Təbii ki, "Qarabağ"ın ardıcıl 10-cu dəfə avrokubokların qrupuna düşməsi böyük uğurdu.

Ədalət naminə ağdamlıların səfərdəki inamlı qələbənin “meyvəsini yediyini” deməliyik. Amma çempion ümumilikdə parlaq təsir bağışlamadı, futbolçular sanki qələbə üçün motivasiya tapa bilmirdilər.

“Köhlən atlar"ın cavab görüşündəki çıxışını qimətləndirmək üçün təcrübəli mütəxəssis Əfqan Talıbova tribuna verdik: "Qarabağ"ın zəif oynadığını deməzdim. Ağdamlıların haqqını vermək lazımdı. Komanda sıx qrafiklə oynayır, üstəlik heyətindəki Bədavi Hüseynov, Marko Veşoviç, Patrik Andrade kimi vacib fiqurlar zədəlidi. Ağdam təmsilçisinin Çempionlar Liqasında "Rakuv"la oyununa baxsaq, çox döyüşdü ki, bu turnirdə qalıb davam etsin. Amma alınmadı. Buna rəğmən, "köhlən atlar" özündə güc taparaq Avropa Liqasının qrupuna düşə bildilər. Odu ki, onlara alqış və təbrik düşür. Gəlin Sloveniya təmsilçisini də zəif rəqib bilməyək. “Olimpiya” yetərincə aqressiv və istəkli komandadı. Həm "Qalatasaray", həm də "Qarabağ" ilə oyunları göstərdi ki, sloveniyalılar təslim olmayan, sona qədər döyüşən klubdu, heyətində də oyuna təsir edə biləcək potensiallı oyunçular var. Çox güman, rəqib 2-ci qolu vursaydı, matçın ssenarisi fərqli ola bilərdi.

Romaonun səhvinə gəlincə, istəkliydi, soyuqanlı davranıb rəqib futbolçudan uzaqlaşmaq istəyirdi, amma səhvə yol verdi və qapımızda qol gördük. Peşəkar futbolçu maksimum dərəcədə belə səhvlər etməməlidi. Təlükəli zonadadısa, qısa zamanda top uzaqlaşdırılmalıdı. Hazırda Medina müdadiə xəttində "Qarabağ" üçün bir keçilməz fiqurdu. Kolumbiyalı, demək olar, əksər epizodlarda təkbaşına rəqib hücumçuları neytrallaşdırır. Düzdü, o, da bəzən səhvlərlə yadda qalır. Amma ümumi götürəndə performansı yaxşıdı və oyundan-oyuna “artırır”, təcrübə qazanır.

Medinanın itkisi "Qarabağ" üçün böyük faciə ola bilər. Ağdam təmsilçisinin avrokubok və premyer-liqa oyunnlarını nəzərə alsaq, səhvlər var. Odu ki, Qurban müəllim bu səhvləri daha yaxşı görür. İnanıram ki, tezliklə bütün çatışmazlılqları aradan qaldıracaq. Əks təqdirdə qrupda vəziyyətləri çox ağır olacaq. Top-liqa təmsilçiləriylə birgə qruplara düşəcəyimizi nəzərə alsaq, onlar səhvləri bağışlamır və dərhal cəzalandırırlar".

ABDULLA İSMAYILOĞLU