Avrokuboklara hansı komandalar vəsiqə qazanacaq? Hansılar elitada qalmaq uğrunda pley-off oyunları keçirəcək, hansılar bu aqibətdən qaçacaq? 30-cu tur bütün bu suallara aydınlıq gətirməliydi.

“Football-plus.az” xəbər verir ki, təkcə “gümüş” yox, həm də ÇL-in təsnifat mərhələsinə vəsiqə qazandıran 2-ci yer uğrunda “Zarya” ilə “Dnepr-1” mübarizə aparırdı. Luqansklılar “Minay”ın öhdəsindən asanlıqla gəldi. Turun oyunları paralel keçirildiyindən “gümüş” uzun müddət məhz “Zarya”nın əlində idi. “Dnepr-1” qonşu Ujqorodda keçirilən oyunda “Krivbass”ın qapısına yalnız 73-cü dəqiqədə yol tapa bildi.

“Aleksandriya” ilə “Krivbass”ın da iddialı olduğu 5-ci yeri “Vorskla” tutdu. Poltavalılar finişdə 5 oyunluq qələbə seriyası yaxaladı. Sonuncu qələbə “Şaxtyor” üzərində qazanıldı. Düzdü, İqor Yoviçeviç meydana eksperimental heyət buraxmaqla “Vorskla”nın işini asanlaşdırmışdı. “Vorskla” 2:1 hesablı qələbəyə rəğmən, avrokuboklardan kənarda qala bilərdi. Axı hər şey Emil Mustafayevin şərəfini qoruduğu “Aleksandriya”nın öz əlində idi. Emil və komanda yoldaşları çox çalışsalar da, Lvovda “Rux”un qapısına yol tapa bilmədilər. Bu isə 67 dəqiqə meydanda olan soydaşımızın avrokuboklardan kənarda qalması deməkdi.

“Rux”la yanaşı, “Metallist 1925” də xilas oldu. Xarkovlular son üç oyunun hamısında qələbə qazanan “Dinamo”dan xal ala bildi.

Turun qalan oyunlarına gəlincə, Roman Qriqorçukun “Çernomorets”i “Metallist”i darmadağın etdi, “Kolos” “Lvov”a qalib gəldi. “Veres” – “İnqulets” oyununun nəticəsi (1:0) ciddi mənada heç nəyi dəyişmədi. Məhz bu iki komanda aşağı dəstənin liderləri (Zaporojye “Metallurq”u və LNZ) ilə elitada qalmaq uğrunda oyunlara çıxacaq. “Metallist”lə “Lvov” elitadan ayrıldı.

Beləliklə, “Şaxtyor” ÇL-in qrupuna, “Dnepr-1” 2-ci təsnifat mərhələsinə vəsiqə qazandı. “Zarya” Avropa Liqasının pley-offunda oynayacaq. “Dinamo” ilə “Vorskla” Ukraynanı Konfrans Liqasında təmsil edəcək.
30-cu tur

Vorskla – Şaxtyor 2:1

Seferi, 37-p. Pavlyuk, 50 – Bondarenko, 80.

Şaxtyor: Pyatov (Şevçenko, 63), Qoçoleyşvili (Kozik, 88), Bondar, Farina, Totovitski (Toirov, 72), Oçeretko (Qluşenko, 63), Krıskiv (Boyarçuk, 63), Curasek, Bondarenko, Kelsi, Topalov.

Dnepr-1 – Krivbass 1:0

Minqo, 73.

Dnepr-1: Valef, Kapliyenko (Nazarenko, 67), Svatok, Pasiç (Hayner, 61), Pixalenok (Koqut, 61), Rubçinski (Podlepenets, 61), Sarapi, Tankovski (Adamyuk, 46), Tançik, Dovbik, Minqo.

Minay – Zarya 0:3

Rusin, 8; 58. Bataqov, 24.

Metallist 1925 – Dinamo 1:1

Qabelok, 38 – Ramires, 20-p.

Kolos – Lvov 1:0

Veleten, 28.

Metallist – Çernomorets 0:3

Yusov, 76; 87. Hadida, 90+2.

Rux – Aleksandriya 0:0

Veres – İnqulets 1:0

Vovçenko, 74.

Yekun cədvəl
1. Şaxtyor 30 22 6 2 69-21 72
2. Dnepr-1 30 21 4 5 61-27 67
3. Zarya 30 21 4 5 64-31 67
4. Dinamo 30 18 6 6 51-25 60
5. Vorskla 30 13 6 11 38-37 45
6. Aleksandriya 30 10 14 6 42-39 44
7. Krivbass 30 12 5 13 26-30 41
8. Kolos 30 10 6 14 23-36 36
9. Çernomorets 30 9 8 13 35-40 35
10. Minay 30 8 9 13 22-33 33
11. Metallist 1925 30 6 14 10 23-42 32
12. Rux 30 7 11 12 31-37 32
13. Veres 30 8 7 15 35-45 31
14. İnqulets 30 8 7 15 22-34 31
15. Metallist 30 5 7 18 27-58 22
16. Lvov 30 3 4 22 18-52 13
Bombardir: Dovbik (Dnepr-1) – 24.