Yorq Şmadtkenin “Liverpul”a təyinatı rəsmiləşib. O, 3 ay müddətinə transfer məsləhətçisi təyin edilib.

"Football-plus.az" xəbər verir ki, onun artıq “Liverpul”la müqavilə imzaladığı və cümə günü İngiltərəyə gələcəyi bildirilib.

Qeyd edək ki, bir neçə həftə əvvəl Şmadtkenin İngiltərə klubuna idman direktoru Culian Uordun yerinə təyin olunacağı və onunla 3 illik müqavilə bağlanacağı haqda xəbərlər yayılmışdı. Rəhbərlik daha əvvəl “Volfsburq”da transfer məsələlərinə cavabdeh olan funksionerlə əməkdaşlığın davam etdirilib-etdirilməyəcəyinə yay “transfer pəncərəsi” bağlanandan sonra qərar verəcək.

Yeri gəlmişkən, artıq mövsümün sonunda “Liverpul”dan ayrılacaq daha bir futbolçunun adı məlumdu. Baş məşqçi Yürgen Klopp Artur Melonun klubdan gedəcəyini bildirib. O, braziliyalı yarımmüdafiəçinin yayda müqavilə ilə məxsus olduğu “Yuventus”a qayıdacağını bildirib. Arturun “qırmızılar”ın heyətində yalnız 13 dəqiqə meydanda olduğunu bildirək. Qeyd edək ki, ona qədər Roberto Firmino, Nabi Keyta, Ceyms Milner və Aleks-Oksleyd Çemberlenin yayda “Liverpul”dan ayrılacağı açıqlanmışdı.