Samir Abasov qərarları sıralayanda hakimlər yadına düşmürdü.

Lakin işlər yolunda getməyən kimi onları “gestapo” adlandırmaqdan çəkinmədi. Bütün dünyanın lənət oxuduğu Hitlerin məxfi polisinin adını Azərbaycan futboluna yalnız Samir bəy yamaya bilərdi ki, yamadı da! Bildiyiniz kimi Hitler Almaniyasında gestapo sərhədsiz, amansız zorakılıqla ad çıxarıb, bu quruma “gözün üstə qaşın var” deyən olmayıb. Görəsən, Samir bəyin “gestapo” ittihamı hesabat turunun ab-havasına uyğundu? Hakimlər futbolçulara 25 sarı, 2 qırmızı vərəqə göstərib. Yəni hər oyuna orta hesabla 5 “sarı”, 0,4 qırmızı düşür. Odu ki, Abasov yeni ifadə tapmalıdı, gestapo yaramadı!

Səbail – Neftçi, ƏLİYAR AĞAYEV
Məhsuldar və gərgin qarşılaşma izləsək də, hakim səhvlərinə rast gəlmədik. İlk sarı vərəqə 32-ci dəqiqədə əks-hücumun qarşısını kobudluqla alan Valdemar Almeydaya göstərildi. Ozobiç isə Valdemarın ardından “dənizçilər”in digər üzvü Yusif Nəbiyevin də vərəqə ilə cəzalanmasına şərait yaratdı. Nəbiyev də Ozobiçi arxadan dartdığı üçün hakim tərəfindən bağışlanmadı və layiqli olduğu “sarı”nı aldı. 83-cü dəqiqədə Yuri Matias Pedro Nunoya qarşı qayda pozuntusuna görə haqlı şəkildə sarı vərəqəyə layiq görüldü. 90+1-ci dəqiqədə istə Mark Tamaş vaxt öldürdüyü üçün vərəqəyə layiq görüldü. Əslində Tamaşın etdiyi hərəkət futbolun yazılmayan qanunlarında biridi. Əlbəttə, öndə olan komandanın futbolçuları belə addım atır. Lakin hər dəfə də referilər bunu bağışlamır.

Qəbələ - Araz-Naxçıvan, TURAL QURBANOV
Oyunun gərgin keçəcəyi əvvəlcədən bəlliydi. Bu da hakimin təzyiq altında olması demək idi. Tural Qurbanovun start fitindən sonra "Qəbələ" “1-ci nömrə” kimi oynamağa başladı. Referi matçda tempin aşağı düşməməsi üçün çox çalışdı. Buna rəğmən, qərarları arasında müzakirəyə açıq olanlar da var idi. 28-ci dəqiqədə topu ələ keçirən Kuzmanoviç qapıçıyla təkbətəkə çıxarkən İlkin onun qarşısını kobudluqla aldı. Referi müdafiəçiyə birbaşa qırmızı göstərdi. Həm səbəbkar, həm də meydan sahiblərinin bütün oyunçuları bu qərara kəskin etiraz etdi. 46-cı və 56-cı dəqiqələrdə mübarizə epizodlarında Xalayla yerdə qalsa da, ədalət təmsilçisinin fiti susdu. Amma hər iki epizod kənardan qayda pozuntusu kimi göründü. 60-cı dəqiqədə elə həmin Xalayla Kadiri top uğrunda mübarizə apararkən rəqibinin üzünə zərbə endirdi. Referi 2-ci “sarı”nı göstərməklə "Qəbələ"ni növbəti dəfə azlıqda qoydu. 81-ci dəqiqədə Allaşın cərimə meydançasına ötürməsinə Afriko ayaq qoyub hesab arasında fərqi azaltsa da, qol VAR-da yoxlanılandan sonra hesaba alınmadı. Tural Qurbanovun verdiyi qərarlar şübhəliydi. Odu ki, hakim idarəçiliyinə bədbin yanaşıram. Xülasə hakimin işi ciddi şəkildə təhlil olunmalıdı.

Sabah – Sumqayıt, NİCAT İSMAYILLI
Nicat İsmayıllı yüksək templə start götürən matçda açıq futbola şərait yaratdı. Lakin hesabda geridə olan “Sabah” futbolçularının intizamsızlığı getdikcə artdığından müdaxilə labüd idi. Hakim onları və son dəqiqələrdə kobud çıxış edən qonaqları sarı vərəqələrlə sakitləşdirdi. Oyunboyu emosional davranış sərgiləyən Samir Abasov da “fit sahibi”ndən sarı vərəqə gördü. “Sabah”ın texniki zonasında isə qəzəb hiss olunurdu. Onlar hakimin, demək olar ki, bütün qərarlarından şikayətlənirdi. Nicat vəziyyətdən çıxış yolunu Murad Musayevə “sarı”, İlqar İsrafilova “qırmızı” verməkdə tapdı. Oyundan sonra Samir Abasov “idarəçiliyi gestapoya çeviriblər” desə də, “ümumiyətlə yaxşı idi” sözləriylə fikrini anlaşılmaz ifadə etdi. Ümumiyyətlə, ədalət təmsilçisi həm cəzalarda, həm də oyuna artırılan vaxt baxımından haqlı görünür.

Turan Tovuz – Qarabağ, FƏRİD HACIYEV
Gənc hakim oyunu o qədər də yaxşı idarə etmədi. Daha çox "Turan Tovuz"un əlehinə qərarlar verildi. Hətta bununla bağlı "boz qurd" sosial şəbəkə hesabında etiraz paylaşımı da edib. Əsas problem Ayxan Abbasovun komandasının sayılmayan qoludu. Bu epizodda hakimlər briqadası Faiq Hacıyevin Kevin Medinaya qarşı qaydanı pozduğunu bildirdi. Lakin görüntüləri təkrar izlədikcə futbolçular arasında adi ikili mübarizə olduğu açıq-aşkar götünür. Bir sözlə, Fərid Hacıyev və briqadası "Turan Tovuz"un haqqını yedi.

Kəpəz - Zirə, RAUF ALLAHVERDİYEV
Referi oyunu yaxşı idarə etdi. Ümumiyyətlə, matç o qədər maraqsız keçdi ki, hakimlər nəsə səhv qərar verə bilmədi. Amma bəzi epizodlarda Rəşad Sadıq Rauf Allahverdiyevə etiraz edirdi. Bu da gənc mütəxəssisin ənənəvi özəlliyidi. Ümumilikdə referinin idarəçiliyini qənaətbəxş saymaq olar.