"Qarabağ" Avropa Liqasının pley-off mərhələsinin cavab görüşündə "Oliimpiya" ilə heç-heçə edərək qrupa düşsə də, oyun planında heç də xoş təsir bağışlamadı.

Komandanı orta sahəsindəki və müdafiə xəttindəki çatışmazlıqlar bütün çılpaqlığıyla göründü. Ağdamlıların qeyd olunan mövqelərdəki oyunçuları rəqib futbolçularına uduzurdu. Bunun nəticəsidi ki, matç boyunca "Qarabağ"ın futbolçuları hədsiz sərt, bəzi məqamlarda hətta kobud oynayırdılar. Onların sonuncu dəfə nə vaxt belə intizamsız oynadığını xatırlamıram. Hələ Romaonun kobud səhvindən sonra rəqibin hesaba tarazlıq gətirməsi də dediklərimə bariz nümunədi. Reallığı qəbul etsək, bu gün "Qarabağ"da hər mövqedə çatışmazlıq, rəqabətsizlik var. Bir qədər qapı xəttində canlanma var ki, bu da "Şahruddin toxunulmazdı" tabusu sındırılandan sonra baş verdi.

Düşünürəm ki, komandada hazırda və bundan sonra ən sağlam rəqabət qapıçılar arasında olacaq. Veşoviçin sıradan çıxması "köhlən atlar"ın müdafiənin sol cinahından sürətli hücumlara çıxmasını xeyli ləngidib. Toral nə qədər çalışsa da, montereqrolunu layiqincə əvəz edə bilmir. Elnurun start sürətiylə hücumlara çıxması uğurlu olsa da, geri çəkilməkdə və cinahda rəqib yürüşlərinin qarşısını almaqda effektli deyil. Bədav Hüseynovun zədədən əziyyət çəkməsi müdafiənin mərkəzini xeyli laxladıb. Rahil Məmmədovun potensialı avrokuboklar, xüsusən də qrup mərhələsi üçün yetərli deyil. Bəhlul Mustafazadə ilə Kevin Medina nə qədər birgə oynasalar da, hələ arzulanan tandemi təşkil edə bilmirlər.

Əksər oyunlarda da kolumbiyalı rəqibin hücumları zamanı təkbaşına sipər olur. Bu hal "81 nömrə"nin hədsiz yüklənməsi deməkdi. Belədə Medinanın zədələnməsi, cəzalı duruma düşməsi və fiziki yükləmələrdən dolayı yorulması qaçılmazdı. Maksimin yaşı və hazırkı performansı 90 dəqiqə oynmağa imkan vermir. Odu ki, kapitanı mərkəz müdafiəçisi oynatmaq olduqca risklidi. Qara Qarayevin gedişi ilə Patrik Andradenin zədəsi də dayaq yarımmüdafiəsində boşluqlara gətirib çıxarır ki, nəticədə son müdafiəçi mövqeyindəki oyunçu əlavə təzyiqlə üzləşir. Nihad Quliyevin nəinki Qara, hətta "Zirə"də icarə əsasında çıxış edən Hacıağa Hacılı səviyyəsinə çatmasına hələ çox vaxt var. Mateus Silva həllə indi-indi şans qazanır. Yəni onunla bağlı böyük gözləntilər əbəsdi.

Kadinin gedişindən sonra komandada dirijor funksiyasına kimsə tam yiyələnə bilməyib. Diakabi, Yankoviç və Benzya nə qədər çalışsalar da, faydalı iş əmsalları aşağıdı. Almeyda yaşına və potensialına görə ən yaxşı halda meydanda top saxlamağa və standart vəziyyətlər zamanı kömək edə bilir. Cica nə qədər can qoysa da, fərqli mövqelərdə sınanıldığından gözlənilən potensialını aça bilmir. "19 nömrə"nin hücumçu kimi sınanması effekt vermədi. Keyta ya komandanın oyun ritminə tam uyğunlaşa bilməyib, ya da Qurban bəy hələ ona şans verməyə tələsmir. Juninyo yavaş-yavaş bacarığını göstərsə də, hələlik Zubir səviyyəsində deyil. Nəriman Axundzadə perspektivli gənc olmasına rəğmən, hücumun sivri ucunda yer alacaq qədər yetişməyib. Hələ qeyd etmədiyim çoxlu başqa çatışmazlıqlar da var.

Xülasə Ağdam təmsilçisi mütləq mövqelər üzrə güclənməli və rəqabəti artırmalıdı. Hesab edirəm ki, "Qarabağ" ən azı üç transfer həyata keçirməlidi. Belə ki, komandanın mərkəz müdafiəçisi, pleymeyker və taran tipli hücumçuya ehtiyacı var. İrəlidə Avropa Liqasının qrup oyunlarını, premyer-liqanı, ölkə kubokundakı matçları və yığmanın qarşılaşmalarını nəzərə alsaq, zədəlilər, cəzalılar, fiziki yorğunluq, psixoloji gərginlik qaçılmazdı. Odu ki, Qurban bəy başda olmaqla "Qarabağ" rəhbərliyi transfer sahəsində işləri sürətləndirməlidi.

ABDULLA İSMAYILOĞLU