"Gənclərlə yanaşı, təcrübəli futbolçuların xidmətində maraqlıyıq. Onlarla işləmək daha rahatdı. Region Liqasında çempion olmaq istəyirik. "Şirvanovka" ilə 1/4 finalın oyunlarında axsayan tərəflərimiz vardı. Ona görə mütləq güclənməliydik. Rəşad Eyubov kimi həm premyer-liqa, həm də milli təcrübəsi olan futboçuya ehiyacımız var idi. Hazırda bizə sürətli, irəlidəki futbolçuları topla təmin etməyi bacaran oyunçu lazımdı. Sadaladığım keyfiyyətlər Eyubovda var. Bəzilər bizi qınayır ki, ancaq yaşlı futbolçuları komandaya yığırıq. Üzümü onlara tutub deyim ki, futbolda yaş yox, fiziki göstəricilər, bacarıq və təcrübə əsasdı. Müqayisə üçün deyim ki, heyətimizdə çıxış edən 43 yaşlı Ruslan Poladovun sərgilədiyi futbolu 18-21 yaşarası gənclər göstərə bilmir.
Komanda olaraq tez-tez yığışa bilmirik. Ancaq oyunlar ərəfəsində toplanış keçib, məşq edirik. Belə olan halda təcrübəli futbolçular gücümüzə güc qatır. Region Liqasında yaş yox, təcrübə sözünü deyir. Bundan başqa, təcrübəli futbolçular gənclərin formalaşması və nümumə kimi də bizə böyük dəstəkdi. Heyətdə 17-21 yaşarası oyunçular da yer alır. Məhz təcrübəli və gənc oyunçuların sintezi sayəsində daha da inkişaf etmək istəyirik. Rəşad Eyubovun da təcrübəsindən faydalanmaq istəyirik. Fikrimcə, onun kimi futbolçu tək ayaqla oynamaqla da bizi çempionluğa daşıya bilər. İnşallah, qarşıya qoyduğumuz hədəfə - çempionluğa nail olacağıq".