"Kəpəz", “Səbail” və "Turan Tovuz" yubanır - AÇIQLAMA
Yeni "futbol ili"nin başlamasına 5 gün qaldı. Premyer-liqada iştirak edəcək klublardan bu ərəfədə bütün hazırlıqları yekunlaşdırılmaq tələb edilir.
İctimaiyyətin marağını nəzərə alsaq, prosesin qollarından biri də işlək rəsmi saytların olmasıdı. Hazırda "Kəpəz"dən başqa bütün klubları təmsil edən internet səhifələri mövcuddu. Daha əvvəl Gəncə təmsilçisinin də bu yöndə tutarlı addım atacağını xəbər vermişdik. Bu yaxınlarda klubun mətbuat xidmətinin rəhbəri Azad Mustafayev də məlumatı saytımıza təsdiqlədi. O, işlərin davam etdiyini və saytın avqustda fəaliyyətə başlayacağını bildirmişdi.
Maraqlıdı ki, "Turan Tovuz"un "turantovuzpfc.az", "Səbail"in isə "sabailfc.az" kimi domenləri olsa da, işlək deyil. "Football-plus.az" olaraq bunun səbəbini adı çəkilən klubların rəsmilərindən soruşduq.
Rəşad Məmmədov ("Səbail"in Media və Marketinq Departamentinin rəhbəri):
"Təyinatımdan sonra bu məsələnin də həlli istiqamətində işlərə başlamışıq. Hələ ki bəzi texniki problemlərə görə çətinlik çəkirik. İşlər davam edir. Çalışacağıq ki, ən qısa müddətdə saytın işləkliyini bərpa edək".
Süleyman Tağıyev ("Turan Tovuz"un mətbuat xidmətinin rəhbəri):
"Saytımız uzun müddətdi fəaliyyət göstərirdi. Sadəcə, qərara aldıq ki, yeniliklər edək. Daha maraqlı layihələrlə çıxış edək. Hazırda məlumatların portala yerləşdirilməsi prosesi gedir. Tezliklə işlər sona çatacaq və səhifə ictimaiyyətin sərəncamına veriləcək".
Beləliklə, bəlli olur ki, 2023/24 mövsümündə həm azarkeşlər, həm də idman jurnalistləri klublarla bağlı informasiyanı daha rahat əldə edə biləcək. Təbii ki, bunun üçün işlər tezliklə yekunlaşmalıdı.
PFL-in mövzu ilə bağlı mövqeyi necədi? Rəsmi saytların fəaliyyətinin yubanması mümkündü? Bu yöndə klublarla danışıq aparılır?
Suallarımızı Qurumun Media və Marketinq direktoru Sənan Abdullayev belə cavabladı:
"PFL-in tövsiyəsi bundan ibarətdi ki, klubların rəsmi saytı olsun. Lakin dediyim kimi, bu, sadəcə, tövsiyədi, məcburiyyət deyil. Sevindirici haldı ki, 10 klubdan 9-nun internet səhifəsi var. Məndə olan məlumata görə, bu yaxınlarda "Kəpəz" də işləri tamamlayacaq. Həmçinin "Turan Tovuz"un saytla bağlı maraqlı planları var. Yəqin ki, avqustda çalışmalar yekunlaşar".
KƏNAN BAHADIR
Digər xəbərlər
