Çerçesov qovuldu, rusların fikri haçalandı
Çempionlar Liqasının ilk təsnifat mərhələsinin iyulun 19-da keçirilən cavab görüşlərindən biri qeyri-adi hesabla bitdi. Evdə “Ferentsvaroş”la qolsuz heç-heçəyə razılaşan “Kİ Klaksvik” Macarıstan çempionu ilə səfər oyununda ilk yarıdaca üç qol vurdu və sona qədər bu hesabı qorudu. ÇL-dən uzaqlaşan “Ferentsvaroş” Konfrans Liqasının 2-ci təsnifat mərhələsində “Şemrok Rovers”lə qarşılaşacaq.
Yenə “Qarabağ”ı yada saldı
Təbii ki, Farer adalarının çempionu önündəki darmadağın reaksiyasız qala bilməzdi. “Ferentsvaroş”un prezidenti Qabor Qubadov oyundan dərhal sonra sosial şəbəkə hesabında bunları yazdı: “Hamımız kimi mən də çox utanıram. Bugünkü oyun “Ferentsvaroş”a layiq deyildi. Yaxın müddətdə tədbir görüləcək. Azarkeşlərə hər şeyə görə minnətdaram”.
Yəqin ki, komandanın rusiyalı çalışdırıcısı Stanislav Çerçesovun da şok məğlubiyyətlə bağlı izahatını dinləməyə dəyər:
“Çox pis oyun göstərdik. Komanda belə oynayırsa, bu yalnız ayrı-ayrı oyunçuların məsuliyyəti deyil, məşqçi də sonra nə olacağını düşünməlidi. Konsentrasiya ola bilməsən, belə oyunlar olur. Məşqlərdə hər kəs yaxşı çalışdı, ancaq futbolçular meydanda köklənə bilmirsə, belə nəticə alınır. Bizim üçün qorxunc gecədi, başverənləri təhlil etməli, vəziyyətdən çıxmaq üçün soyuq başla qərar verməliyik. Çox təəssüf, Çempionlar Liqası ilə bağlı arzulardan imtina etməliyik. Ötən il “Qarabağ”a məğlubiyyətdən sonra da buna oxşar vəziyyət yaşadıq, ancaq onda mən təslim olmadım, Avropa Liqasında 1/8 finala çıxa bildik. Onda təslim olmadım, indi də olmayacam. Qalib gəlmək istəyirdik, ancaq nə baş verdiyini təhlil etməliyəm. Bu vəziyyətdən birlikdə çıxa bilib-bilməyəcəyimiz haqda düşünməliyəm”.
Xatırladaq ki, “Qarabağ” ötən il ÇL-in 3-cü təsnifat mərhələsində evdə “Ferentsvaroş”la heç-heçə (1:1) oynamış, amma səfərdə qalib gəlmişdi (3:1).
Çerçesovun nə düşünmək, nə də təhlil etmək üçün vaxtı oldu. Klub prezidenti oyundan sonra onunla görüşdü və istefanın ən doğru yol olduğuna qərar verildi. Baş məşqçi səlahiyyətlərini isə yerli mütəxəssis Çaba Mate yerinə yetirəcək. Ədalət naminə onu da deyək ki, Çerçesov bu klubda yetərincə yaxşı nəticələrə nail olub. O, “sükan arxasına” 2021-ci ilin dekabrında keçib. Budapeşt klubu 59 yaşlı mütəxəssisin rəhbərliyi altında iki dəfə ölkə çempionu (2022, 2023), bir dəfə isə kubokun sahibi (2022) olub. Ötən il “Qarabağ” “Ferentsvaroş”u ÇL-dən uzaqlaşdırsa da, ardından komanda Avropa Liqasında 1/8 finala qədər irəlilədi və bu mərhələdə “Bayer-04”ə uduzdu (0:2, 0:2).
Lehinə
Çerçesovun qovulması Rusiya futbol ictimaiyyətini ikiyə parçaladı. Klub rəhbərliyinin qərarını dəstəkləyənlər də var, səhv olduğunu deyənlər də. MY-nin sabiq futbolçusu Andrey Kançelskisin fikirləri:
“Haqlı istefadı. Çerçesov evdə Farer adalarından olan komanda önündə darmadağın yaşadı. Qovulma qanunauyğundu, ona görə ki, nəticə çox gözlənilməz idi. Bəlkə də komandada münaqişə, hansısa sualtı cərəyanlar var. Düşünürəm ki, belə fiaskonun nə ilə bağlı olduğunu sonradan biləcəyik. Çerçesov Rusiyaya dönsə və bizdə işləsə, təəccüblənmərəm”.
