Birinci divizionda cari mövsümün çempionu “Araz Naxçıvan” oldu. Muxtar Respublika təmsilçisi srağagün keçirilən mərasimdə qızıl medallarına qovuşdu. Həmin gün 27 qolla turnirin bombardiri olan Orxan Əliyevə də xüsusi hədiyyə verildi.

"Football-plus.az" olaraq “Araz Naxçıvan”ın futbolçusu ilə söhbətdə mövsümü dəyərləndirməklə yanaşı, qarşıdakı hədəflərə toxunduq.

- Birinci divizionda böyük uğura imza atdın. Karyerana əsasən təcrübəli futbolçusan. Futbola gəlişin necə olub?
- Bu sahəyə uşaqlıqdan həvəsim olub. Məktəbdə oxuyarkən tez-tez futbol oynayırdım. Bir gün bədən tərbiyəsi müəllimi mənə yaxınlaşıb potensialımın olduğunu dedi və bu işə daha məsuliyyətli yanaşmağımı istədi. Mən də sevə-sevə üzərimdə çalışmağa başladım. Hər şey bundan sonra başladı.

- Uzun illərdi böyük futbolsuz qalan bölgənin komandasında çıxış etmək riskli ola bilərdi. Səviyyə, demək olar ki, sıfır idi. “Araz Naxçıvan”a gəlişin necə baş tutdu?
- Klubdan təklif gəldi. O vaxt Region Liqasında oynayırdım. Şərtləri dəyərləndirib qərarımı verdim. Azər müəllimlə (“Araz Naxçıvan”ın baş məşqçisi Azər Bağırovu nəzərdə tutur - red.) birlikdə bura gəldik. Düz vurğuladın, səyahətə sıfırdan başladıq. Lakin klub rəhbərliyi ilə ilkin danışıqlarda mənə hədəfin çempionluq və növbəti mövsüm üçün premyer-liqaya yüksəlmək olduğu deyildi. Qarşıda ağır sınaqların məni gözlədiyini bilirdim. Özümə güvəndiyim üçün təklifə razılıq verdim.

- Birinci divizionun ən sərrast futbolçusu oldun. Bu haqda nə deyə bilərsən?
- Çox sevinirəm. İlk növbədə klubumun, daha sonra özümün uğurları məni xoşbəxt edir. Mövsümdən əvvəl qarşıma məqsəd qoymuşdum ki, fərqlənməliyəm. Əlhəmdülillah, buna nail oldum.

- Mövsüm ərzində komandada ab-hava necə idi? Klubun çempion olmasının səbəblərini necə izah etmək olar?
- “Araz Naxçıvan”ın bütün üzvləri arasında qısa zamanda mehriban və səmimi münasibətlər formalaşdı. Şablon olsa da, biz ailə kimiyik. Qızıl medalları təmin etməyə köklənmişdik. Başqa nəticəni əsla düşünmürdük.

- Rəqiblər haqda nə düşünürsən? Turnir cədvəlində ən yaxın izləyici “Neftçi-2” idi ki, bakılıları 10 xal qabaqladız. Bununla yanaşı, bombardirlər yarışında 2-ci yerdə qərarlaşan MOİK-in futbolçusu İlham Allahverdiyevdən 10 qol öndə oldun…
- Mövsümboyu asan qələbə qazandığımız matç olmadı. Kənardan elə görünürsə, bu məşqlərdə çox çalışmağımızın nəticəsidi. Hər rəqibi ciddiyə alıb tam məsuliyyətlə hazırlaşırdıq. Birinci diviziondakı komandaların heyətində gənc futbolçular çoxdu. Fiziki cəhətdən güclü olurlar. Qaçmaqda, rəqiblə təkbətək mübarizədə cəlddilər. Belə anlarda şans amili ön plana çıxır. Deməzdim ki, rəqabət olmadı. Sadəcə, qapıya zərbələrin qolla nəticələnməsi üçün çox çalışmaq lazımdı. Fiziki hazırlıqla yanaşı, diqqət, dəqiq hesablama və qapıçının gözlənilən hərəkətlərini hiss etmək vacibdi.

Bununla yanaşı, aşağı dəstə klublarının stadionları istənilən səviyyədə deyil. Xüsusilə qazonların durumu bərbaddı. Orda istədiyin performansı sərgiləmək çətin olur.

- Mayın sonunda “Araz Naxçıvan”la müqavilənin müddəti bitir. Karyerana harda davam etmək istəyirsən? İstər öz klubundan, istərsə də başqalarından təkliflər almısan?
- Klubdan qarşıma qoyulan bütün tələbləri yerinə yetirdim. Var gücümlə çalışırdım ki, nə mənim, nə də komandamın əziyyəti boşa getsin. Bundan sonrası rəhbərlikdən asılıdı. Bir neçə gün sonra keçiriləcək görüşdə bu detallara aydınlıq gələcək. Adını açıqlamaq istəmədiyim klublardan da təkliflər gəlib. Hələ ki dəqiq bir şey yoxdu.

KƏNAN BAHADIR