Tur şənbə günü keçirilən 3 oyunla start götürdü.

"Football-plus.az" xəbər verir ki, elitada qalmaq uğrunda çarpışan “İstanbulspor” səfərdə “Kasımpaşa”ya minimal hesabla boyun əydi. “Kayserispor”un evdə “Alanyaspor” önündə pərən-pərən düşməsi gözlənilməz oldu. Çünki “Alanyaspor” özü də yaxşı durumda deyildi və ötən tur evdə “Konyaspor”la matçda darmadağın olmuşdu. Kayseri təmsilçisi bu mövsüm ilk dəfə evdə böyük hesabla uduzdu.

“Fənərbaxça”nın texniki qələbə sayəsində hesabına 3 xal əlavə olunduğunu nəzərə alsaq, “Qalatasaray”la fərq 2-yə enmişdi. “Cim-Bom” fərqi yenidən 5-ə yüksəltmək üçün mütləq “Sivasspor”u məğlub etməliydi. Rza Çalımbayın komandası mövsümün sonuna yaxın sınıq-salxaq vəziyyətdədi. Kubokda yarımfinala qədər irəliləyən və “Fənər”lə cavab oyununu gözləyən “yiğidolar”ın superliqada heç bir hədəfi qalmayıb. Üstəlik sivaslılar bu matça ciddi itkilərlə çıxmışdılar. Ona görə də qonaqların belə məqamda tarixinin 23-cü çempionluğuna doğru şığıyan “Qalatasaray”ı büdrədəcəyi inandırıcı görsənmirdi. Belə də oldu. Möhtəşəm azarkeş dəstəyi ilə oynayan “Aslan” hər hissədə 1 qol vuraraq çox rahat şəkildə hesabına 3 xal yazdı.

Maraqlıdı ki, “Qalatasaray”ın son 6 qolunun hamısının müəllifi İkardidi. O, klub tarixində belə seriya yaxalayan ilk əcnəbi futbolçu oldu. Argentinalı forvard ikinci dövrədə artıq 14 qol vurub və bu göstəricidə hamını, hətta inamla bombardirlər yarışına başçılıq edən Valensiyanı (13) da üstələyir. “Qalatasaray” ardıcıl 3-cü turda “quru” qələbə qazandı. Komandanın buna qədər cari mövsüm belə seriyası olmamışdı. Beləliklə, “sarı-qırmızılar” çempionluq mübarizəsində finiş xəttinə çatmaq üzrədi. Okan Burukun yetirmələri növbəti tur “Ankaragücü” ilə səfər oyununda qalib gələcəyi təqdirdə “Fənər”in əldə etdiyi nəticədən asılı olmadan çempionluğu rəsmiləşdirəcək.

Bazar günü elitadan düşən ilk klubun adına aydınlıq gəldi. Öz meydanında “Ankaragücü”nə yenilən “Ümraniyəspor”un şansı tükəndi. Beləliklə, bu klubun superliqa macərası cəmi bir il çəkdi. Xatırladaq ki, “Ümraniyəspor” ötən il tarixində ilk dəfə elitada oynamaq haqqı qazanmışdı. “Antalyaspor” ilə “İstanbul BŞ”nin duelində qapılara qol vurulmadı. Bu nəticə daha çox “Adana Dəmirspor”u sevindirdi. Çünki adanalıların mövsümü ən azı 4-cü pillədə bitirməsi rəsmiləşdi. “İstanbul BŞ”nin isə kubokda yoluna davam etdiyini xatırladaq.

Turun mərkəzi oyunu Adanada keçirildi. Bu, “Adana Dəmirspor”un mövsümü evdə uduzmayan yeganə komanda statusunda tamamlaması üçün son ciddi sınağı idi. “Qalatasaray”ın qələbəsindən sonra hətta riyazi cəhətdən də çempionluq şansı qalmayan “Beşiktaş”, heç olmasa, 2-ci pillədəki “Fənərbaxça”nın təqibini davam etdirmək üçün qalib gəlməliydi. İlk yarıda yaxşı təsir bağışlayan meydan sahibləri hissənin ortalarında təcrübəli Belhandanın qolu ilə hesabda önə keçdilər. Bu məqamda xatırladaq ki, buna qədər evdə uduzmaması bir yana, “Adana Dəmirspor” həm də hesabı açdığı oyunlarda uduzmayan yeganə komanda idi! Amma İstanbul nəhəngi toparlanaraq rəqibini darmadağın etdi.

Bosniyalı Haciahmetoviç ilk yarının sonlarında Abubakarın, ikinci hissənin 32-ci saniyəsində isə Fernandeşin fərqlənməsinə şərait yaratdı. 73-cü dəqiqədə intriqa öldü. Cenk Tosun penaltini dəqiq yerinə yetirməklə fərqi iki topa yüksəltdi. Bu azmış kimi, çox keçmədən adanalıların italiyalı çalışdırıcısı Vinçentso Montella hakimlə mübahisə etdiyinə görə tribunaya göndərildi. Son saniyələrdə Abubakar özü qazandığı penaltini dəqiq yerinə yetirərək yekun nəticəni müəyyənləşdirdi. “Adana Dəmirspor” Montellanın dönəmində ilk dəfə evdə İstanbul təmsilçisinə boyun əydi. Texniki qələbə ilə birlikdə “Qartal”ın qələbə seriyası 6, məğlubiyyətsiz seriyası 13 oyuna yüksəldi. ”Beşiktaş” ilk dəfə superliqada Adanada böyük hesabla qalib gəldi və bu rəqibə qarşı çempionat çərçivəsində məğlubiyyətsiz seriyanı 12 oyuna çatdırdı (7 qələbə, 5 heç-heçə). Maraqlıdı ki, belə seriyaya baxmayaraq, “Adana Dəmirspor” evdəki şəxsi oyunlarda qələbə sayında hələ də “Beşiktaş”dan üstündü (8:7).

Turun rəqəmi
32 – “Adana Dəmirspor”un qapısına yol tapmaqla mövsümdə 14-cü qolunu vuran Cenk Tosun belə desək, kolleksiyasını zənginləşdirdi. Təcrübəli forvard buna qədər heç vaxt adanalıları məyus edə bilməmişdi. “Adana Dəmirspor” Cenkin Türkiyə çempionatında debüt etdiyi 2011-in fevralından bəri qapısına yol tapdığı 32-ci fərqli superliqa təmsilçisi oldu. Bununla da “Tosun Paşa” bu göstəricidə Burak Yılımaza məxsus olan turnirin rekordunu təkrarladı.

Turun ulduzu
Vensan Abubakar (Beşiktaş) – həm Abubakar, həm də İkardi mövsümün sonunu mükəmməl keçirir. Onların hər ikisi iki turdu dubl edir. Ötən tur İkardiyə üstünlük verdiyimizdən bu dəfə kamerunluya üstünlük veririk. 31 yaşlı hücumçu çətin Adana səfərində vacib qollar vuraraq növbəti dəfə qələbədə mühüm rol oynadı. Abubakarın son 10 turda 12 qolu var! Onu da bildirək ki, Abubakar “Beşiktaş”ın tarixində 3 fərqli mövsümdə superliqada ən azı 11 qol vuran 2-ci əcnəbi futbolçu oldu. Daha öncə bunu yalnız braziliyalı Bobo bacarmışdı (2006/07, 2008/09, 2009/10).

Turun sitatı
Nihat Kahveci, futbol şərhçisi: