Daha bir gənc türkiyəli futbolçu legioner həyatı yaşamağa hazırlaşır.

"Football-plus.az" xəbər verir ki, söhbət ''Hatayspor''un 21 yaşlı forvardı Bertuğ Yıldırımdan gedir.

''Sports Digital''ın məlumatına görə bu futbolçu Fransa təmsilçisi ''Renn''ə transfer olunmaq üzrədi. Bertuğ tibbi müayinədən keçmək və anlaşmanın son detallarını razılaşdırmaq üçün ən qısa müddətdə Fransaya uçacaq. ''Hatayspor''un bu satışdan 5 milyon avro gəlir əldə edəcəyi gözlənilir. Bu, baş verəcəyi halda klub tarixinin yeni rekordu qeydə alınacaq.

Buna qədər ən bahalı satış Aaron Bupendza idi. 2020/21-də ''Hatayspor''un heyətində vurduğu 22 qolla superliqanın bombardiri olan Bupendza 2 il öncə 4,25 milyon avroya Qətər təmsilçisi ''Əl-Ərəbi''yə transfer olunmuşdu. Bertuğ hataylıların baş məşqçisi Volkan Dəmirəlin ən sevimli futbolçularından idi. Dəmirəl onu ''türkiyəli Holann'' adlandırırdı. ''Sarıyer''in ''altyapı''sında yetişən Bertuğ 2021-dən ''Hatayspor''un şərəfini qoruyurdu. Ötən mövsümün ikinci dövrəsini ''Antalyaspor''da icarədə keçirən istedadlı oyunçu ''Hatayspor''da 37 rəsmi oyunda 6 qol, 3 məhsuldar ötürməlik performans sərgiləyib. Qeyd edək ki, ''Renn''də daha bir türkiyəli oyunçu - qapıçı Doğan Ələmdar da çıxış edir.

ƏLİ