“Beşiktaş” Fernandeşin müqaviləsini yenilədi
“Beşiktaş” aparıcı futbolçularından biri ilə müqaviləni yeniləyib.
"Football-plus.az" xəbər verir ki, söhbət Jedson Fernandeşdən gedir.
Portuqaliyalı yarımmüdafiəçinin 2026-cı ilə qədər olan müqaviləsinin müddəti 2027-yə qədər artırılıb. Daha öncə “Qalatasaray”da da oynamış 24 yaşlı futbolçu yeni müqaviləyə imza atandan sonra bunları deyib:
“Çox sevincliyəm. “Beşiktaş” kimi klubun bir parçası olmaq məni qürurlandırır. Ümid edirəm ki, komanda yoldaşlarımla birlikdə bu mövsüm iştirak etdiyimiz bütün turnirlərdə uğur qazanacağıq. Bunun üçün meydanda hər şeyimi verməyə hazıram. Həftəsonu bizi “Trabzonspor”la çətin oyun gözləyir. O matça hazırıq və 3 xal qazanmaq üçün əlimizdən gələni edəcəyik. Fanatlarımızdan tez-tez xoş sözlər eşidirəm. Bu məqam məni həm sevindirir, həm də motivasiyalandırır. Fanatlarımıza söz verirəm ki, bu formanı geydiyim müddətdə hər oyuna hirsli və motivasiyalı şəkildə çıxacam. Savaşçı ruhum daim meydanda olacaq”.
Müqavilə ilə bağlı klubdan verilən rəsmi açıqlamada Fernandeşin məvacibinə toxunulmayıb. Amma Türkiyə mətbuatının yazdığına inansaq, bu futbolçunun 1,2 milyon avro olan illik qazancı 500 min avro artırılaraq 1,7 milyon avroya çatdırılıb. Xatırladaq ki, İstanbul nəhəngi Fernandeşi 6 milyon avro qarşılığında hələ 2021/22-nin qış fasiləsində transfer etmişdi. Amma klublar arasındakı anlaşmaya görə Fernandeş həmin mövsümün 2-ci dövrəsini icarə əsasında “Çaykur Rizəspor”da keçirmiş və yalnız ötən yay “ağ-qaralar”a qoşulmuşdu. Transfer dəyəri təxminən 12 milyon avro olan portuqaliyalı indiyə qədər “Beşiktaş”da 45 rəsmi oyunda 4 qol, 9 məhsuldar ötürmə ilə fərqlənib. İstanbul nəhənginin qarşıdakı dönəmdə daha iki futbolçu – Salih Uçan və Cenk Tosunla da yeni müqavilə imzalayacağı gözlənilir.
