Bakıda keçirilən görüş bizim üçün olduqca əhəmiyyətli idi. Çünki bu cütün qalibi Konfrans Liqasının 2-ci təsnifat mərhələsində “Neftçi” ilə üz-üzə gələcəkdi. Bu, “ağ-qaralar” üçün əla fürsət idi. Adrian Mutu da bundan tam yararlanmışdı. Rumıniyalı mütəxəssis qarşılaşmanı izləmək üçün analatik Aurelian-Boqdan Petraşkunu “Azərsun Arena”ya göndərmişdi.

Görüş sakit məcrada başladı. Komandalar topu özündə saxlamağa çalışaraq rəqibin səhvə yol verməsini gözləyirdi. Azarkeşlərin olmaması qarşılaşmanın marağını bir qədər öldürürdü. Sanki “Azərsun Arena”da premyer-liqanın ortabab klublarının yoxlama görüşünü izləyirdik. İlk dəqiqələrdən nominal meydan sahibləri topa nəzarət etməyə çalışırdı. Lakin onlar kəsərli hücumlar qura bilmirdilər. Qarşılaşmanın 23-cü dəqiqəsində “Jelezniçar” itki ilə üzləşdi. Qonaqların əsas mərkəz müdafiəçisi Kokaliç zədələnərək meydanı tərk etdi.

Oyunu izləyəndə elə təəssürat yaranırdı ki, bu qarşılaşmanın taleyini 1 qol həll edəcək. Lakin ilk hissənin sonlarında komandalar bir qədər fəallaşdı. “Jelezniçar”ın əks-hücum planı işə yaradı. Fasiləyə1 dəqiqə qalmış bosniyalılar toru silkələyə bildi. Daha doğrusu, İrfan Yasareviçin sol cinahdan ötürməsinə Aleksandr Saviçko ayağını qoyaraq topu öz qapısına göndərdi.

"Dinamo"nun baş məşqçisi Vadim Skripçenko 2-ci hissəyə bir əvəzləməylə başladı. Rilaç ilk hissədə o qədər də fəal deyildi. Onun əvəzinə meydana çıxan Sedko yarımmüdafiənin sağında daha yaxşı oyun sərgiləyirdi. Ümumiyyətlə, Minsk təmsilçisi daha çox cinahlardan hücumlar qurmağa çalışırdı. Onlar cərimə meydançasına asmalar edərək rəqibi cəzalandırmağa çalışırdı. Lakin bosniyalıların müdafiəçiləri etibarlı oynayırdı. Bununla belə, 64-cü dəqiqədə nominal meydan sahibləri istəyinə çatdı. Mulaliç topu başla qapıya göndərmək istəyən Bıkova zərbə endirdi. Hakim bunu penalti kimi dəyərləndirdi. Topun başına keçən “Dinamo”nun ən fəal üzvü Sedko dəqiq zərbə ilə hesabı bərabərləşdirdi.

Bundan sonra psixoloji üstünlük minsklilərin tərəfinə keçdi. Lakin son zərbəni vurmaq mümkün olmurdu. Bosniyalılar isə əks-hücumlarla nominal meydan sahiblərinin müdafiəçilərini narahat edirdilər. Əslində düşünmək olardı ki, oyunun taleyi əlavə vaxtda müəyyənləşəcək. Amma 79-cu dəqiqədə İrfan səhnəyə çıxdı. Müdafiəçi hücuma qoşularaq qapı önünə asma etdi. Nəzarətsiz qalan Krpiçin güclü zərbəsi qarşısıalınmaz oldu. Skripçenko bu gözlənilməz zərbədən sonra əvəzləmələrlə oyunu xilas etməyə çalışsa da, heç nə alınmadı. Beləliklə, Bakıda keçirilən oyunda “Dinamo”nu məğlub edən “Jelezniçar” 2-ci təsnifat mərhələsində “Neftçi”nin rəqibi oldu.

Bu komandanın oyununa canlı şahid olmağımız Azərbaycan klubunun xeyrinə idi. İndi rəqib haqda müəyyən fikirlərimiz var. Bildik ki, “Neftçi”də işlər qaydasında olmasa belə, hazırda “Jelezniçar”dan güclüdü. Bunu bosniyalıların baş məşqçisi də etiraf etdi. Artıq Mutunun əlində rəqib haqda yetərincə məlumat var. Bundan istifadə edərək asanlıqla 3-cü təsnifat mərhələsinə adlamaq olar. “Dinamo” ilə oyunda onu da gördük ki, “Jelezniçar” əks-hücumlara belə bağlayan komandadı. Flaqman belə məqamlarda müdafiədə ehtiyatlı oynasa, həm səfərdəki, həm də Bakıdakı görüşdə qələbə qazanaraq mərhələ keçə bilər. Amma bunun üçün bir məsələyə diqqət yetirmək lazımdı. “Neftçi”nin hücum xəttində yer alan Saldanya dəqiq zərbələrlə rəqibi məyus etməlidi. Kilan Lebonla Kenni Sayef topla çox oynamalıdı. Filip Ozobiçlə Emin Mahmudov uzaqdan zərbələrlə şansını yoxlamalıdı. Mutu bu məqamlar üzərində işləsə, növbəti mərhələyə Azərbaycan klubu adlayacaq.

İLKİN SULTANLI