Karyerasını 2021-ci ildə başa vuran Çezare Prandelli jurnalistlərə müsahibə verib.

"Football-plus.az" xəbər verir ki, İtaliya yığmasının 66 yaşlı sabiq baş məşqçisi daha çox hücumçularla bağlı sualları cavablayıb və yerli oyunçuların uzun illərdi üzləşdiyi problemi qabardıb.

- Hazırda A seriyasında “İnter” 4 oyuna maksimum nəticə ilə liderlik edir...
- Eh... Bu məsələdə hər şey aydındı. “İnter” meydanda yaxşı hərəkətlər edir, 20 nəfərlik keyfiyyətli və geniş heyəti var. Komandada Frattezi ilə Türamdan Mxitaryana qədər gəncliklə təcrübənin düzgün vəhdəti formalaşdırılıb. Milanlılar mövsümün əvvəlində təravətli və fiziki cəhətdən güclü görünürlər. Onlar ilk turlardan imkanlarına yaxşı bələd olduqlarını göstərirlər.

- “İnter”dən sonrakı yeri “Yuventus” tutur. Turinlilər bu mövsüm skudettoya real namizəd ola bilərlər?
- Alleqri vəziyyəti yalnız dekabrın sonunda düzgün dəyərləndirə biləcəyini deməklə doğru düşünür: “Yuventus”un inkişaf prosesində çox maraqlı nüanslar gözə dəyir. Komanda meydanda yaxşı mövqe tuta bilir, bunun sayəsində oyun planında əminlik getdikcə artır. Və hücum cütlüyü effektli oyununu davam etdirə bilsə...

- Vlahoviç ilə Kyeza komandasının uğurlu çıxışını böyük ölçüdə təmin edirlər. Necə ki, “İnter”də Lautaro Martineslə Türam belə funksiyanı yerinə yetirirlər. Osimhenin “Napoli”nin hücumundakı rolunu da qeyd etməliyik. Bu mövsüm hansı komanda dominantlıq edəcək? İndi meydanda hər şeyi hücumçuların müəyyən etdiyini əminliklə söyləmək olar?
- Onsuz da futbol tarixində həmişə belə olub: yaxşı oynamaq, təşkilatlanmış komandaya malik olmaq mümkündü, amma heyətdə qol imkanlarını reallaşdıra biləcək oyunçular yoxdusa, hədəfə çatmaq çətin olacaq. Mən futbolumuzun bu yönündən çoxdan danışıram: biz illəri və istedadları itiririk, ona görə ki, oyunçulara uşaq yaşlarından meydanda öz instinktləri və istedalarını sərbəst göstərmək imkanı vermək əvəzinə onları taktikaya daha çox diqqət yetirməyə məcbur edirik. Bizim futbolda gənc futbolçuların hücum qurmaq keyfiyyətlərini sərbəst şəkildə sərgiləməsi üçün, demək olar ki, heç bir şansı yoxdu.

- Vlahoviçin “Latsio”ya vurduğu ilk qolun istedad və instinktin vəhdəti olduğunu hesab edirsiniz?
- Sözsüz ki, hə: həmin qolu improvizasiya etmək mümkün deyil, bu, oyunçunun daxilində formalaşmalıdı. Özüm uşaq olarkən yarımmüdafiəçi kimi oynamışam. Rəqibin cərimə meydançasına yaxınlaşarkən özümüzü itirilmiş kimi hiss edirdik, boş zonalara meyl etməyi bacarmırdıq. Onda komandamızda bir hücumçu vardı. Həmin oyunçu hətta qapıya baxmasa belə, onu “hiss edirdi”. Bu, insan doğulduğu andan qazanılan istedaddı, onu qorumaq və belə istedadın sahibi olan hücumçuya sərbəstlik vermək lazımdı. Bu, bizdə heç də həmişə alınmır.

- Bu, futbolumuzun əsas problemlərindən biridi. Luçano Spalletti milli komandada Raspadoriyə üstünlük verir. Bu gediş haqqında nə düşünürsünüz?
- Mən bu oyunçuya həmişə bir qədər geri çəkilmiş yox, mərkəz hücumçusu gözü ilə baxmışam. Onun bu rolu üzərinə götürmək üçün hər cür imkanı var. Məni dinləyin, məgər Raspadori sizə Paolo Rossini xatırlatmır? Bunu bəzi hərəkətləri, komanda yoldaşlarını düzgün istiqamətləndirmək bacarığı baxımından deyirəm. Hərçənd onları müqayisə etmək çox çətindi: Raspadoridə rəqib qapısı qarşısında soyuqqanlılıq çatışmır. Bu səbəbdən böyük klubun əsas heyətində müəyyən müddətdə oynamağa ehtiyacı var. Yalnız bundan sonra hansısa müqayisəyə baş vurmaq olar. Bununla belə, Cakomo mərkəz hücumçusu kimi lazımi xüsusiyyətlərə malikdi.

- Vlahoviçin bu mövsüm “Yuventus”da dəyişdiyi göz qabağındadı. Deyəsən, özünəəminlik qazanmağa başlayıb...
- Duşan böyük istəyə malikdi və ilk növbədə sakitliyini qorumağı öyrənməlidi. O, yüksək keyfiyyətləri olan futbolçudu. Vlahoviç yalnız topu hər dəfə qəbul edərkən ətrafdakılara nəyisə sübut etmək üçün ondan nə tələb olunmadığını anlamalıdı. O, sakit oynamağa davam etməlidi, çünki yolu artıq müəyyən edilib: Vlahoviç böyük komandada çempion olmalıdı.

- İndi Kyeza ilə çox yaxşı anlaşır. Bu, “Yuve” üçün əlavə üstünlük sayıla bilər?
- Onlar bir-birini meydanda daha çox axtarmalıdılar! Keyfiyyətinə, xarakteristikasına və yaş amilinə əsasən ən güclü hücum cütlüyünə namizəddilər. Federiko bir qədər geri çəkilmiş hücumçudu? Alleqri ona daha çox sərbəstlik verir və Kyeza buna böyük intensivliyi ilə cavab verir. Əlbəttə, bu mövsüm meydanın dərinliyindən hücuma atılması baxımından daha yaxşı görünür. Hərçənd ən maraqlı qərarlarını sağ cinahla hərəkət edərkən nümayiş etdirir: bu planda Kostiçlə əlaqəsi maraqlı mənzərə formalaşdırır.

- Hazırda çempionatda hansı hücum xəttini daha güclü sayırsınız?
- Çətin sualdı... Hər şey konkret məqamdan asılıdı, oyunçuların keyfiyyəti bizə yaxşı məlumdu. Osimhen meydanın dərinliyindən oynaması ilə göz oxşayır, Lautaro komandanın lideri kimi daha çox inkişaf edir, Türamın Milan derbisinin ilk hissəsindəki çıxışı fiziki gücü və qərarlarının müxtəlifliyi ilə yadda qaldı. Onlardan sonra təbii ki, Kyeza ilə Vlahoviçi də qeyd etməliyəm. Qeyri-adi perspektivləri olan gənc futbolçular bu mövsüm “Yuve”nin aqibətini müəyyən etməlidilər.