Sabah Azərbaycan kubokunda mövsümə yekun vurulacaq.

"Football-plus.az" xəbər verir ki, finalda "Neftçi" "Qəbələ" ilə qarşılaşacaq. Oyundan öncə "qırmızı-qaralar"ın baş məşqçisi Elmar Baxşıyevin mətbuat konfransı keçirilib. Sizi mütəxəssisin fikirləri ilə tanış edirik:

- "Bakcell Arena" "Neftçi"nin stadionudu. Bu amil sizə problem yaradacaq?
- Təsir etməməlidi. İlk dəfə deyil ki, burda oynayırıq. Biz də "Bakcell Arena"ya alışmışıq. Stadionun atmosferi futbolçuların oyundan həzz almasına münasibdi. Düşünmürəm ki, bizə təsiri olacaq.

- "Qəbələ" avrokuboklara vəsiqə qazanıb, "Neftçi"də isə titul qazanmaq üçün gərginlik var. Bu, sizin xeyrinizədi?
- "Neftçi"nin necə olacağını düşünmürük. Məni daha çox düşündürən öz komandamdı. Çempionatda istədiyimiz yerə gəlib çatdıq. Futbolçulara təşəkkür edirəm. Oyunçularım hər şeyi edəcəklər ki, titula sahib çıxsınlar. İddialıdılar. Sabah fərqli "Qəbələ" görəcəyik.

- Asif Məmmədov zədəlidi. Ehtiyat skamyada görəcəyik onu?
- Cəzalı olduğuna görə otura bilməz. Çempionatdakı oyunda zədə alanların komandada olması mənim qərarım idi. Asif bizim üçün önəmlidi. Onu da komandada hiss edəcəyik.

- Onunla yeni müqavilə bağlayacaqsız?
- Əlbəttə. Asif oyunda zədə alıb, klub olaraq ən yaxşısını etməyə borcluyuq ki, karyerasını davam etdirsin.

- Özünüzü evdə hiss etməyiniz üçün "Qəbələ" azarkeşlərini stadiona necə səsləyərdiz?
- İstəyərdik ki, azarkeşlərimiz sabah stadionda olsunlar. Onların dəstəkləri bizə əlavə güc verir. İnanıram ki, çoxlu sayda azarkeşimiz stadionda olacaq. Futbol statistika üzərində qurulmayıb. Oyunlar fərqli olur. Keçmişdə olanlar keçmişdə qalıb. Düşünürük ki, tarix yaza bilərik. Futbolçularıma inanıram. İnanıram ki, məqsədə çatmağa cəhd edəcəyik.

- Bəziləri bu oyunu Elmar Baxşıyev - Laurentsiu Regekampf dueli kimi görür....
- Bəziləri hər cür fikirləşə bilər. Sabah "Neftçi" və "Qəəblə" oynayacaq. Məşqçilərin yox, komandaların dueli olacaq.

- Heyətlə bağlı probleminiz var?
- Zədəli Fares Abu Akaldı. Əməliyyat olunmalıdı. İki futbolçu xaric bütün komanda sabahkı oyunda iştirak edə biləcək.

- Premyer-liqada da bizə inanan az idi. Amma şükürlər olsun ki, az büdcə ilə məqsədimizə çatdıq. Sabah finaldı. Büdcə heç cür önəm daşımır. Hansı komanda xarakter göstərsə, istəyinə çatacaq.

- Əksər komandalar futbolçularla yollarını ayırır. Transfer üçün daxili bazara baxacaqsız?
- Transfer çalışmalarımıza başlamamışıq. Daha çox sabahkı oyunu düşünürük. Bu matçdan sonra hansı mövqelər önəmli olacaqsa, transferlərimizi o yöndə edəcəyik.