Rusiya yığmasının sabiq oyunçusu Dmitri Bulıkin də “Ferentsvaroş” rəhbərliyinin qərarına haqq qazandırıb:
“Avropanın əksər klubları üçün Çempionlar Liqasından gələn pul büdcəyə önəmli artımdı. Bu üzdən baş məşqçinin qarşısında bu turnirdə bacardıqca irəli getmək vəzifəsi qoyulur. Təəssüf ki, Çerçesovda bu alınmadı. Klub hesab etdi ki, vəzifə yerinə yetirilməyib, Çempionlar Liqasının qrupuna düşməmək üzündən çoxlu pul əldən gedib, bu üzdən belə qərar verildi. Heç kimin tanımadığı, hansı dərəcədə peşəkar olduğunu bilmədiyi komanda ilə oyunda bu mərhələdə mübarizəni dayandırmaq... Odu ki, məşqçini qovmaq qərarı verildi, nəticəyə görə Çerçesov cavabdehdi”.
Macarıstan nəşrlərindən “Nemzeti”nin əməkdaşı Bens Borbolanın da mövzu ilə bağlı fikirləri maraqlıdı: “
Ferentsvaroş” prezidentinin rusiyalı məşqçi Stanislav Çerçesovun istefası ilə bağlı qərarını yaxşı saymaq olar. “Fradi”nin ev oyunlarını keçirdiyi stadionda nələr yaşandığını gördüzmü? “Ferentsvaroş”un bütün azarkeşləri “ruslar, evə” şüarını qışqırır və Salamoviçin getməsini tələb edirdilər. Belə şəraitdə işi davam etdirmək mümkünsüzdü. Belə biabırçı oyundan sonra artıq başqa komanda qurmaq, hansısa uğurlara nail olmaq olmaz. Çerçesovu yalnız Rusiya ilə bağlı olduğuna görə qovmaq istədikləri haqda fikirlər? Yox, əsassızdı. Bu qərar yalnız komandanın son nəticələrindən irəli gəlir, Stanislavın rusiyalı olmasından yox”.
Əleyhinə
Rusiya Futbol İttifaqının fəxri prezidenti Vyaçeslav Koloskov Çerçesovun vətəndə çalışmaq perspekitivini şərh edib:
“İndi bütün komandalar komplektləşib, məşqçiləri var. İki ay əvvəl vəziyyət başqa idi. Bəlkə də kimsə risk edər, ancaq cümə günü çempionat başlayır. Çerçesov səviyyəsində məşqçilər Rusiyada azdı. O, Rusiya futboluna fayda verərdi. Düşünürəm ki, 5-7 tur keçəndən sonra yerdəyişmələr ola bilər. İndi Çerçesova dincəlmək lazımdı, təkliflər alacaq”.
Rusiya yığmasının sabiq çalışdırıcısı Boris İqnatyevin fikirləri:
“Ferentsvaroş”un qərarı bir qədər gözlənilməz oldu. Zahirən nəticələrlə bağlı hər şey qaydasında idi və qəfil belə hadisə... Əlbəttə, sarsıdıcı məğlubiyyətdi, ancaq bəlkə də baltanı kökündən vurmağa dəyməzdi. Hərçənd klubların həmişə ÇL ilə bağlı böyük maliyyə gözləntiləri olur, yəqin bu üzdən belə sərt qərar verildi. Düşünürəm ki, Çerçesov bir qədər futboldan dincəlmək istəyər. Onun iş yeri tapmaqla bağlı problemi olmayacaq. Çerçesov Rusiyanın ən yaxşı məşqçilərindən biridi, premyer-liqanın istənilən klubu onun xidmətində maraqlıdı”.
Rusiyalı məşqçilərdən Aleksandr Tarxanov isə filosof kimi danışıb: “İstənilən qovulma həmişə ədalətsizdi. O, bütün yarışlarda – çempionatda, kubokda uduzsaydı... Belədə isə daxili arenada hər şey qazanıb. Ancaq elə oyunlar olur ki, heç nə alınmır”.
Rusiyalı məşqçilərdən Aleksandr Tarxanov isə filosof kimi danışıb: “İstənilən qovulma həmişə ədalətsizdi. O, bütün yarışlarda – çempionatda, kubokda uduzsaydı... Belədə isə daxili arenada hər şey qazanıb. Ancaq elə oyunlar olur ki, heç nə alınmır”.
Digər xəbərlər
