Misli premyer-liqasında 11 turun geridə qalmasına baxmayaraq, “Qəbələ” özünə gələ bilmir. Bölgə təmsilçisi 8 xalla turnir cədvəlinin 9-cu pilləsində qərarlaşıb. Halbuki “qırmızı-qaralar”ın yenilənmiş heyəti ilə bağlı da gözləntilər böyük idi.
Görəsən, “Qəbələ”nin durumu niyə düzəlmir? Vəziyyətdən yaxa qurtarmaq üçün hansı işlər görülür?
“Football-plus.az” bu və başqa suallarla kapitan Urfan Abbasova müraciət etdi.
- Komanda mövsümə uğursuz başladı. Bir neçə oyundan sonra qaneedici nəticələr gözlənilirdi ki, hələ işıq ucu görünmür. Bu nə ilə bağlıdı?
- İstər məşqlərdə, istərsə də oyunlarda əlimizdən gələni edirik. Hədəf həmişə 3 xal olub. Məncə, başverənlərin şanssızlıqdan başqa izahı yoxdu.
- Komanda yay fasiləsində aparıcı oyunçularını itirsə də, yeni futbolçularla da müqavilə imzaladı. Lakin transferlər komandaya uyğunlaşmaqda çətinlik çəkir. Onlara nə mane olur?
- Əlbəttə, heç nə. Hər biri ilə səmimi münasibət yaratmışıq. Yəqin ki, daha çox zaman lazımdı. Geriyə baxmağın, uğursuzluqların üzərində dayanmağın tərəfdarı deyilik.
- 11 oyunun yalnız ikisində qələbə qazanmısız.
- 11-ci turda “Sumqayıt”la oyunda qol vəziyyətlərindən yararlana bilmədik. Ümumiyyətlə, mövsüm başlayandan xeyli şansı boşa vermişik. Həqiqətən son anda nəsə çatışmır. 10-cu turda “Araz-Naxçıvan”la oyunda iki “qırmızı” aldıq. Belə bəxtsizliklərdən sonra sabit və dayanıqlı oyun göstərmək çətinləşir.
- Növbəti tur “Qəbələ” - “Neftçi” görüşü keçiriləcək. Hazırlıq necə gedir?
- Psixoloji cəhətdən hər şey qaydasındadı. Motivasiyamız yüksəkdi. Azarkeş dəstəyi də bizimlə olacaq. Düzdü, “Neftçi” də yaxşı rəqibdi. Ötən tur məğlub olduqları üçün daha ciddi yanaşacaqlar. Lakin qələbə qazanacağımıza inanırıq. Şanssızlıqlardan biri də zədəlilərin çox olmasıdı. Məncə, sağalıb heyətə qoşulsalar, işimiz asanlaşacaq.
- Kapitan kimi özün haqda nə düşünürsən? Səncə, vəzifənin öhdəsindən gələ bilirsən?
- Hər kəs meydanda əlindən gələni edir ki, azarkeşləri sevindirək, ortaya nəticə, həmçinin baxımlı oyun qoyaq. Təbii ki, bu sırada mən də varam. Amma olmayanda olmur. Uğursuz nəticələrdən sonra özümdən razı qaldığımı dilə gətirsəm, məntiqəuyğun olmaz. Çalışırıq ki, ən yaxşısını edək. Ümumiyyətlə, nə qələbə, nə də məğlubiyyət bir nəfərin işi deyil. Futbol komanda oyunudu. Nəyisə özümlə və ya başqasıyla əlaqələndirmək istəmirəm.
KƏNAN BAHADIR