “Rapid”in növbəti mərhələyə daşıyan qolun müəllifi Ferdi Druyif dedi. Hücumçu “Neftçi” üzərində qazanılan 2:0 hesablı qələbədən məmnunluğunu iafdə etdi. 113-cü dəqiqədə komandasını pley-offa daşıyan qola imza atan 24 yaşlı niderlandlı forvard daha çox qol vurmalı olduqlarını da sözlərinə əlavə etdi:
“Daha çox qol vurmalıydıq. Qarşılaşmanın penalti seriyasına qədər uzanmasını istəmirdik. Çünki orda şanslar 50-nin 50-yədi. Çətin, uzun yol idi. Həm də mənim üçün çox yaxşı geridönüş oldu”.
Drüyif “Neftçi”dən belə oyun gözləmədiklərini də dilə gətirdi:
“Bakıda rəqib əla mübarizə apardı. Düzdü, son dəqiqələrdə lazım olan qolu vura bilmişdik. Lakin həmin qarşılaşmada “Neftçi” bizi olduqca təəccübləndirdi. Komandanın Vyanada müdafiə futbolu sərgiləyəcəyini bilirdik. Lakin əks-hücumlarda bu qədər yaxşı olacaqlarını düşünməzdik. Onların açıq futbol sərgiləcəyəcəklərini gözləyirdik. Bu baxımdan “Neftçi” məni təəccübləndirdi. Buna baxmayaraq, üç real qol şansı yaratdılar. İki epizodda bəxtimizin gətirdiyini söyləyə bilərəm. Bu məqamlar göstərdi ki, “Neftçi” keyfiyyətli komandadı. Belə rəqibi üstələdiyimizə görə sevincliyəm. İndi çempionat matçından sonra pley-off görüşləri haqda düşünə bilərik”.
