“Tələsməmək, təlaşa düşməmək lazımdı”
Misli premyer-liqasında 33-cü turun oyunları keçirilir.
“Football-plus.az” xəbər verir ki, “Sumqayıt” “Səbail”i qəbul edib - 1:3. Matçdan sonra meydan sahiblərinin çalışdırıcısı Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:
"Soruşsanız ki, bu gün üzüldüyün məqam nədi? Uduzmaq? Xeyr. Həmişəki kimi bir həftə rahat oluruq, o biri həftə stress altına giririk. Ən çox azarkeşlərimizə görə üzüldüm. Son pillələrdə qərarlaşan komandalar oynasa da, ev sahibini dəstəkləməyə bu qədər azarkeş gəlmişdi. Sona qədər də bizimləydilər. Sağolsunlar. Bundan sonra nə desələr də, haqlıdırlar. İstirahət günüdü, gəlirlər bizə dəstək olmağa, nə oyun var, nə nəticə... Təbii ki, belə olmaz. Üç oyun qalıb. Çox çətin rəqiblərdi. İlk beşlikdəki komandalardı. Rəqiblərin də necə nəticə göstərməsi önəmlidi. Necə olacağını görəcəyik".
- Bu cür oyunla premyer-liqada qalmaq mümkündü?
- Ətrafımızda olan komandalar bizə baxanda dəhşət oynayır? Yox. Aşağı-yuxarı eynidi. Bir həftə biz yaxşı oynaya bilərik, o biri həftə digər komandalar. Ona görə də, haqlı olaraq bu yerdəyik. Futbolçular olaraq, biz oyunu başa düşmədik ki, bu cür oyunlarda nə etmək lazımdı. Tələsməmək, təlaşa düşməmək lazımdı. Fasilədə futbolçulara bildirdim ki, tələsməmək top birinin ayağındadısa, ona durub baxmalı olmağımız deyil. Buna görə də, bir şey etmək lazımdı. Oyunun içində bunu anlaya bilmədik. İkinci hissəyə başlayanda, oyun o qədər rahat gedirdi ki, rəqibin də təzyiqi yox idi. Özümüz qolu hədiyyə verdik. Həm də, ümumi oyunu "Səbail"ə hədiyyə verdik. Görək də, o biri oyunlar necə olacaq.
- Buraxılan qollar stress və həyəcandan irəli gəlirdi?
- Bilmədiyimiz səbəb yoxdu. İkinci hissə qollar vurmalıydıq, amma qapımızda qollar gördük. Bir çox məşqdə etdiklərimizi meydanda görməməyimiz bizi üzür. Ən üzücü məqamlardan biri odu ki, məşqlərdəki həmin futbolçuları artıq meydanda görmürük. Məşqlərdə tamam başqadılar, oyuna çatanda fərqli. Oyunun gedişində kənardan qışqırırsan ki, sən bu mövqenin oyunçususan, gəl bura, top al, ötürmə ver. Yəni, bu problemləri yaşayırıq. Ona görə də, bu gündəyik, belə yerdəyik. Qeyri-stabil oyunlarımız var, birini uduruq, o birini uduzuruq. İndi fikirləşməliyik ki, qalib gəldiyimiz oyunlarda biz yaxşı oynamışıq, yoxsa rəqib günündə olmayıb. Belə suallar var.
Digər xəbərlər
