“Hatayspor” bu mövsüm hər şeyə sıfırdan başlayıb. Burda yeni layihə var. Komandanın başında Volkan Dəmirəl dayanıb. Zidan Fransa üçün necə böyük əfsanədisə, Volkan da Türkiyə üçün o cür əfsanədi. Layihəyə uyğun oyunçular seçib. Bir-birimizi hələ 100 faiz tanımasaq da, qələbə üçün hər kəs meydanda can qoyur. Volkan mənimlə ilk dəfə “instaqram” vasitəsilə əlaqə yaratdı. Futbolçunun məşqçi tərəfindən həqiqətən də istənildiyini hiss etməsi önəmli məqamdı. Komandaya transfer olunarkən Hatayda yaşayacağımızı düşünürdüm. Amma İstanbulda yaşayırıq. Ev oyunlarımızı maşınla Hataydan 3 saatlıq məsafədə yerləşən Mersində keçiririk. Hələ də Hatayda olmamışam. Burda özümü çox rahat hiss edirəm. Zəlzələdən əziyyət çəkmiş insanlara az da olsa, təbəssüm bəxş etmək bizim əlimizdədi. Türkiyə Futbol Federasiyası bizim üçün baza ayırıb. Məşqlərimizi orda keçirik. Amma ilin sonuna yaxın ola bilər ki, başqa şəhərə və ya Hataya qayıdaq. Bu, bir qədər çətinlik yaradır, amma şikayət edəcək durumda deyilik. Çünki çox həssas məsələdi. Volkan Dəmirəl deyir ki, Hataya qayıdandan sonra bizim üçün hər şey daha rahat olacaq. Türkiyədə karyeramın necə alınacağını bilmirəm. Amma bura 6 aylığa gəlməmişəm. Yayda Dubaydan da təklif almışdım. Amma baş məşqçimiz “Dubaydakı klub kiçik klubdu, burda isə özümü göstərsən, böyük klublardan birinə keçə bilərsən” dedi. Ona görə də Dubay və ya Səudiyyə Ərəbistanı bir qədər gözləsə də, olar. “Trabzonspor”la oyun bizim üçün çox uğursuz başlasa da, sonluq inanılmaz alındı. Qol vurmağım məni ikiqat sevindirdi”.