Bütün sahələrdə uğursuzluğa düçar olan Ermənistan beynəlxalq idman arenasında da biabır oldu.

Müqəddəs dövlət rəmzimizin - üçrəngli bayrağımızın yandırılması "qonşu"muzun iç üzünə bir daha güzgü saldı.

Avropa Ağır Atletika Federasiyasının qınağından qurtulmaq istəyən Ermənistan çıxış yolunu Azərbaycanı günahlandırmaqda görür.

Belə ki, ölkənin Daxili İşlər Nazirliyi axşam saatlarında qondarma bəyanat yayaraq rəsmi Bakını hədəf alıb.

"Football-plus.az" saytı sözügedən bəyənatı oxuculara təqdim edir:

"Azərbaycan idmançılarının 15-23 apreldə İrəvanda keçirilən ağır atletika üzrə Avropa çempionatında iştirakının ləğv edilməsi narahatlıq doğurur. Ermənistanın Təhsil, Elm, Mədəniyyət və İdman Nazirliyi Azərbaycanın Gənclər və İdman Nazirliyi və Milli Olimpiya Komitəsinin bu qərarını idman etikasına uyğun saymır".

Ermənistan DİN-in bəyanatı belə davam edir:

"Ermənistan əvvəlcədən bütün təhlükəsizlik standartlarını təmin edib. İrəvana gələn ağır atletlərin təhlükəsizliyi ilə bağlı heç bir problem yaranmayıb və yarana da bilməzdi.

Açılış mərasimində baş verən və fəsadları çox tez aradan qaldırılan hadisənin idmançıların təhlükəsizliyi və onların normal yarışlarının təmin edilməsi ilə heç bir əlaqəsi yoxdu.

Biz Beynəlxalq Ağır Atletika Federasiyası qarşısında götürdüyümüz öhdəlikləri yerinə yetirməyə sadiq qalırıq və çempionatı yüksək səviyyədə keçirmək istəyimizi təsdiqləyirik".

Ölkəmizin beynəlxalq hüquq tərəfindən təsdiqlənən torpaqlarına göz dikən dövlətin uzaqgörən addım ataraq öncədən tədbir görən Azərbaycanın rəsmi qurumlarını qınaması gülüncdü.

Bundan əlavə, hansı təhlükəsizlik tədbirlərindən söhbət gedə bilər? Ermənistan hökuməti indiyə qədər əsir götürülən hərbçilərimizə və mülki vətəndaşlarımıza zülm edənləri cəzalandırıb!?

Allah uzaq etsin, idmançılarımıza zərər verəcək hansısa şəxsin aqibəti necə olacaqdı? Yoxsa bayrağımızı yandıran Aram Nikolyan kimi cəzasız qalacaqdı?

KƏNAN BAHADIR