“Bu günə kimi çemodanını götürüb getməyibsə, bundan sonra da ondan bu addımı gözləmək olmaz. Bilir ki, istefa versə, təzminat almayacaq. Onu heç nə narahat etmir. Mətbuat nə istəyir, yazsın. Onsuz da Azərbaycan dilində başa düşmür. Ətrafındakılar isə ancaq özlərinə sərf edən xəbərləri italiyalıya çatdırır. Problem onda yox, bizim rəhbərlikdədi. Mən De Byazidə heç bir günah görmürəm. Müqaviləm var, işləyirəm. Ortadakı nəticə budu, bəyənmirsən, təzminatımı ödə, yola sal. Biz heç vaxt düzgün qərar verməmişik, ən acınacaqlısı da odu ki, səhv etdiyimizi boynumuza almırıq. Ona görə cənab De Byazini dəstəkləyirəm və mən də onun yerində olsam, eyni addımı ataram. İstəmirsiz, pulumu ödəyib yola salın. Bu adam peşəkardı. Biz təzminat verə bilmiriksə, onda kim onunla müqavilənin müddətini artırıbsa, ortaya çıxıb məsuliyyəti boynuna götürsün. Niyə komanda uduzanda, qələbə qazana bilməyəndə kölgəyə çəkilirlər? İkinci dəfə italiyalıyla müqavilə bağlananda “De Byazi komandanı artıq yaxşı tanıyır. Ona görə müqavilə yenilənməlidi” söyləyənlər, hardasız, çıxın, cavab verin! Çox danışmaq istəmirəm. Danışdıqca ucuzlaşırıq. Bu gün futbolda futboldan kənar, ancaq vəzifədə olan insanları görə bilərsiz. Onların idarəçiliyinin də nəticəsi göz qabağındadı. Səhvi italiyalıda yox, onlarda axtarmaq lazımdı”.