“Mediada belə söz-söhbət gəzir. Amma rəsmi nəsə yoxdu. Hansısa qurumdan BOS-a müraciət daxil olmayıb. Onsuz da TFF belə məsələyə görə müraciət etməməlidi. Çünki bu cür tədbirlərinin keçirilməsini federasiyalar öz aralarında həll edir. Bundan sonra AFFA stadion hansı quruma bağlıdısa, ora müraciət etməlidi. Bu cür məsələlər belə tənzimlənir. Lakin bizə AFFA-dan heç bir müraciət daxil olmayıb. Əminəm ki, federasiyaya da belə məlumat verilsəydi, vaxt itirmədən bizə deyərdilər. Mən bildiyim qədəri ilə stadionun bağlı olduğu SOCAR-a da bu barədə hansısa məlumat daxil olmayıb. “Qalatasaray” prezidentinin dünənki açıqlamasını da izlədim. Düşünürəm ki, bu ancaq azarkeşlərin istəyidi. Amma indiyə kimi TFF-nin bu məsələ ilə bağlı hansısa açıqlamasını, mövqeyini görməmişəm. Stadionu bu oyunu keçirməyə hazırdımı? Qarşılaşmanı milyona yaxın azarkeş izləmək istəyə bilər. Lakin ortada reallıq var. Arenanın tutumu nə qədərdisə, o sayda azarkeş qəbul edə bilərik. Stadionumuzun 90 faizinin dolmasına bir neçə dəfə şahidlik etmişik. Nə xoş təsadüf ki, bütün oyunlar “Qarabağ”la bağlı olub. Ağdam təmsilçisinin “Qalatasaray”la və Çempionlar Liqasının qrup mərhələsindəki görüşlərində arenamızın 95 faizi dolub. Həmin oyunlarda işimizin öhdəsindən layiqincə gəlmişik. “Qalatasaray” – “Fənərbaxça” matçının burda keçirilməsində biz tərəfdən hansısa problem yoxdu. Rəsmi müraciət olarsa, stadionumuz bu oyunu keçirməyə hazırdı”