“Şamaxı”nın 2023/24 mövsümündə 1-ci divizionda iştirak edəcəyi dəqiqləşib. Klub rəsmi saytı vasitəsi ilə müqavilə müddəti başa çatan futbolçularla yolları ayırdığını açıqladı. Lakin “şirlər”lə bağlı bəzi qeyri-müəyyənliklər var. Klubla müqaviləsi olan futbolçuların taleyi necə olacaq? Onlardan biri olan Fuad Bayramov yenə premyer-liqada çıxış edəcək.

"Football-plus.az"a daxil olan məlumata görə, sol cinah müdafiəçisi “Zirə” ilə anlaşıb. Düzdü, Fuad Şamaxı təmsilçisindən tam ayrılmayıb. “Qartallar” onu icarəyə götürüb. Rəşad Sadıqovun rəhbərlik etdiyi komanda əvvəlcə Fuadı birbaşa transfer etmək istəyib. Lakin “Şamaxı” rəhbərliyi 80 min manat tələb edib. Bakı təmsilçisi isə bununla razılaşmayıb. Yekunda klublar arasında razılıq əldə olunub.

Fuad “Zirə”də icarə əsasında çıxış edəcək. Müdafiəçi birilliyə icarəyə götürülüb. Mövsüm ərzində özünü yaxşı tərəfdən göstərsə, transfer olunmaq öncəliyi “Zirə”yə veriləcək. Həmin zaman “Şamaxı” Fuad üçün 80 mindən az pul tələb edəcək. Yaxın günlərdə hansısa problem çıxmasa, müdafiəçi “Zirə” ilə rəsmi müqavilə bağlayacaq.

Qeyd edək ki, Fuad 2022/23 mövsümündə “Şamaxı”nın heyətində 36 görüşdə meydana çıxıb. O, bu qarşılaşmalarda 4 qol vurub, 8 məhsuldar ötürmə verib.

İLKİN SULTANLI