“Şamaxı”dakı vacib iclasın detalları – baş məşqçi AÇIQLADI
2023/24 mövsümündə 1-ci liqada mübarizə aparacaq “Şamaxı”nın hədəfi yenidən elita klublarının sırasına qoşulmaqdı.
Komanda bu məqsədlə hazırlığa start verib. Artıq ilk yoxlama görüşü də keçirilib. "Qarabağ"ın əvəzediciləriylə qarşılaşma 2:0 hesablı qələbə ilə başa çatıb.
Oyun haqda fikirlərini və bundan sonrakı planlarını öyrənmək məqsədilə "Şamaxı"nın baş məşqçisi Vüqar Əsgərli ilə əlaqə saxladıq. Onun "Football-plus.az"a söylədikləri:
"Hesab o qədər də vacib deyil. Məqsədim futbolçularımın performansını, kondisiyalarını yaxşılaşdırmaq idi. Qolları Elşad Tağıyevlə Əli Mürsəlov vurdu. Hər ikisi bacarıqlıdı. Ümumiyyətlə, bütün futbolçularım məni qane edir. İstirahətdən sonra bəzi çatışmazlıqların olması normaldı. Çempionatın startına bir aydan çox vaxt var. Ümid edirəm ki, komandamı istədiyim vəziyyətə gətirəcəm. İyulun 28-də yenidən "Qarabağ-2" ilə oynayacıq. Həmin oyunda durum daha aydın görünəcək".
Əldə etdiyimiz məlumata görə, "Şamaxı"da klubdaxili iclas keçirilib. Vüqar Əsgərlidən həmin toplantı haqda məlumat aldıq:
"Yeni mövsüm üçün hazırlığa başlamazdan əvvəl bir araya gəldik. Planlar və hədəflər müzakirə olundu. Klub rəhbərliyi komandaya uğurlar arzuladı. Maksimum çalışıb, yaxşı nəticələr əldə etməyimizin vacibliyi vurğulandı. Qərara aldıq ki, təlim-məşq toplanışını ölkəmizdə keçirək. Məkan hələ bəlli deyil. Komandanın komplektləşdirilməsi haqda da danışdıq. Daha bir neçə transfer etməliyik".
Çalışdırıcı Mətbuat Günü münasibətilə jurnalistləri təbrik etməyi unutmadı:
"Futbol+" kollektivi daxil olmaqla bütün jurnalistləri təbrik edirəm və peşə fəaliyyətində uğurlar arzulayıram".
KƏNAN BAHADIR
Digər xəbərlər
