Oyundan əvvəl az qala hər kəs Belçikanın rahat qələbə qazanacağını düşünürdü.

Düzdü, rəqibin heyətində itkilər var idi. Xüsusən də qitə futbolunun ulduzlarından De Bruynenin adını çəkə bilərik. Buna baxmayaraq, “qırmızı iblislər”in qələbə qazanacağı daha çox proqnozlaşdırılırdı. Gözlənilən kimi də oldu. Oyun qonaqların təzyiqi ilə başladı. 5-ci dəqiqədə Trossarın zərbəsindən sonra qapı tirinə dəyən top çölə çıxdı. Bundan sonra millimiz özünə gəlməyə başladı. Sol cinah olduqca fəal idi. Ramil belçikalı müdafiəçilərə problem yaradırdı. 7-ci dəqiqədə isə biz qol vurmağa yaxın olduq. Sol cinahdan qurulan hücum zamanı Dadaşovun zərbəsini Kastels qaytardı. Topa özünü yetirən Emin fərqlənməyə borclu idi. Amma onunz zərbəsinin qarşısını müdafiəçilər ala bildi. Belçikalılar yığmanın təzyiqini dəf etməkdə çətinlik çəkirdi. De Byazinin komandası yaxşı oyun sərgiləyirdi. 31-ci dəqiqədə yenə fərqlənməyə yaxın olduq. Şeydayevin asmasını Dadaşov başla qapıya göndərsə də, Kastels yenə topun qapıdan keçməsinə imkan vermədi. 2 dəqiqə sonra qapıçı yenə diqqət mərkəzinə düşdü. Bu dəfə Kastels Şeydayevin qüvvətli zərbəsini dəf edə bildi. Bu təzyiqindən qurtula bilən Belçika 38-ci dəqiqədə hesabı açdı. Bakayokonun zərbəsindən sonra Karrasko topa toxunaraq Şahruddini çaşdıraraq tora daxil oldu. Qol vurularkən Coşqunun uşaq səhvi diqqəti çəkdi. Yarımmüdafiəçi Lukakunun sadə toxunuşundan sonra yerdə qaldı. Hücumun davamında isə top qapı xəttini keçdi. Qoldan sonra ilk hissənin sonuna kimi belçikalılar topa daha çox nəzarət etdi. Lakin hücumlar zamanı ya Şahruddin, ya da müdadfiəçilərimiz etibarlı oynayırdı.

Fasilədən sonra da qarşılıqlı hücumlar izlədik. Hər iki tərəf sözün əsl mənasında yaxşı mübarizə göstərdi. De Byazi 2-ci hissədə dəyişikliklər edərək hesabı dəyişmək istəsə də, mümkün olmadı. Beləliklə, oyun qonaqların minimal hesablı qələbəsi ilə başa çatdı. Yığmamızın üzvləri daha çox əzmkarlıq hesabına normal oyun göstərdi. Lakin italiyalı mütəxəssisin taktiki cəhətdən zəif olması nəticəyə təsir etdi. Bu komandaya ümid bəsləmək olar. Sadəcə, yığmanın tək problemi var: baş məşqçi. AFFA rəhbərliyi indidən yeni çalışdırıcının axtarışına başlamalıdı.

Gözdən qaçmadı
* Oyunu izləyənlər arasında məşhur meyxanaçılar Baləli Maştağalı və Mehdi Masallı da var idi. Premyer-liqada çıxış edən legionerlər də stadiona təşrif buyurmuşdu. “Qarabağ”dan Julio Romao, Kevin Medina, “Sumqayıt”dan Oktavio Manteka və İsa Suliman da azarkeşlər arasında idi. “Kimyaçılar”ın üzvü hətta ailəsini də oyuna gətirmişdi.
* Azarkeşlər bir müddət öncə dünyasını dəyişən millimizin sabiq üzvü Şəhriyar Rəhimovun şəkli olan pankart açmışdı. Oyundan əvvəl müdafiəçinin xatirəsi birdəqiqəlik sükutla yad olund.
* Oyundan əvvəl bütün biletlərin satıldığı deyilsə də, tribunalarda boş yer çox idi.
* “Neftçi”nin baş məşqçisi Adrian Mutunun köməkçiləri Alin-Nikolaye Çita, Aurlean-Boqdan Patraşku və inzibatçı İlkin İbrahimov da qarşılaşmanı tribunadan izləyirdi.

İLKİN SULTANLI