Qışdan bəri uzanan “Neqreyra işi” ilə bağlı yeni xəbərlər var.

"Football-plus.az" xəbər verir ki, iş ondadı ki, “Barseolna” rüşvətxorluq ittihamı ilə üzləşib. İttiham təsdiqlənərsə, klub aşağı dəstəyə göndərilə və avrokuboklardan uzaqlaşdırıla bilər. İspaniyanın bir neçə qaynağında yer alan xəbərə görə, bu işi aparan Barselona İstintaq Məhkəməsinin rəhbəri Xoakin Agirre “Barselona”nın İspaniya Kral Futbol Federasiyasının texniki hakimlər komitəsinin vitse-prezidentinə 7,5 milyon avro ödəməsini cinayət sayıb. Həmin şəxs – Xose Mariya Enrikes Neqreyra, onun oğlu, həmçinin Kataloniya klubunun sabiq prezidentləri Xosep Bartomeu ilə Sandro Rosel də rüşvətxorluqda ittiham olunur.

Məhkəmənin mövqeyi ondan ibarətdi ki, heç bir vəzifəli şəxs birbaşa öhdəliklərini yerinə yetirdiyinə görə hansısa əlavə pul ala bilməz. Hakim Ali Məhkəmənin praktikasında olan əvvəlki presedentlərə əsaslanır.

Bu ittihamlar məhkəmədə təsdiqlənərsə, “Barsa”nı aşağı dəstəyə göndərilmək və avrokuboklardan uzaqlaşdırılmaq təhlükəsi gözləyir. “Mundo Deportivo”nun verdiyi informasiyaya görə, Kataloniya klubu hələ ona irəli sürülən ittihamlarla bağlı rəsmi bildiriş almayıb. Ancaq belə dönüşün “Barsa”nı çıxılmaz duruma saldığını da demək çətindi. Klubda lap əvvəldən hadisələrin belə axarına hazırlaşıblar və belə vəziyyətdə düşəcəkləri təqdirdə fəaliyyət planı üzərində işləyiblər. Amma planın nədən ibarət olduğu hələ bəlli deyil.

Deyilirdi ki, “Barselona” bu məsələ ilə bağlı ictimaiyyətə hansısa açıqlama verməyi düşünmür. Ancaq komandanın baş məşqçisi Xavi Ernandes artıq ittihama münasibət bildirib: “Növbəti həftə Neqreyra haqda daha bir xəbər yayılacaq, 15 gün sonra daha biri, ayyarım sonra daha biri... Siz artıq mənim bu məsələyə münasibətimdən xəbərdarsız. İstənilən qəzetin arxivinə baxsaz, görəcəksiz. Məndə heç vaxt belə hiss olmayıb ki, hakimlər “Barselona”ya yardım edir. Heç vaxt. “Neqreyra işi” haqda düşünmürəm. Komanda ilə bağlı gündəlik işim yetərincə çoxdu”.

İspaniyada “Barselona” ilə ulduzu heç vaxt barışmayanlardan biri də Xavyer Tebasdı. La Liqanın rəhbəri kluba münasibətdə sanksiyalar üzərində düşünür: “Narahatedici durumdu. Neqreyranın məsələsində sonrakı təhqiqat vacibdi. Hadisələrin axarına, hakimlərin təyinatına müdaxilənin səviyyəsini müəyyənləşdirmək üçün. Təsir etməyə cəhd artıq cinayət məsuliyyəti yaradır. Hakim bir neçə gün əvvəl bu məqamı artıq vurğulayıb. Bu artıq idman korrupsiyasıdı. “Barsa”nın Neqreyraya ödəniş etməsi çox ciddi pozuntudu. Hədəf hakimlərə təsir etmək olubsa, onda bu cinayətdi. Məsələ cinayət işi müstəvisində həllini tapandan sonra “Barselona”ya münasibətdə sanksiyalar haqda düşünəcəyik. Hesab edirəm ki, müntəzəm olmayan ödənişlərin əlaməti var. Aydınlaşdırmaq lazımdı ki, “Barsa” tərəfindən oyunların nəticəsinə təsir etmək niyyəti olubmu? Bu iş sona çatmağa yaxındı”.

Bir sözlə, tezliklə “Barsa”nın aqibətindən xəbər tutacağıq. Kim bilir, bəlkə bununla yeni münaqişənin də əsası qoyulacaq.