Bu mövsüm Azərbaycan futbolunda iki məşqçi daha çox diqqət mərkəzindədi.

Bunlar Şahin Diniyevlə Azər Bağırovdu. Hər biri yaxşı komanda formalaşdıra bilib, 9 turdan sonra premyer-liqada 3-4-cü pillələrdə qərarlaşıblar. Bu səbəbdən də bir çox media qurumları bu mütəxəssislərlə tez-tez əlaqə yaradaraq açıqlama və ya müsahibə alır. Onlardan belə komanda formalaşdıra bilməklərinin səbəblərini soruşurlar. Ötən sayımızda biz də Şahin Diniyevə yer verdik. Həmkarım Kənan Bahadır mütəxəssislə əlaqə saxlayaraq ölkə futbolundakı gündəmi müzakirə edib. “Səbail”in çalışdırıcısının müsahibənin sonuncu sualına verdiyi cavab diqqətimi çəkdi.

- Çoxu deyir ki, yığmanı yerli mütəxəssis çalışdırmalıdı. Ən təcrübəlilər siyahısında Əsgər Abdullayevlə yanaşı, sizin də adınız çəkilir. Bu haqda nə düşünürsüz?
- Səmimi deyəcəm, mən “Səbail”də xoşbəxtəm. Burda hər şey yaxşıdı və hədəflərimiz var. Uğura çatmaq üçün çalışırıq. Baş məşqçi dəyişikliyinə gəlincə, əsas məsələnin bu olduğunu düşünmürəm. Müstəqillik dövrünə nəzər salsaq, görərik ki, hər çətin dönəmdə baş məşqçi dəyişib. Amma yenə də xüsusi inkişaf nəzərə çarpmır. 30 ildi eyni tendensiya davam edir. Bəlkə sürücünü yox, avtomobili dəyişək? Reallıq budu ki, böyük çatışmazlıqlara köklənmədikcə fövqəladə nəsə gözləmək absurddu.

Maraqlı fikirdi. Amma heç də anlaşılan deyil. Şahin Diniyevin fikirləri ikibaşlıdı. Təcrübəli mütəxəssis nə demək istəyir? Bu fikirlər mənə tanışdı. AÇ-2024-ün seçmə mərhələsində Estoniya ilə Bakıda keçirilən oyundan sonra Canni de Byazi aşağı-yuxarı belə cümlə işlətmişdi:

De Byazi bu fikirləri səsləndirəndə açıq-aşkar futbolçuların keyfiyyətinə söz vurmuşdu. Ola bilər ki, Şahin Diniyev də onunla həmfikir olsun. Yəni düşünür ki, Azərbaycan millisinin heyətində çıxış edən futbolçuların keyfiyyət göstəriciləri aşağıdı. Sürücü Canni de Byazidisə, avtomobil də oyunçular olmalıdı. Amma gəlin daha dərindən düşünək. Bu gün millinin heyətində çıxış edən əsas futbolçulardan biri Coşqun Diniyevdi - Şahin bəyin oğlu. “Səbail”dən yığmaya Yusif Nəbiyev də çağırılıb. İnanmıram ki, “dənizçilər”in çalışdırıcısı həm oğlunun, həm də futbolçusunun oyun keyfiyyətlərindən narazı olsun. Kim öz ayranına turş deyər ki?! Deməli, Şahin Diniyev avtomobil deyəndə futbolçuları yox, federasiyanı nəzərdə tutur.

Deyəsən, zaman keçdikcə insanların fikirləri də dəyişir. Aşağı-yuxarı AFFA-nın bütün layihələrində yer alan Şahin Diniyev indi qurumun iş mexanizimdən narazılıq edir? Əslində bu məqam sevindiricidi. Deməli, futbol mütəxəssisləri problem barədə düşünür. Həqiqətən sistemdə çatışmazlığın olduğunu hamı bilir. Lakin ağsaqqal futbol veteranları bunu dilə gətirmirdilər. Hamısının özünə görə səbəbləri var. İndi isə “Səbail”in baş məşqçisi bununla barışmaq istəmir.

Bəli, Şahin Diniyev düz buyurursuz, problem avtomobildədi. AFFA-nın iş sistemində köklü problemlər var idi, ancaq yenilər gəlib və nəsə etməyə çalışırlar. Amma sizə nə oldu? İllərlə Məşqçilər Komitəsində yer aldız, oyunlara, səfərlərə yollandız. Sizin qurum məqsədli şəkildə yaradılmışdı. Məşqçilər Komitəsi millinin uğursuzluğu barədə raport hazırlayaraq AFFA-ya təqdim etməli, problemin həlli istiqamətində işlər görməli idi. Hazırda formal cəhətdən fəaliyyətini davam etdirən qurum nə ilə yadda qaldı? Bir dəfə də mediada açıq-aşkar Yurçeviçin, De Byazinin səhvlərini dilə gətirmədiz. İndi anlayırsız ki, sistemdə səhv var.

Bildiyimə görə, əvəzedicilərin çempionatının ləğv olunaraq 1-ci divizionla birləşdirilməsi təklifini Məşqçilər Komitəsi vermişdi. Sizin də üzvü olduğunuz qurumun fikrinin hansı fəsadlara yol açdığını hamı gördü. Düşünürdüz ki, belədə gənc futbolçuların oyun praktikası artacaq. Amma alınmadı. Hətta nə qədər oyun alğı-satqısı halları yaşandı. Premyer-liqa təmsilçiləri çempionatın son turlarında əsas heyət üzvlərini əvəzedici komandaya göndərirdilər ki, mükafatçılar sırasına düşə bilsinlər. Bu da gənc futbolçuların motivasiyasını öldürdü, bir çoxunun inkişafına mane oldu.

Ötən mövsümün ikinci yarısından “Səbail”ə rəhbərlik edirsiz. Baş məşqçi təyin olunandan sonra mətbuat konfranslarında daim deyirdiz ki, elitanı hansısa komanda tərk etməməlidi. Amma başa düşmürdüz ki, çempionatın maraqlı keçməsinin səbəbi elə bu sistemin tətbiq olunması ilə bağlı idi.
İndi sizin də iştirakınızla baş verən uğursuzluqlardan sonra federasiyadakı dostlara söz atmaq nədi? Amma yenə də sizi təbrik edirəm. Cəsarətinizi toplayaraq dostlarınızın – AFFA-nın fəaliyyətində probleminin olduğunu dilə gətirirsiz.

İLKİN SULTANLI