Misli premyer-liqasında 34-cü tura yekun vurulub.

“Football-plus.az” xəbər verir ki, “Sumqayıt” “Sabah”ı qəbul edib - 0:4. Oyundan sonra meydan sahiblərinin çalışdırıcısı Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:

- Bu gün meydanda sanki "Sabah" elitada qalmaq üçün oynayırdı, "Sumqayıt" gümüş medal qazanmışdı. Məncə, elitada qalmaq istəyən komanda meydanda ot yolmalı idi...
- Ya futbol oynayırsan, ya ürəyini qoymalısan. Bu gün heç biri yox idi. İlk qoldan sonra qapıçı səhvləri oldu və bundan qurtula bilmirik. Ötən oyundan sonra demişdim, bizə özümüzdən çox rəqiblərin nəticələri elitada qalmağa kömək edəcək. Öz oyunumuzu bilirəm və buna görə deyirəm. Qarşıda daha çətin oyun var. Əsas faktor rəqiblərin nəticələridi.

- Bu mövsüm "Sabah"a qol vura bilməmisiniz.
- Belə komandalara qarşı oynaya bilmirik. Müdafiəçilərimizin kobud səhvləri olur. Qışda bu problemə son qoya bilmədik. İndi bunun ağrısını yaşayırıq. Tək "Sabah"dan yox, digər komandalardan da qol buraxırıq. Qol vurmağa gəldikdə... Çox maraqlı komandayıq. Bu gün heç qol epizodumuz olmadı. Rəqibə qollar hədiyyə edirik. Problemlərimizi qışdan bilirik. İşləri yetərincə görə bilmədik. Çempionatda qalacağımıza ümid edirəm. Hər komandanın uğursuz vaxtları olur. İndi də bizim növbəmizdi. Səbr etmək və problemləri aradan qaldırmalıyıq. Elitada qalsaq, köklü dəyişikliklər etməliyik.

- Klubun transfer siyasətinin uğursuz olduğunu deyə bilərik?
- Tək transfer deyil. İlin əvvəlindən işlər düz getməyib. Belə hallar tək bizim başımıza gəlmir. Kiminsə üstünə atmırıq, belə dönəmləri olan komandalar var. Bu il ilk dəfə legioner transferlərinə icazə verildi. Belə problemlər ola bilər. İlin əvvəlindən problemlər yığıldı və belə nəticəyə gətirib çıxardı. Çıxış yolu köklü dəyişikliklərdi.

- "Səbail"in baş məşqçisi Şahin Diniyev əminliklə elitada qalacaqlarını deyir. Siz nə düşünürsüz?
- Mən heç vaxt əminliklə nəsə deməmişəm. Diniyevin sözlərini şərh etmirəm. Belə əmin olmaq üçün əlində yaxşı heyət olmalıdı. Mənim belə sözlər deməyə əsasım yoxdu. Mən öz oyunumuzu deyil, rəqiblərin nəticələrini düşünürəm. Bu özü çox şey deməkdi.

- "Kəpəz"ə uduzduğunuz oyundan sonra dediz ki, komanda bu cür futbolla 1-ci divizionda oynamağa layiqik. O fikrinizdə qalırsız?
- Bu, həmin oyundan sonra yaranan emosiya ilə bağlı idi. Rəqib baş məşqçilər əminliklə premyer-liqada qalmağa layiq olduqlarını, qalacaqlarını deyirlər. Amma biz nəsə deməyə-deməyə onlardan yuxarıdayıq.

- Komandanın uğursuzluğunda stabil olmamağınızın rolu var?
- Stabil deyilik, bəli. Milli komandanın martdakı oyunlarına görə yaranmış fasilədən sonra yaxşı görüşlərimiz var idi. Ardıcıl qələbələr qazanmışdıq, amma stabilliyi qoruyub-saxlaya bilmədik. Stabilliyini saxlayanlar özlərindən söz etdirməyi bacarır. Biz və bizim kimi komandalar hazırda çempionatda qalmaq üçün mübarizə aparır.