Misli premyer-liqasında 7-ci tur davam edir.

“Football-plus.az” xəbər verir ki, “Səbail” “Araz-Naxçıvan”ı qəbul edib - 1:0. Matçdan sonra meydan sahiblərinin çalışdırıcısı Şahin Diniyevin mətbuat konfransı keçirilib. Sizi onun fikirləri ilə tanış edirik:

- Bu, "Səbail"in ən yaxşı dönəmidi?
- Potensialımız var. Bu gün Pedro, Yusif və Qomis zədəli halda oynayırdı. Tam formada deyillər. Bundan da yaxşı oynaya bilərik. Biz birlikdə güclüyük, bir futbolçudan asılı deyilik.

- Komanda artıq ikinci pillədədi. Zirvədə qalmaq mümkün olacaq?
- Tam əminliklə deyə bilərəm ki, eyforiya yoxdu. Mən buna imkan verməyəcəm. Yuxarı çıxmaq asandı, orada qalmaq çox çətindi. Artıq hər komanda bizi ciddi qəbul edəcək. Bəlkə də kimlərinsə gözləmədiyi yerdəyik. Ərzurumda toplanışda olanda anladım ki, bu futbolçularla nəsə etmək olar. Avrokuboklarda oynamağı söz verməmişəm. Bacardıqca yuxarılarda olmağa çalışacağıq.

- Zədəli futbolçuları oynatdığınıza görə düşünmək olar ki, ehtiyat qüvvə zəifdi. Transfer pəncərəsi bağlıdı. Əvəzedici heyətdən əsas komandaya cəlb etmək istədiyiniz oyunçular var?
- Stabil heyətin varsa, stabil oyunun da olacaq. Stabilliyi qorumağa çalışırıq. Bəli, əvəzedici heyətdən dörd futbolçu götürmüşük. Onları yavaş-yavaş hazırlayırıq. Qələbədən sonra nəyisə dəyişmək istəmirəm. Bir şeyi də demək istəyirəm. Şəhriyar Rəhimovun ölümündən sonra bu komanda çox əziyyət çəkdi. Hər qələbədən sonra düşünürəm ki, kaş o da bunu görərdi. Uğurumuza o qədər sevinərdi ki... Məğlubiyyətlərdən sonra çox əziyyət çəkirdi.

- Şəhriyar Rəhimovun vəfatından sonra komanda məğlub olmayıb...
- Şəhriyarın forması həmişə bizim paltardəyişmə otağında asılır. 13 nömrə oradadı. Şəhriyar bizimlədi, Şəhriyar getməyib. 13 nömrəli forma heç kimə verilməyib.

- Ötən mövsüm çətin idi, yoxsa bu mövsüm?
- 27 ildir məşqçilik fəaliyyətindəyəm. Keçən ilki 5 aylıq fəaliyyətim kimi ağır dönəm olmayıb.