Yoxlama oyununa maraq o qədər də böyük deyildi. Stadionda həm azarkeşlərin, həm də jurnalistlərin sayı az idi. Yığmamız isə meydana qələbə üçün çıxmışdı. Bu, ilk dəqiqələrdən hiss olunurdu. Amma ərəblər o qədər asan təslim olmaq istəmirdi. İordaniya yığması millimizin müdafiəçilərinə tez-tez problem yaradırdı.

Football-plus.az" xəbər verir ki, de Byazi Belçika ilə oyundan fərqli 4-lü müdafiə sistemindən istifadə edirdi. Bu da komandamızın sürətli hücumlar qurmasına şərait yaradırdı. Hücum xəttində Ozan Can, Mahir və Musanın yer alması rəqibi daim təzyiq altında saxlayırdı. Lakin kəmiyyəti keyfiyyətə çevirmək mümkün deyildi, nə qədər qəribə olsa da, qonaqlar daha çox hücum edirdi. Son 15 dəqiqədə isə yığmamız üstünlüyü ələ aldı. Ozan Can və Mahir daha çox fəallıq göstərirdi. Oyunda ilk qol uzatma dəqiqələrində vuruldu. Mahirin baş zərbəsindən sonra top tirə dəydi, özünü topa yetirən Eminin qarşısı isə kobudluqla alındı. Penaltini zərərçəkən özü dəqiq yetirdi.

De Byazi fasilədən sonra üç dəyişiklik etdi - Elvini Toral, Ozan Canı Rüstəm, Alekseyi Elvin əvəzlədi. Bu dəyişikliklər oyunumuzda bir qədər eniş yaşatdı. Rəqib ikinci hissədə daha çox hücum qururdu. Bunun da bəhrəsini 57-ci dəqiqədə gördü. Cinah ötürməsindən yararlanan Əl-Raşdan müdafiəçilərin və Şahruddinin səhvindən yararlanaraq hesabı bərabərləşdirdi. Qoldan sonra futbolçularımız toparlandı. De Byazi Musanı Renatla əvəzlədi, Coşqunu Emillə. Bununla da hücumların sürəti artdı. 80-ci dəqiqədə isə komandamız istəyinə çatdı. Eminin möhtəşəm ara ötürməsindən sonra topu ələ keçirən Toral Renata “al və vur” dedi. Forvard bəlkə də həyatının ən asan qolunu vurdu.

Oyunda başqa maraqlı hadisə yaşanmadı. Beləliklə, görüş 2:1 hesablı qələbəmizlə başa çatdı. Afişanı yazarkən qeyd etdiyimiz kimi, bu qələbə həm reytinq cədvəlində irəliləmək, həm də özümüzə gəlmək baxımından yaxşı oldu. Amma payizda seçmə oyunlarda uğurun davamını gətirmək, mümkün qədər çox xal yığmaq lazımdı. De Byazi qalsa da, getsə də!

Gözdən qaçmadı
* "Milli Holigans" fanklubu millimizi tribunadan dəstəkləyirdi.
* Az sayda qonaq azarkeş İordaniyanı dəstəkləmək üçün "Dalğa Arena"ya gəlmişdi. Onlar Nizar Əl Raşdanın qolunu böyük coşquyla qeyd etdilər.
* Oyundan öncə Mərakəşdə (rəqibin baş məşqçisi Ammuta mərakeşlidi - red.) baş verən zəlzələnin qurbanlarının xatirəsi birdəqiqəlik sükutla yad olundu. Maraqlıdı ki, qonaqların futbolçusu sükuta qoşulmadı. Rajaei Aued butsunun iplərini bağlamaqla məşğul idi.
* Matç təyin olunan vaxtdan 2 dəqiqə gec başladı.
* Azarkeşlər 44-cü dəqiqədə ənənəvi "Şəhidlər ölməz, vətən bölünməz" şüarını səsləndirdi.
* De Byazi əvəzlədiyi futbolçular meydandan çıxarkən hər kəslə əl görüşdü. Maraqlıdı ki, Coşqun Diniyev başını aşağı salıb qıraqdan keçmək istəyirdi. Baş məşqçi onu özünə çəkib əlini sıxdı.